तेलंगणा विधेयकाला स्थगिती देण्यास सुप्रीम कोर्टाचा नकार
नवी दिल्ली- स्वतंत्र तेलंगणा राज्याच्या निर्मितीबाबतचे विधेयक संसदेत सादर करण्यावर स्थगिती देण्यास सुप्रीम कोर्टाने शुक्रवारी नकार दिला. सुप्रीम कोर्टात यासंदर्भात याचिका दाखल करण्यात आली होती. त्यावर निर्णय देताना कोर्टाने याचिका फेटाळून लावली. आंध्र प्रदेशमधून स्वतंत्र तेलंगणा राज्य निर्मितीची प्रक्रिया केंद्र सरकारने सुरु केली आहे. यासंदर्भातील विधेयक संसदेच्या अधिवेशनात मांडण्यात येणार आहे. मात्र, हे विधेयक सादर करण्यास स्थगिती द्यावी, यासाठी सुप्रीम कोर्टात याचिका दाखल करण्यात आली होती. सुप्रीम कोर्टाने स्थगितीच्या मागणीची याचिका फेटाळल्याने केंद्र सरकारला मोठा दिलासा मिळाला आहे. त्यामुळे तेलंगणा विधेयक पुढील आठवड्यात संसदेत सादर करण्याची शक्यता आहे. दरम्यान, संसदीय कामकाज मंत्री कमलनाथ यांनी विधेयकावरून गोंधळ न करता सरकारला सहाकार्य करावे, असे आवाहन केले आहे.