‘मुंबई-पुणे-मुंबई’चा तिसरा भागही लवकरच‘
सतीश राजवाडे दिग्दर्शित मुंबई-पुणे-मुंबई टू या सिनेमाने बॉक्स ऑफिसवर चांगले यश मिळवले. सिनेमाचे हेच यश सेलिब्रेट करण्यासाठी मुंबई-पुणे-मुंबई टूची टीम एकत्र जमली होती. यावेळी राजवाडेने मुंबई-पुणे-मुंबई थ्रीची घोषणाही केली.
बॅन्ड बाजा वरात घोडा.. म्हणत सतीश राजवाडेच्या मुंबई-पुणे-मुंबई- टू सिनेमाने प्रेक्षकांची चांगलीच पसंती मिळवली. मुंबईतल्या सक्सेस पार्टीत या कलाकारांच्या चेहर्‍यावर हाच आनंद दिसत होता. प्रत्येकजण ग्लॅमरस लुकमध्ये पार्टीमध्ये एंट्री करत होता. सिनेमाने दुसर्‍याच आठवड्यात तब्बल 11 कोटींची कमाई करत बॉक्स ऑफिसवर ऐन दिवाळीत एक वेगळी मोहोर उमटवली.
सिनेमाचे हेच यश सेलिब्रेट करण्यासाठी स्वप्नील जोशी, मुक्ता बर्वे, श्रुती मराठे, बेला शेंडे, सविता प्रभुणे, मंगला केंकरे, विजय केंकरे अशी सगळीच मंडळी मुंबईत एकत्र जमली होती. एकुणच यावेळच्या दीवाळीमध्ये कट्यार काळजात घुसली आणि मुंबई-पुणे-मुंबई हे दोन्ही सिनेमे एकाच दिवशी आमने-सामने आले. दोन्हींची स्टारकास्टही तगडी होती. त्यातच सलमान खानचा प्रेम रतन धन पायो हाही सिनेमा त्याच मुहूर्तावर आला होता. मात्र, असे सगळे असतानाही मराठी सिनेमाने बॉक्स ऑफिसवर आपली मोहोर उमटवत प्रेक्षकांची पसंतीची पावती मिळवली.
मराठी सिनेइंडस्ट्रीसाठी ही नक्कीच उत्साहाची गोष्ट म्हणावी लागेल. आता मुंबई-पुणे-मुंबई थ्री काय नवीन स्टोरी घेऊन येतेय हाच उत्सुकतेचा विषय आहे.
