स्वाइन फ्लू

स्वाईन फ्ल्यू पूर्णपणे बरा होऊ शकतो

Fri, 08 Feb 2013 15:24:33 +0530

MH News

MHNEWS

स्वाईन फ्ल्यू अर्थात इन्फल्युएंझा ए (एच १ एन १) या साथीवर मात करता यावी यासाठी शासकीय यंत्रणा सज्ज झाली आहे. टॅमीफ्लू या औषधाचा पुरेसा साठा आणि इतर आरोग्य सुविधा संबंधितांना उपलब्ध करून देण्यात आल्या आहेत. शासन यंत्रणेला जनतेचं सहकार्य अपेक्षित असून त्यामुळे या साथीवर आपण नक्कीच मात करू शकतो.

इन्फ्लूएन्झा व्हायरस काय आहे?
1. हा विषाणूमुळे होणारा आजार आहे .

2. याचा संसर्ग एका माणसापासून दुसर्‍या माणसाला होतो .

हे करा...

1. हात सातत्याने साबण व पाण्याने धुवावेत .

2. पौष्टिक आहार घ्यावा .

3. लिंबू, आवळा, मोसंबी, संत्री, हिरव्या पालेभाज्या यासारख्या सी -व्हिटॉमिन असलेल्या पदार्थांचा आहारात वापर करावा.

4. खोकताना, शिंकताना तोंडावर रुमाल धरावा.

5. भरपूर पाणी प्यावे.

6. पुरेशी झोप घ्यावी.

लक्षणे:

1. ताप येणे, खोकला येणे, घसा दुखणे.

2. अतिसार, उलट्या होणे.

3. श्वास घेण्यास त्रास होणे.

हे टाळा :

1. हस्तांदोलन अथवा आलिंगन.

2. सार्वजनिक ठिकाणी थुंकणे.

3. डॉक्टरांच्या सल्ल्याशिवाय औषध घेणे.

4. धुम्रपान करणे.

5. गर्दीमध्ये जाणे.

6. स्वाईन फ्ल्यू रुग्णापासून किमान एक हात दूर राहावे.

ज्यांना लागण झाली आहे ते, त्यांच्या संपर्कातील व्यक्ती आणि त्यांच्यावर उपचार करणार्‍या डॉक्टरांनीच 'एन-९५ मास्क' वापरावेत इतरांनी साधे मास्क किंवा हातरूमाल वापरावेत.
(महान्यूज)

स्वाइन फ्ल्यू बरा होणारा आजार- डॉ. तायडे

Tue, 01 Sep 2009 11:00:12 +0530

MH News

MHNEWS

स्वाइन फ्ल्यू हा आजार बरा होणार आजार आहे. जनतेने अफवाना बळी न पडता दक्षता घेणे महत्त्वाचे आहे. महाराष्ट्राचे वैद्यकिय शिक्षण व संशोधन विभागाचे संचालक डॉ. वासुदेव तायडे यांच्याशी साधलेला संवाद...

प्रश्न : आता शाळा, कॉलेज पूर्ववत सुरु झाले आहेत, अशावेळी काय दक्षता घ्यावी?
उत्तर : स्वाईन फ्लू आजाराविषयी आता मोठ्या प्रमाणात जनजागृती झाली आहे. शिक्षकांना देखील आजाराविषयी भरपूर माहिती मिळाली आहे, त्यामुळे शाळा, महाविद्यालयात आवश्यक त्या सूचना शिक्षकांनी द्याव्यात. एखाद्या विद्यार्थ्यामध्ये स्वाईन फ्लूची लक्षणे आढळल्यास त्याला तत्काळ डॉक्टरकडे घेऊन जावे.

प्रश्न : स्वाईन फ्लूची लागण झाल्याचे कसे ओळखावे? प्रतिबंधासाठी काय करावे?
उत्तर : ताप, घसा खवखवणे, लूज मोशन, उलट्या ही स्वाईन फ्लूची लक्षणे आहेत. हा आजार टाळण्यासाठी गर्दीच्या ठिकाणी जाऊ नये. जायचे असेल तर तोंडाला रुमाल बांधावा. लक्षणे जाणवल्यास डॉक्टरांना त्वरीत दाखवावे.

प्रश्न : काहीजणांना या आजाराचा संसर्ग लगेच होतो, यामागील कारण काय?
उत्तर : लहान मुले आणि वृध्दांना या आजाराचा संसर्ग होण्याची जास्त शक्यता असते. वृध्दांना मधूमेह, ह्रदयविकार असे आजार असतात त्यामुळे त्यांची प्रतिकार शक्ती कमी झालेली असते. लहान मुलांची देखील प्रतिकार शक्ती कमी असल्यामुळे त्यांना या आजाराची लागण लगेच होते. गरोदर मातांनी देखील आवश्यक ती काळजी घ्यावी.

प्रश्न : स्वाईन फ्लूची लक्षणे आढळलेल्या रुग्णाच्या स्वापच्या नमुन्यांची प्रयोगशाळेतून माहिती येईपर्यंत बराच वेळ जातो, अशावेळी रुग्ण दगावू शकतो, याबाबत काय सांगता येईल?
उत्तर : ज्या रुग्णामध्ये स्वाईन फ्लूची लक्षणे खरोखर आढळतात त्याच रुग्णाच्या स्वापचे नमुने प्रयोगशाळेत पाठविले जातात आणि त्याची माहिती येईपर्यंत रुग्णाला टॅमी फ्लू गोळ्या दिल्या जातात. त्यामुळे आजार बळावत नाही.

प्रश्न : टॅमी फ्लू गोळ्यांबाबत काय सांगता येईल?
उत्तर : स्वाईन फ्लू आजारावर टॅमी फ्लू गोळ्या रामबाण उपाय आहे. या गोळ्या परेदशात तयार होतात. शासकीय आणि या आजारावर उपचारासाठी मान्यता देण्यात आलेल्या खाजगी रुग्णालयात त्यांचा पुरेसा साठा उपलब्ध आहे. दहा गोळ्यांची किमत साधारण ८५० रुपये इतकी आहे.

प्रश्न : स्वाईन फ्लू ज्या ठिकाणाहून पसरतो तेथे काय व्यवस्था करण्यात आली आहे?
उत्तर : परदेशातून या आजाराचा भारतात शिरकाव झाला आहे. त्यामुळे देशातील आंतरराष्ट्रीय विमानतळावर परदेशातून येणार्‍या प्रवाशांच्या तपासणीसाठी विमानतळावरच व्यवस्था करण्यात आली आहे. बंदरांवर देखील तपासणीची व्यवस्था उपलब्ध आहे.

प्रश्न : डॉक्टरांना प्रशिक्षण दिले आहे काय?
उत्तर : मुंबईतील मेडिकल कॉलेजमध्ये डॉक्टरांची कार्यशाळा आयोजित करण्यात आली होती. नर्स, प्रयोगशाळा तंत्रज्ञ यांना देखील प्रशिक्षण देण्यात आले आहे. जिल्ह्यातील मेडिकल कॉलेजमध्ये देखील कार्यशाळा घेण्यात आली.

प्रश्न : जनतेच्या मनातील स्वाईन फ्लू विषयीची भिती घालवण्यासाठी काय आवाहन कराल?
उत्तर : स्वाईन फ्लू हा बरा होणारा आजार आहे. त्यामुळे भितीचे कारण नाही. स्वाईन फ्लूची लागण झालेले १ हजार ५७५ रुग्ण उपचारानंतर पूर्ण बरे होऊन घरी गेले आहेत. या आजाराचा जास्त बाऊ करु नये. वर सांगितल्याप्रमाणे आवश्यक ती खबरदारी घ्या.

साभार- महान्यूज

स्वाइन फल्यूने सरकारच्या उणिवा उघड!

Fri, 14 Aug 2009 17:00:14 +0530

भारतात सध्या सर्वच राज्यात स्वाइन फल्यू अर्थात ए.(एच १ एन १) चा साथीच्या आजाराने थैमान घातले आहे. मात्र सर्वच राज्य सरकारांनी या आजाराबाबत पुरेशी जनजागृती करुन साथीला आळा घालण्यासाठी सुयोग्य कार्यक्रम अंमलात आणलेला नाही. उलट पक्षी सर्वच प्रसारमाध्यमे या आजाराबाबत उलट सुलट माहिती प्रसारित करुन जनतेत घबराट पसरविण्याचे काम करीत असल्याची टीका विख्यात जवाहरलाल नेहरु विापिठाच्या सोशल मेडिसिन आणि कम्युनिटी हेल्थ विभागातील प्राध्यापक आणि इतर वरिष्ठ संशोधक - शिक्षकांनी केली आहे.

प्रसारमाध्यमातून जेवढे स्तोम माजविले जात आहे, तेवढा स्वाईन फल्यू जीवघेणा नसल्याचे प्रतिपादन जवाहरलाल नेहरु विापिठांच्या सेंटर फॉर सोशल मेडिसिनि ऍण्ड कम्युनिटी हेल्थ, विभागातील डॉ. मोहन राव, प्रा.रमीला बिश्त, प्रा. रमा बारु आदी वरीष्ठ आणि ज्येष्ठ संशोधक शिक्षकांनी केले आहे.

आपल्या नित्याच्या माहितीतला फल्यू (किंवा इन्फल्यूएन्झा) आणि डेन्ग्यू या आजारापेक्षा स्वाइन फल्यू (ए. एच.१ एन १ ) अधिक वरिष्ठ आणि जीवघेणा आजार नसल्याचे सांगत याबाबत घाबरुन जाण्याचे काहीच कारण नाही असे या संशोधक प्राध्यापकांनी म्हटले आहे. नित्याच्या फल्यू प्रमाणेच याही आजारावर उपचार करता येतात. मात्र तो बळावला तरच रुग्णाला दाखल करणे गरेजेचे ठरते. अन्यथा नाही. त्याचबरोबर या आजाराबाबतची उपचारपध्दती आणि आजाराचे व्यवस्थापन या बाबत अधिक सुस्पष्टता असणे आवश्यक आहे, असेही या डॉक्टरांनी प्रतिपादन केले आहे. यामुळे आजाराबाबत सर्वसामान्य जनतेला सुध्दा संपूर्ण आणि स्पष्ट माहिती मिळू शकेल.

पुढच्या टप्प्यातील तपासण्या केवळ निदान आणि उपचारासाठीच केल्या जाव्यात, रुग्णांच्या प्राथमिक चाचणीसाठी केल्या जाऊ नयेत असेही या डॉक्टरांच्या गटाने आवाहन केले आहे. यासाठी इंडियन मेडिकल असोसिएशननेही सक्रीय सहभाग घेणे आवश्यक आहे, असे या डॉक्टरांनी म्हटले आहे.

सरकारने खाजगी रुग्णालयांना चाचणीचे अधिकार दिले तर त्यातून रुग्णाचे केवळ आर्थिक शोषणच होईल यासाठी चाचण्या केवळ शासकिय यंत्रणेव्दारेच केल्या जाव्यात असे सांगत ही साथ म्हणजे इष्टापत्तीच मानून आपली सार्वजनिक आरोग्य यंत्रणा अधिक मजबूत करण्यासाठी या संधीचा वापर व्हावा अशी अपेक्षा या डॉक्टरांनी व्यक्त केली आहे.

नाशिकमध्ये ९ संशयित रूग्ण

Thu, 13 Aug 2009 18:52:36 +0530

स्वाईन फ्ल्यू नाशिकमध्ये वेगाने पाय पसरत आहे. एका डॉक्टरच्या मृत्यूनंतर आणखी नऊ संशयित रूग्ण सापडले आहेत. आरोग्य राज्यमंत्री शोभा बच्छाव यांनी यास पुष्टी दिली.

डॉ. रूपेश गांगुर्डे यांच्या मृत्यूने नाशिकमध्ये स्वाईन फ्ल्यूचा पहिला बळी गेला. त्यानंतरही शहरात स्वाईन फ्ल्यूग्रस्तांची संख्या वाढतच आहे. दरम्यान, एका शिक्षकाचा स्वाईन फ्ल्यूने मृत्यू झाल्याची अफवा पसरली होती. त्याचे जिल्हाधिकार्‍यांनी खंडन केले. फ्ल्यूने ग्रस्त असलेल्या एका रूग्णाला घरी सोडण्यात आल्याचेही त्यांनी सांगितले.

स्वाइन फ्लू बळींची संख्या २१

Thu, 13 Aug 2009 18:43:20 +0530

स्वाइन फ्लूचा कहर वाढत चालला असून आज पुण्यात तीन जणांचा बळी या रोगाने घेतला आहे. यात एका ९ महिन्याच्या अर्भकाचा आणि ७५ वर्षांच्या वृद्ध महिलेचा आणि ३७ वर्षाच्या एका महिलेचा समावेश आहे. सायबरसिटी बंगलोरमध्येही स्वाईन फ्लू पोहोचला असून तिथे एक बळी घेतला आहे. त्यामुळे आता स्वाईन फ्लू बळींची संख्या आता २१ वर गेली आहे.

स्वाभिमान कांबळे हे नऊ महिन्यांचे अर्भक सह्याद्री मुनोत हॉस्पिटलमध्ये स्वाइन फ्लूला बळी पडले. या हॉस्पिटलला सरकारने स्वाइन फ्लूवर उपचार करण्यास परवानगी दिली आहे. या आठवड्याच्या सुरवातीलाच या मुलाला हॉस्पिटलमध्ये दाखल केले गेले होते. मात्र, त्याची प्रकृती बिघडतच गेली. त्याला ससून हॉस्पिटलमध्येही अनेकदा तपासणीकरीता नेण्यात आले. पण त्याचा उपयोग जाला नाही. याशिवाय पुण्यातल्याच केईएम हॉस्पिटलमध्ये ७९ वर्षीय महिलेचा स्वाइन फ्लूमुळे मृत्यू झाला. भारती गोयल असे या महिलेचे नाव आहे. याशिवाय नारायणगावच्या अर्चना कोल्हे या महिलेनेही आज पुण्याच्या ससून रूग्णालयात प्राण सोडले. आठ ऑगस्टला त्यांना गंभीर अवस्थेत रूग्णालयात दाखल करण्यात आले होते.

महाराष्ट्रातील स्वाइन फ्लूच्या बळींची संख्या आता १६ वर पोहोचली असून एकट्या पुण्यात १३ बळी गेले आहेत.

धावणारी मुंबई आज मंदावली

Thu, 13 Aug 2009 18:21:57 +0530

एरवी कधीही न थांबणारी मुंबई स्वाईन फ्ल्यूच्या पार्श्वभूमीवरही आपल्या लौकीकाला जागली असली तरीही भीतीने एखाद्या 'स्लो लोकल' सारखी धावत होती. शाळा-कॉलेजेस बंद असल्यामुळे या भागात शुकशुकाट होता, तर जीवनरेखा असलेल्या रेल्वेगाड्यातही फारशी गर्दी नव्हती.

शाळा बंद असल्याने खासगी वाहने रस्त्यावर फार कमी दिसत होती. मुंबईबरोबरच ठाण्यातही शिक्षणसंस्था बंद आहेत. १९ ऑगस्टपर्यंत सुटी असल्याने पंधरा ऑगस्टच्या कार्यक्रमातही मुले भाग घेऊ शकणार नाहीत. दहीहंडी उत्सवही साधेपणाने साजरा करण्याचा निर्णय मंडळांनी घेतला आहे. त्याचवेळी आगामी गणेशोत्सवालाही साधेपणाचीच झालर असेल. मल्टिप्लेक्स आणि टॉकीजेस बंद असल्यानेही या परिसरात शुकशकाट होता.

स्वाइन फ्लूवर पंतप्रधानांनी सोडले मौन

Thu, 13 Aug 2009 16:06:12 +0530

स्वाइन फ्लूने २० बळी घेतल्यानंतर पंतप्रधान डॉ. मनमोहनसिंग यांनी मौन सोडले आहे. नागरिकांनी घाबरून जाऊ नये, असा सल्ला त्यांनी दिला आहे.

केंद्रीय आरोग्य मंत्री गुलाब नबी आझाद यांनी स्वाईन फ्लूच्या स्थितीची माहिती मंत्रिमंडळ बैठकीत दिल्यानंतर पंतप्रधानांनी वरील सल्ला दिला. स्वाइन फ्लूला तोंड देण्यास सरकार सक्षम आहे, असा विश्वास लोकांमध्ये निर्माण व्हायला हवा असे सांगून उगाचच भीती निर्माण व्हायला नको असे ते म्हणाले. स्वाइन फ्लू हे देशासमोरचे नक्कीच मोठे संकट आहे.मात्र, सरकार त्याला यशस्वी तोंड देत आहे, असेही त्यांनी नमूद केले.

असा टाळा स्वाईन फ्ल्यू

Wed, 12 Aug 2009 19:01:02 +0530

* सर्दी, खोकला, ताप असेल तर शक्यतो कामावर जाऊ नये.
* गर्दीच्या ठिकाणी जाणे टाळावे.
* खोकताना, शिंकताना आपल्या तोंडाला रुमाल लावावा.
* धुम्रपानाच्या सवयीमुळे श्वसनशक्ती कमी होते. त्या विषाणूचे प्रवेशद्वार श्वसननलिका आहे.
* नाकाच्या आणि घशाच्या स्त्रावातील थेंबामुळे हा व्हायरस पसरतो. खोकताना, शिंकताना हे थेंब इकडे तिकडे पडतात. त्याच्यामुळे कार्यालयातील टेबल आणि इतर वस्तू पुसाव्यात.
* आपला हात साधारणत: इकडे तिकडे लागतो, त्यामुळे तो साबणाने धुण्याच्या सवयी असाव्यात.
* आपली रोगप्रतिकारक शक्ती कायम ठेवण्यासाठी शारीरिक आणि मानसिक ताण टाळणे आवश्यक.
* पुरेशी विश्रांती / झोप घेणे आवश्यक.
* आपला आहार आरोग्यदायी असावा आणि डिहायड्रेशन टाळण्याकरता भरपूर पाणी प्यावे.
* हात सातत्याने साबण व पाण्याने धुवावेत.
* पौष्टिक आहार घ्यावा.
* लिंबू, आवळा, मोसंबी, संत्री, हिरव्या पालेभाज्या यासारख्या सी -व्हिटॉमिन असलेल्या पदार्थांचा आहारात वापर करावा.
* खोकताना, शिंकताना तोंडावर रुमाल धरावा .
* एन ९५ मास्क हा या आजाराचा संसर्ग झालेल्या रुग्ण, त्याच्यावर उपचार करणारे वैद्यकीय अधिकारी आणि कर्मचारी आणि या रुग्णाच्या संपर्कात येणार्‍या व्यक्तींनी वापरण्याची आवश्यकता.
* इतर लोकांनी हातरुमाल किंवा साधा मास्क वापरला तरी चालू शकते.

हे टाळा :
* हस्तांदोलन अथवा आलिंगन.
* सार्वजनिक ठिकाणी थुंकणे .
* डॉक्टरांच्या सल्ल्याशिवाय औषध घेणे .
* धुम्रपान करणे .
* गर्दीमध्ये जाणे.
* स्वाईन फ्लू रुग्णापासून किमान एक हात दूर राहावे .

अशी लढाई सुरू आहे स्वाईन फ्लूशी

Wed, 12 Aug 2009 18:54:20 +0530

स्वाईन फ्ल्यू हा आजार विषाणू पासून होतो त्याचा प्रसार प्रामुख्याने हवेतून होतो. या आजाराचा अधिशयन कालावधी १ ते ७ दिवस आहे. स्वाईन फ्ल्यू ची प्रमुख लक्षणे म्हणजे ताप, घसा खवखवणे, नाक चोंदणे, डोकेदुखी, अंगदुखी व क्वचित प्रसंगी उलटी व जुलाब अशी आहेत. बाधीत रुग्ण लक्षणे सुरु होण्याच्या एक दिवस आधीपासून पुढील सात दिवस इतरांना आजार पसरवू शकतो.

स्वाइन फ्लूवर उपचार
स्वाईन फ्ल्यू आजाराचे निदान करण्यासाठी घशातील, नाकातील स्त्रावाचे नमूने घेवून प्रयोगशाळा तपासणीसाठी राष्ट्रीय विषाणू संस्था पुणे किंवा हाफकिन संस्था, मुंबई येथे पाठविले जातात. प्रयोगशाळा तपासणीचा अहवाल चोवीस तासानंतर उपलब्ध होतो. स्वाईन फ्ल्यू आजाराच्या उपचारासाठी व प्रतिबंधक उपचारासाठी टॅमी फ्ल्यू हे प्रभावी औषध उपलब्ध आहे. त्याचा पुरेसा साठा केंद्र सरकारकडून प्राप्त झाला आहे. राज्याच्या मागणीनुसार अतिरिक्त साठा वेळोवेळी पुरविण्यात येत आहे. औषधोपचारासाठी टॅमी फ्ल्यू कॅप्सूल सकाळ - संध्याकाळ एक याप्रमाणे पाच दिवस देण्यात येते. दहा वर्षाखालील मुलांना टॅमी फ्ल्यू सायरप उपलब्ध आहे. टॅमी फ्ल्यू औषधाची उपलब्धता निवडक शासकीय व महानगरपालिका रुग्णालयात उपलब्ध आहे.

प्रतिबंधात्मक उपचार
स्वाईन फ्ल्यू चा प्रसार टाळण्यासाठी बाधित रुग्णांच्या प्राथमिक सहवासितांना दररोजची एक टॅमी फ्ल्यू कॅप्सूल दहा दिवस देण्यात येते.

मास्कचा वापर
स्वाईन फ्ल्यू च्या नियंत्रणासाठी प्रयोगशाळेत व विलगीकरण कक्षात कार्यरत असलेल्या वैद्यकीय अधिकारी व कर्मचार्‍यांनी एन ९५ मास्क वापरावा. स्क्रीनींग सेंटर व सँपल कलेक्शन सेंटर येथे कार्यरत असलेल्या वैद्यकीय अधिकारी निमवैद्यकीय कर्मचार्‍यांनी एन ९५ मास्क वापरण्याची आवश्यकता नाही. त्यांनी तीन पदरी सर्जिकल मास्क वापरावा. संशयित रुग्णांनी व बाधित रुग्णांनी तीन पदरी सर्जिकल मास्क वापरावा. जनतेन उपलब्धतेप्रमाणे सर्जिकल मास्क वापरण्यास हरकत नाही. परंतू त्याची योग्य विल्हेवाट लावावी. गर्दीत जाते वेळी आपल्या हातरुमालाचा वापर चार पदरी घडी करुन करावा.

खाजगी डॉक्टरांची मदत
शासनाने मुंबईतील १९ व पुण्यातील खाजगी वैद्यकीय व्यावसायिकांच्या रुग्णालयांची निवड केली आहे. येथे उपलब्ध असलेल्या सुविधांची पाहणी वैद्यकीय महाविद्यालयातील चमू मार्फत करण्यात येत आहे. तेथील उपलब्ध सोयीनुसारच खाजगी वैद्यकीय व्यावसायिकांच्या रुग्णालयांचा समावेश करुन घेतला जाईल. त्यानुसार त्यांना आवश्यकतेप्रमाणे टॅमी फ्ल्यू औषधीचा पुरवठा करण्यात येईल.

केंद्र शासनाची मदत
स्वाईन फ्ल्यू साथ नियंत्रणासाठी आवश्यक औषधी, एन ९५ मास्कचा १०० टक्के पुरवठा केंद्र शासनाकडून करण्यात येत आहे. औषधांचा पुरेसा साठाही उपलब्ध आहे. स्वाईन फ्ल्यूच्या साथ नियंत्रणाच्या अनुषंगाने राज्यात करण्यात आलेल्या कार्यवाहीची पाहणी करण्यासाठी व आवश्यक तांत्रीक मार्गदर्शन देण्यासाठी केंद्र शासनाने वेगवेगळे ३ चमू मुंबई, पुणे व सातारा याठिकाणी पाठविले आहेत. त्यांचे मार्गदर्शन, सूचनांनूसार आवश्यक कार्यवाही सुरु आहे. (सौजन्य- महान्यूज)

गणेशोत्सवातली गर्दी टाळावी- भुजबळ

Wed, 12 Aug 2009 18:24:24 +0530

यंदा गणेशोत्सवावर दहशतवादाबरोबरच स्वाइन फ्ल्यूचे सावट आहे. अशावेळी जनतेने गणेश दर्शनासाठी गर्दी करणे टाळावे, असे आवाहन उपमुख्यमंत्री छगन भुजबळ यांनी केले. लालबागच्या राजाला होणारी गर्दी कमी करण्यासाठी वाहिन्यांनी त्याच्या पूजेचे व आरतीचे प्रक्षेपण करावे अशी सूचनाही त्यांनी केली. दरम्यान, आगामी काळात मुस्लिम बांधवांनीही रमजानचे रोजे सोडताना गर्दी टाळावी असे आवाहन भुजबळ यांनी येथे केले. आता गणेशोत्सव मंडळे याला कसा प्रतिसाद देतात, यावर स्वाइन फ्लूचा प्रसारही अवलंबून आहे.

`सार्वजनिक गणेशोत्सव-2009`च्या कायदा व सुव्यवस्थेसंदर्भात आज मंत्रालयात उपमुख्यमंत्री श्री. भुजबळ यांच्या अध्यक्षतेखाली आढावा बैठक झाली. या बैठकीमध्ये ते बोलत होते. श्री. भुजबळ म्हणाले की, गणेशोत्सवाच्या निमित्ताने लाखो लोक एकत्र येतात आणि मोठ्या शांततेने उत्सव साजरा करतात, ही जगभरात मोठी आश्चर्याची आणि कुतूहलाची बाब समजली जाते. पण हीच बाब यंदा आपल्यासाठी धोक्याची ठरली आहे. दहशतवाद आणि स्वाइन फ्ल्यू या दोन्ही गोष्टींचे संकट टाळण्यासाठी नागरिकांनी गर्दी करणे टाळले पाहिजे. ज्या ज्या वेळी राज्यावर काही संकटाचा प्रसंग आला, अशा प्रत्येक वेळी सार्वजनिक गणेशोत्सव मंडळांनी शासनाला नेहमीच सहकार्य केले आहे. यंदाच्या आपल्या उत्सवावर स्वाइन फ्ल्यूचे सावट आहे. या रोगाचा हवेतूनच संसर्ग होत असल्याने गर्दी टाळणे एवढा एकच महत्त्वपूर्ण उपाय त्यावर करता येणे शक्य आहे. त्यामुळे मंडळांनी या संकटाचे गांभीर्य ओळखून गर्दी टाळण्याच्या दृष्टीने प्रयत्न करण्याची गरज आहे.

`लालबागच्या राजा`सारख्या मंडळांच्या गणपतीच्या दर्शनासाठी देश-विदेशांतून सुमारे एक कोटी भाविक येत असल्याची माहिती यावेळी देण्यात आली. त्याअनुषंगाने उपमुख्यमंत्री श्री. भुजबळ म्हणाले की, यंदाच्या उत्सवकाळात अशा गर्दीवर नियंत्रण ठेवण्याची जबाबदारी जशी सुरक्षा व्यवस्थेवर आहे, तशीच ती जनतेवरही आहे. नागरिकांनी सार्वजनिक ठिकाणी दर्शनासाठी गर्दी न करता यंदा घरगुती स्तरावरच गणेशोत्सव साजरा करावा. या कामी मंडळांनीही नागरिकांना आवाहन करून शासनाला सहकार्य करावे. यंदा ठरल्याप्रमाणे गणपती येतील, कार्यकर्ते त्यांची पूजा, आराधना करतील; पण, फक्त तेथे गर्दी होणार नाही, याची दक्षता घ्यावी आणि रोगाचा प्रादुर्भाव टाळण्यासाठी मंडपाच्या परिसरात काटेकोरपणे स्वच्छता सांभाळावी, अशी सूचना त्यांनी केली. विविध प्रसारमाध्यमांनी, वाहिन्यांनी `लालबागच्या राजा`सारख्या महत्त्वपूर्ण अशा गणेशोत्सव मंडळांच्या श्रीगणेशाच्या आरती व आराधनेचे नागरिकांना घरबसल्या दर्शन घडवावे, असे आवाहनही उपमुख्यमंत्र्यांनी यावेळी केले.

दहशतवादाच्या पार्श्र्वभूमीवर पोलिसांनी सुरक्षेच्या बाबतीत अजिबात कसूर करू नये. परिस्थितीनुसार त्यांनी तत्क्षणी योग्य तो निर्णय घेऊन कार्यवाही करावी, अशी सूचनाही श्री. भुजबळ यांनी केली. गणेशोत्सवाच्या बरोबरीनेच मुस्लीम बांधवांच्या पवित्र रमजानच्या महिन्यास सुरवात होते आहे. मुस्लीम बांधवांनीही उपवास सोडत असताना गर्दी करणे टाळावे, असे आवाहन उपमुख्यमंत्र्यांनी केले.

दहीहंडीच्या संदर्भात श्री. भुजबळ म्हणाले की, या उत्सवावर बंदी आणून लोकांच्या धार्मिक भावना दुखावण्याचा किंवा प्रश्न आणखी जटील करण्याचा शासनाचा मानस नाही. ज्याठिकाणी फार उंच किंवा फार मोठ्या बक्षीसाच्या दहीहंडी असतात, अशा ठिकाणी नागरिक मोठ्या संख्येने गर्दी करतात. ही वस्तुस्थिती लक्षात घेऊन मंडळांनी अशा गोष्टी टाळाव्यात. काही मंडळांनी स्वतःहून दहीहंडीचा कार्यक्रम यंदा रद्द करण्याचा निर्णय घेतला आहे. त्यांची भूमिका स्वागतार्ह आहे. अन्य मंडळांनीही परिस्थितीचे गांभीर्य ओळखून गर्दी न करता उत्सव साजरा करण्यावर भर द्यावा. नागरिकांनीही सूज्ञपणे या गोष्टीचा विचार करावा, असे आवाहन त्यांनी केले.

यावेळी गृह विभागाच्या अपर मुख्य सचिव चंद्गा अय्यंगार यांनी, उत्सव काळात बंदोबस्त करीत असताना स्वयंसेवक आणि पोलिसांनी सर्जिकल मास्क वापरण्यास हरकत नसल्याचे सांगितले. मात्र त्याचवेळी या मास्कच्या विल्हेवाटीची योग्य व्यवस्था करण्याची सूचनाही त्यांनी पालिका प्रशासनाला केली.

उपमुख्यमंत्र्यांची साळगावकरांना विनंती
स्वाइन फ्ल्यूच्या पार्श्र्वभूमीवर, धार्मिक क्षेत्रामध्ये दबदबा असलेल्या आपल्यासारख्या व्यक्तींनी नागरिकांना गर्दी टाळण्याचे आवाहन केले तर ते जरूर ऐकतील. त्यामुळे आपण या कामी पुढाकार घ्यावा, अशी विनंती उपमुख्यमंत्री छगन भुजबळ यांनी ज्योतिर्भास्कर जयंत साळगावकर यांना आज दूरध्वनीद्वारे केली. गणेशोत्सव समन्वय समितीच्या बैठकीमध्ये स्वाइन फ्ल्यूचा फैलाव टाळण्यासाठी कोणते उपाय करता येतील, याविषयी चर्चा सुरू होती. त्यावेळी या पर्यायाचा विचार होताच उपमुख्यमत्र्यांनी बैठकीतूनच श्री. साळगावकर यांना दूरध्वनी केला.

उपमुख्यमंत्री श्री. भुजबळ म्हणाले की, नागरिकांना आम्ही शासन म्हणून कितीही कळकळीने आवाहन केले तरी त्यांना त्यामध्ये राजकारणच दिसते; मात्र, धार्मिक क्षेत्रात दबदबा असलेल्या आपल्यासारख्या व्यक्तींनी आवाहन केले तर लोकांच्या मनावर त्याचा अधिक चांगला परिणाम होईल. आपल्या या मंगल उत्सवावर स्वाइन फ्ल्यूचे सावट आहे. त्यामुळे सार्वजनिकरित्या उत्सव साजरा करण्यासाठी नागरिक मोठ्या प्रमाणावर एकत्र आले तर होणार्‍या संसर्गाला रोखणे कठीण जाईल. गणेश हा सर्वव्यापी आहे. सार्वजनिक ठिकाणांऐवजी तो घरातल्या आरतीनेही प्रसन्न होईल, असे आवाहन आपण जनतेला करावे, अशी विनंती त्यांनी श्री. साळगावकर यांना केली.

पुण्यातील दोघांसह स्वाइन फ्लूचे १७ बळी

Wed, 12 Aug 2009 18:12:55 +0530

स्वाइन फ्लू आटोक्यात येत नसल्याचे स्पष्ट होताच मुंबईत सरकारने आता शाळा, कॉलेजेस, मॉल्स आणि मल्टिप्लेक्स बंद ठेवण्याचा निर्णय आज घेतला. देशभर विविध उपाय योजूनही स्वाइन फ्लूचे बळी मात्र थांबलेले नाहीत. देशभरातील मृतांचा आकडा आता १७ वर जाऊन पोहोचला आहे.

मुंबईतल्या बळींची संख्या वाढू लागल्यानंतर आणि शहरात या रोगाच्या वेगवान प्रसाराची भीती असल्यामुळे अखेर पुढचे सात दिवस शाळा, कॉलेजेस, खासगी कोचिंग क्लासेस बंद रहातील. मॉल, मल्टिप्लेक्स आणि थिएटर्स तीन दिवसर बंद रहातील. आगामी काही दिवसांत दहिहंडी आणि गणेशोत्सव हे मोठे सण आहेत. ते साधेपणाने साजरे करण्याचे आवाहन राजकीय पक्षांतर्फे करण्यात आले आहे.

स्वाइन फ्लूमुळे ससून हॉस्पिटलमध्ये उपचार घेत असलेल्या ४८ वर्षाच्या गौतम शेलार यांचा मृत्यू झाला. त्यामुळे पुण्यातील स्वाइन फ्लूमुळे मृत्यूमुखी पडलेल्यांची संख्या १० आणि देशातील बळींची संख्या १७ झाली आहे. याआधीच आज (बुधवारी) दुपारी नीता मेघानी (५०) आणि सकाळी साडे दहाच्या सुमारास बाबू कुलंद यांचा स्वाइन फ्लूमुळे मृत्यू झाला. याशिवाय आज नाशिकमध्ये रूपेश गांगुर्डे या डॉक्टरांचाही मृत्यू झाला. नाशिकमध्ये स्वाइन फ्लूचा हा पहिलाच बळी. मूळचे मनमाडचे असले गांगुर्डे यांच्यात उलट्या आणि तापाची लक्षणे दिसून आली होती. पुण्यात श्रावणी देशपांडे (२९) या तरूणीचाही काल रात्री मृत्यू झाला. फुफ्फुसात संसर्ग झाल्याने तिचा मृत्यू झाला. ती पुण्यातील कोथरूड भागातील रहिवासी होती. या आधी पुण्यात संजय मिस्त्री या आणखी एका रूग्णाचा मृत्यू झाला होता.

एकट्या महाराष्ट्रात स्वाइन फ्लूचे १४ बळी गेले असून गुजरातमध्ये दोन, केरळ व तमिळनाडूत प्रत्येकी एक बळी गेला आहे. आता पुण्याच्या शासकीय रूग्णालयात अद्यापही पाच रूग्ण गंभीर अवस्थेत आहेत. याशिवाय दिल्लीत तीन व मुंबईत दोन रूग्ण अत्यवस्थ आहेत.

मुंबईत आठवडाभर शाळा, कॉलेज बंद

Wed, 12 Aug 2009 18:00:29 +0530

मुंबईतील स्वाइन फ्ल्यूचा प्रादुर्भाव रोखण्यासाठी उद्या दिनांक 13 ऑगस्टपासून बृहन्मुंबई क्षेत्रातील शाळा, महाविद्यालये, कोचिंग क्लासेस इत्यादी शैक्षणिक संस्था सात दिवसांकरिता; तर, मुंबईतील सर्व थिएटर्स तीन दिवसांकरिता बंद ठेवण्याचा निर्णय शासनाने घेतला असून याबाबतचे आदेश काढण्यात येत आहेत. स्वाइन फ्ल्यूचा प्रादुर्भाव होऊ नये यासाठी मुंबईतील जनतेने आगामी उत्सव काळात गर्दीची ठिकाणे टाळावीत, असे आवाहन उपमुख्यमंत्री छगन भुजबळ यांनी आज येथे केले.

मंत्रालयात आज झालेल्या पत्रकार परिषदेत उपमुख्यमंत्री श्री. भुजबळ बोलत होते. ते म्हणाले, विविध सणांच्या पार्श्र्वभूमीवर मुंबईतील मॉल्स विविध प्रकारचे सेल आणि सवलती जाहीर करीत आहेत. त्यांच्या मोठ्या प्रमाणात जाहिराती करत आहेत. त्यांनी आपले सेल वगैरे गोष्टी काही दिवसांसाठी पुढे ढकलाव्यात, असे आवाहन त्यांनी केले.

उपमुख्यमंत्री श्री. भुजबळ म्हणाले की, स्वाइन फ्ल्यूमुळे नाशिकमध्ये सुद्धा एका व्यक्तीचा मृत्यू झाला आहे. त्यामुळे तिथूनही अशा प्रकारे सार्वजनिक ठिकाणी जमण्यास बंदी घालावी, अशी मागणी होत आहे. मात्र याबाबत सरसकट निर्णय न घेता स्थानिक प्रशासनाने परिस्थितीचे गांभीर्य पाहून संबंधित अधिकार्‍यांशी चर्चा करूनच योग्य तो निर्णय घेण्याचे निर्देश दिले असल्याचे त्यांनी सांगितले.

तीस- चाळीस विद्यार्थी एकत्र येऊन साथीचा फैलाव होऊ नये म्हणून आपण जर एवढी खबरदारी घेत आहोत तर उत्सव काळात जनतेने हजारो आणि लाखोंच्या संख्येने गर्दी करू नये, असे आवाहन उपमुख्यमंत्र्यांनी केले. स्वाइन फ्ल्यू संदर्भात राज्य शासन 24 तास परिस्थितीवर नजर ठेवून आहे. त्याचबरोबर विविध माध्यमांतून जनजागृतीपर मोहिमही चालविण्यात येत आहे. प्रसारमाध्यमांनी या जनजागृतीमध्ये मोलाचा सहभाग घेतल्याबद्दल श्री. भुजबळ यांनी त्यांचे आभार मानले.

स्वाइन फ्लूवरील लस डिसेंबरपर्यंत बाजारात

Tue, 11 Aug 2009 20:05:07 +0530

कॅडिला फार्मास्युटिकल्स (सीपीएल) इनफ्लूएंझा एच १ एन १ अर्थात स्वाइन फ्लूवर लस बाजारात आणण्याच्या तयारीत असून त्याची वैद्यकिय चाचणी करण्यासाठी सरकारकडे परवानगी मागण्यात आली आहे. ही लस डिसेंबरपर्यंत बाजारात येण्याची अपेक्षा आहे.

स्वाइन फ्लूसह अनेक आजारांवर लस विकसित करण्यासाठी सीपीएल व सीपीएल बायॉलॉजिकल या कंपनीने अमेरिकास्थित नोवावॅक्सबरोबर करार केला आहे. या करारांतर्गत आता या लशीची चाचणी घेण्यासाठी औषध नियामक महासंचलनालयाकडे (डिसीजीआय) अर्ज करण्यात येणआर आहे, असे सीपीएलचे अध्यक्ष व व्यवस्थापकीय संचालक आय. ए. मोदी यांनी सांगितले.

डिसीजीआयकडून आम्हाला परवानगी मिळाल्यास आमच्या सहकारी कंपनीकडून उपलब्ध झालेल्या अत्याधुनिक तंत्रज्ञानाच्या सहाय्याने डिसेंबरपर्यंत ही लस बाजारात येईल असा विश्वास मोदी यांनी व्यक्त केला. स्वाइन फ्लूवर लस आणणारी कॅडिला ही पहिलीच कंपनी ठरणार आहे. स्वाइन फ्लूवरच्या या नव्या लशीचा डोस दोन आठवडे द्यावा लागेल.

सिप्ला उपलब्ध साधनक्षमतेच्या बळावर महिन्याला दहा लाख डोस तयार करू शकेल. सिप्लाची सहयोगी अमेरिकन कंपनी नोवावॅक्सला साइन फ्लूच्या लशीची वैद्यकिय चाचणी घेण्याची परवानगी अमेरिकेच्या फेडरल ड्रग एडमिनिस्ट्रेशनकडून मिळाली आहे. आम्हालाही ती लवकरच मिळेल, असा विश्वास मोदींनी व्यक्त केला.

स्वाइन फ्लूसंदर्भात कोणताही अर्ज तातडीने निकालात काढण्याचे सरकारने ठरविले आहे. त्याअंतर्गत आम्हाला परवानगी मिळेल, असे मोदी यांनी नमूद केले.

कमजोर पडलाय स्वाइन फ्लूचा विषाणू

Tue, 11 Aug 2009 19:19:16 +0530

मेक्सिकोमधून उद्भवलेला स्वाइन फ्लूचा विषाणू बराच कमजोर पडला आहे. त्यामुळे आता त्यापासून घाबरण्याची गरज नाही, असा दावा काही डॉक्टरांनी केला आहे.

भोपाळचे प्रख्यात डॉक्टर व अनेक आंतरराष्ट्रीय परिषदांत शोधनिबंधांचे वाचन केलेले डॉ. निशांत नंबीसन यांच्या मते, स्वाइन फ्लू आता तेवढा धोकादायक राहिलेला नाही. होमियोपॅथी आणि आयुर्वेदाच्या अनेक डॉक्टरांनी या तापाला नियंत्रणात आणता येतील अशी औषधे आपल्या शास्त्रांत असल्याचा दावा केला आहे.

होमियोपॅथीमध्ये इनफ्लुएंजियम २०० चा डोस घेतल्याने स्वाइन फ्लूची लागण होत नाही, असे डॉ. नंबीसन यांचे म्हणणे आहे. याशिवाय या पॅथीत अनेक औषधे स्वाइन फ्लूवर परिणामकारक ठरू शकतील अशी आहेत, असा त्यांनी दावा केला.

भोपाळचेचे प्रसिद्ध वैद्य पंडित चंद्रशेखर वैद्य यांनी सांगितले, की स्वाइन फ्लूला आयुर्वेदात फुफ्फुस रोग असे म्हणतात. या रोगावर महामृगांक रस हे रामबाण औषध आहे. डॉक्टरांच्या सल्ल्याने पाच दिवस याचे सेवन केल्यास या रोगावर नियंत्रण राखता येते, असा दावा त्यांनी केला.

त्यांच्या मते स्वाइन फ्लूचा विषाणू श्वासनलिकेच्या माध्यमातून फुफ्फुसावर हल्ला चढवतो. त्यामुळे रूग्णाची तब्बेत बिघडते. परिणामी त्याचा जीव जातो. अशावेळी रोग्याला महामृगांक रस व जयमंगल रसयुक्त औषधे द्यायला हवीत.

गरज भासल्यास परदेशातूनही लस खरेदी- आझाद

Tue, 11 Aug 2009 17:46:38 +0530

देशभरात स्वाईन फ्ल्यू वर नियंत्रण प्राप्त करण्यासाठी, विविध पातळ्यांवर युद्धस्तरावर प्रयत्न केले जात आहेत. येत्या सहा महिन्यांच्या आत भारतीय कंपन्या स्वाईन फ्ल्यू विरोधी लस बनवतील. मात्र त्याआधी जगभरातील कुठल्याही देशाने यावर रामबाण लस तयार केल्यास ती खरेदी करण्यास केंद्र सरकार तयार आहे असे केंद्रीय आरोग्यमंत्री गुलाम नबी आझाद यांनी सांगितले.

दरम्यान देशभरातील स्वाईन फ्ल्यू ने ग्रस्त रूग्णांची संख्या ९५९ इतकी झाली असून यांपैकी ५६३ रूग्णांना उपचारानंतर घरी पाठविण्यात आले आहे. तर राज्यभरातील स्वाईन फ्ल्यू ग्रस्त रूग्णांची संख्या ३२७ इतकी असल्याचे आरोग्य मंत्रालयाने स्पष्ट केले आहे. आज पुण्यातील दोन जणांचा तर मुंबईतील एका महिलेचा स्वाईन फ्ल्यू ने दगावून मृत्यू झाला. पुण्यापाठोपाठ मुंबी महापालिकेनेही, महापालिका शाळा काही काळ बंद ठेवण्याचा निर्णय घेतला. महाराष्ट्र नवनिर्माण सेनेने देखील आज खाजगी शाळांच्या प्राचार्यांची भेट घेऊन आपल्या शाळा काही दिवस बंद ठेवण्याचे आवाहन केले. काही ठिकाणी मनसेच्या कार्यकर्त्यांनी हुल्लडबाजी केल्याच्याही घटना मुंबईत घडल्या.

ठाणे जिल्ह्यात आज आणखी तीन स्वाईन फ्ल्यू ग्रस्त रूग्णांची नोंद करण्यात आली. मुंबई - ठाण्यालगतच्या रायगड जिल्ह्यातही २ स्वाईन फ्ल्यू चे संशयित रूग्ण सापडले आहेत. शासनाने आपल्या सर्व संस्थांना हाय ऍलर्ट जारी केले असून सर्व राजकीय पक्ष मात्र आपही स्वाईन फ्ल्यू च्या साथीचे राजकीय भांडवल करताना दिसत आहेत.

स्वाईन फ्ल्यू : संघ शाखांना सुटी

Tue, 11 Aug 2009 16:34:34 +0530

राज्यभरात स्वाईन फ्ल्यू चा फैलाव वाढत असतानाच, पुणे शहरात सोमवारी आणखी तीन बळी नोंदवले गेल्यामुळे शहरात भीतीचे वातावरण पसरत चालले आहे. याच पार्श्वभूमीवर राष्ट्रीय स्वयंसेवक संघ, पुणे महानगराने आपल्या शाखा, जाहीर कार्यक्रम व संघटनात्मक बैठकांना येत्या १७ तारखेपर्यंत सुट्टी देण्याचा निर्णय घेतला आहे. संघाच्या शाखा या अतिशय प्रतिकुल परिस्थितीतही चालवल्या जातात असा लौकीक आहे. मात्र स्वाईन फ्ल्यू या रोगाची व्याप्ती अधिक वाढू नये म्हणूनच ही निर्णय घेतला गेल्याचे संघाच्या पदाधिकार्‍यांनी स्पष्ट केले.

देशभर थैमान घालणार्‍या स्वाईन फ्ल्यूमुळे पुण्यात सोमवारपर्यंत पाच बळींची नोंद झाली आहे. सार्वजनिक ठिकाणी जमलेल्या गर्दीमुळे या रोगाचा फैलाव अधिक होतो हे लक्षात घेऊन शहरात सध्या सार्वजनिक ठिकाणे काही काळासाठी बंद ठेवण्याचा निर्णय प्रशासनाने घेतला आहे. त्यानुसार शाळा, महाविालये, चित्रपटगृहे इ. सार्वजनिक ठिकाणे काही काळ बंद ठेवण्यात येणार आहेत. त्यातच लहान मुलांना या एच १ - एन १ या विषाणूंचा प्रादुर्भाव लवकर होत असल्याचेही आढळून आले आहे.

संघाच्या शाखेत येणार्‍या शालेय विार्थ्यांचे प्रमाण मोठे आहे. त्यामुळे या मुलांच्या आरोग्याचा विचार करून सध्या संघाच्या शाखांना सुट्टी ावी असा विचार करून संघाच्या पदाधिकार्‍यांनी हा निर्णय घेतला आहे. विविध सामाजिक तसेच सांस्कृतिक कार्यक्रमही तुर्त स्थगित करावेत. तसेच संघाच्या पदाधिकार्‍यांच्या होणार्‍या नैमित्तिक बैठका देखील स्वाईन फ्ल्यू नियंत्रणात येईपर्यंत स्थगित कराव्यात असा निर्णय संघाच्या पुणे महानगर पदाधिकार्‍यांनी घेतला असल्याचे विशेष सूत्रांनी सांगितले.

मराठवाड्यातही आढळले 12 फ्लू रुग्ण

Tue, 11 Aug 2009 15:28:30 +0530

महाराष्ट्रात स्वाइन फ्लू वेगाने पसरत असून, मराठवाड्यात अनेक ठिकाणी या रोगाचे रुग्ण आढळले असून, यांची संख्या 12 वर पोहचली आहे.

सोमवारी मराठवाड्यात चार जणांना याची बाधा झाल्याचे उघड झाल्याने खळबळ उडाली होती. आज ही संख्या 12 वर गेली आहे.
नांदेडच्या शासकीय रुग्णालयात एका नर्ससह चार जणांवर उपचार सुरू असून, त्यांच्यात स्वाइनची लक्षणं आढळल्याचे प्रशासनाने म्हटले आहे.

स्वाइन फ्लूवर तुळस गुणकारी?

Tue, 11 Aug 2009 12:26:48 +0530

आयुर्वेदात अतिशय गुणकारी मानली गेलेली तुळस सध्या धुमाकूळ घालत असलेल्या स्वाइन फ्लूवरही प्रभावी असल्याचा दावा काही आयुर्वेदिक डॉक्टरांनी केला आहे. तुळशीमुळे स्वाइन फ्लू दूर रहातो किंवा त्याचा प्रादुर्भाव झालेली व्यक्ती बरी होण्यास तुळस मदत करते असे या डॉक्टरांचे म्हणणे आहे.

तुळस तापनिरोधक मानली गेली आहे. जगभरातील वैद्यक तज्ज्ञांनीही ही बाब आता मान्य केली आहे. तुळशीमुळे प्रतिकारक्षमताही वाढते. विशेषतः संसर्गजन्य रोगांत तुळस शरीराला ताकद पुरवते त्यामुळे आतल्या यंत्रणेला त्यारोगाविरोधात लढण्याला बळ मिळते. जपानीस एन्सेफलायटिस या रोगातही तुळशी प्रभावी असल्याचे सिद्ध झाले आहे. म्हणूनच स्वाइन फ्लूवरही ती गुणकारी ठरेल, असा दावा डॉ. यु. के. तिवारी या वनौषधींमधील तज्ज्ञ डॉक्टरने केला आहे.

तुळस स्वाइन फ्लूला दूर ठेवते इथपर्यंतच त्याचा गुण मर्यादित नाही. स्वाइन फ्लूग्रस्तांना बरे होण्यासही तुळशीची मदत लक्षणीय आहे. रूग्णाची रोगप्रतिकारक्षमता तुळशीमुळे वाढते आणि तो स्वाइन फ्लूविरोधात लढू शकतो, असा डॉ.तिवारी यांचा दावा आहे. गुजरातमधील आयुर्वेद विद्यापीठातील डॉ. भूपेश पटेल यांनीही तुळशीच्या गुणाला दुजोरा दिला आहे. तुळशीमुळे स्वाइन फ्लू आटोक्यात येऊ शकतो, असे त्यांचे म्हणणे आहे. त्यासाठी तुळस थेट पोटात गेली पाहिजे. त्यासाठी रस, किंवा त्याच्या २० ते २५ पाने कुटून केलेली पेस्ट दिवसातून दोन वेळा घेतल्यास स्वाइन फ्लूवर नियंत्रण करता येऊ शकेल, असा त्यांचा दावा आहे. तुळशीमुळे रोगप्रतिकारकक्षमता वाढत असल्याने स्वाइन फ्लूला ती आपल्या आसपास फिरकू देत नाही किंवा तो झाला तरी त्याविरोधात लढण्यास शक्ती पुरवते, असा या दोन्ही डॉक्टरांचा निष्कर्ष आहे.

नवी मुंबईत शाळेतील विद्यार्थ्यांची तपासणी

Tue, 11 Aug 2009 11:33:55 +0530

PTI

नवी मुंबई महानगरपालिका हद्दीतील शाळांमधील दोन विद्यार्थ्यांना स्वाईन फ्लूची लागण झाल्याने खबरदारीचा उपाय म्हणून पालिकेच्या आरोग्य विभागाने आजपासून तात्काळ खाजगी तसेच पालिका अशा जवळपास १५० शाळांतील विद्यार्थ्यांची प्राथमिक तपासणी (स्क्रिनिंग) करण्यास सुरुवात केली आहे. त्यामुळे स्वाईन फ्लूबाबतचे भीतीचे वातावरण कमी होण्यास मदत होणार आहे.

नवी मुंबईतील नेरुळ येथील ऍपीजे स्कूल आणि नवी मुंबई महानगरपालिका शाळा क्र.६ येथील शाळेतील विद्यार्थ्यांना स्वाईन फ्लूची लागण कुठून झाली याबाबत माहिती मिळत नसल्याने महापालिकेच्या आरोग्य विभागाने युध्द पातळीवर खाजगी तसेच पालिका शाळेतील सर्वच आजारी असलेल्या विद्यार्थ्यांची प्राथमिक तपासणी सुरु केली आहे. प्रत्येक विभागातील माता-बाल रुग्णालय तसेच नागरी आरोग्य केंद्रातील डॉक्टरांची पथके शाळेत जाऊन स्क्रिनिंग करीत आहेत.

महापालिकेने स्वाईन फ्लूचे रुग्ण आढळलेल्या दोन शाळा बंद ठेवण्याचे आदेश दिले होते. परंतु नवी मुंबईतील बहुतांशी खाजगी शाळा बंद होत्या. यामुळे पालकवर्गात भितीचे वातावरण होते. याबाबत पालकांनी स्वाईल फ्लूची भिती बाळगू नये असे आवाहन महापालिकेतर्फे देण्यात आले आहे. तर शाळांनी विद्यार्थ्यांची पिकनिक तसेच खेळाचे दौरे या काळात काढू नयेत अशा सूचना पालिकेने शाळांना दिल्या आहेत.

ठाण्यात शाळा आठवडाभरासाठी बंद

Tue, 11 Aug 2009 11:33:41 +0530

PTI

ठाण्यातील ए. के. जोशी इंग्लिश शाळेत स्वाईन फ्लूचा संशयित रुग्ण आढळल्याने पालकांनी सोमवारी शाळेला घेराव घालून व्यवस्थापनास शहरातील न्यू इंग्लिश स्कूल आणि कोपरीतील पिपल्स एज्यूकेशन इंग्रजी माध्यमाची शाळा आठवडाभरासाठी बंद ठेवण्यास निर्णय व्यवस्थापनाने घेतला आहे.

नौपाडा परिसरातील ए. के. जोशी शाळेत पहिलीच्या वर्गात शिकत असलेल्या प्रणिता कुलकर्णी या चिमुरडीला स्वाईन फ्लूची लागण झाल्याने तिला मुंबईच्या कस्तुरबा हॉस्पिटलमध्ये उपचारासाठी दाखल करण्यात आले आहे. हे वृत्त शाळेत धडकताच सोमवारी पालकांनी शाळेला घेराव घालून शाळा बंद पाडली. मात्र, शाळेचे संस्थापक डॉ. विजय बेडेकर यांनी पालकांची समजूत घालताना, प्रणिता ही विद्यार्थिनी गेले नऊ दिवसांपासून शाळेत गैरहजर असल्याने नाहक चिंता करु नये असे सांगून १६ ऑगस्ट पर्यंत शाळा बंद ठेवणार असल्याचे नमूद केले.

दरम्यान, स्वाईन फ्लूच्या धास्तीने ठाण्यातील न्यू इंग्लिश स्कूल आणि कोपरीतील पिपल्स एज्यूकेशन सोसायटीच्या इंग्लिश माध्यमांची शाळाही आठवडाभर बंद ठेवून दक्षता घेणार असल्याने आतापर्यंत इतर शाळांबाबतही योग्य ती खबरदारी घेण्याचे आदेश देण्याचे सांगितले आहे.

स्वाईन फ्लूग्रस्त २२८ रूग्ण बरे झाले

Tue, 11 Aug 2009 11:24:01 +0530

राज्यात सोमवारी दुपारी बारा वाजेपर्यंतच्या माहितीनुसार इन्फ्ल्युएंझा ए (एच१एन१) (स्वाईन फ्लू) या आजाराने बाधित रुग्णांची आत्तापर्यंतची संख्या ३२७ असून त्यापैकी २२८ व्यक्ती औषधोपचारानंतर पूर्ण बर्‍या झाल्या असून त्यांना घरी सोडण्यात आले आहे. सध्या विविध रुग्णालयात १४० व्यक्ती दाखल असून त्यापैकी ९५ व्यक्ती बाधित आहेत. तर इतरांचे प्रयोगशाळेत तपासणीचे निष्कर्ष आप यावयाचे आहेत, अशी माहिती मुख्य सचिव जॉनी जोसेफ यांनी दिली.

मुंबईत मंत्रालयात आयोजित पत्रकार परिषदेत ते बोलत होते. यावेळी सार्वजनिक आरोग्य विभागाच्या अप्पर मुख्य सचिव शर्वरी गोखले, वैद्यकीय शिक्षण सचिव भूषण गगराणी, बृहन्मुंबई महानगरपालिकेच्या अतिरिक्त आयुक्त मनिषा म्हैसकर आदी उपस्थित होते.

या आजाराने आतापर्यंत राज्यात ४ व्यक्तींचा मृत्यू झाला असून मुंबईतील सध्याच्या सहा रुग्णालयांव्यतिरिक्त आणखी सहा ठिकाणी तपासणीची व्यवस्था करण्यात आली आहे, अशी माहिती देऊन मुख्य सचिव जोसेफ म्हणाले की, यामध्ये पार्ल्याचे कुपर रुग्णालय, सांताक्रुझचे व्ही.एन.देसाई रुग्णालय, मालाडचे एस.के. पाटील रुग्णालय, कुर्ल्याचे भाभा कुर्ला रुग्णालय, गोवंडीचे शताब्दी रुग्णालय आणि विक्रोळीचे कन्नमवार रुग्णालयांचा समावेश आहे. उद्यापासून (मंगळवार) या रुग्णालयात तपासणी सुरु होईल.

या आजारासंबंधीची माहिती देण्यासाठी हेल्पलाईन सुरु करण्यात आल्या असून मंत्रालयातील राज्यस्तरीय हेल्पलाईनचा दूरध्वनी क्रमांक २२०२६५७९ आहे, तर बृहन्मुंबई महानगरपालिकेच्या हेल्पलाईनचा नंबर २३०८३९०१ व ठाणे येथील हेल्पलाईनचा नंबर २५३४७७८५ (विस्तार १४५) असा आहे. नवी मुंबई व इतर ठिकाणी हेल्पलाईन मंगळवारपर्यंत सुरु होतील, अशी माहितीही त्यांनी यावेळी दिली.

गर्दीच्या ठिकाणी जाणे टाळावे- मुख्यमंत्री

Tue, 11 Aug 2009 11:18:00 +0530

नियमित आणि वेळेत केलेल्या औषधोपचाराने स्वाईन फ्लू हा आजार पूर्ण बरा होतो. त्यामुळे नागरिकांनी मनात भीती न बाळगता या आजाराबाबत दक्षता घ्यावी. तो संसर्गजन्य असल्याने सर्दी, ताप, खोकला आदी लक्षणे असणार्‍या व्यक्तींनी श्रीकृष्ण जन्माष्टमी, गणेशोत्सव तसेच रमजानच्या काळात गर्दीत जाण्याचे टाळावे, असे आवाहन मुख्यमंत्री अशोक चव्हाण यांनी केले आहे.

राज्यात स्वाईन फ्लू या आजाराची लागण काही नागरिकांना झाली आहे. आगामी काळात दहीहंडी, गणेशोत्सव आणि रमजान हे गर्दी होणारे सण आहेत. या पार्श्वभूमीवर सोमवारी मुख्यमंत्र्यांच्या अध्यक्षतेखाली सह्याद्री अतिथीगृहात विविध राजकीय पक्षांचे प्रतिनिधी, गणेशोत्सव मंडळ, गोविंदा पथकांच्या समन्वय समितीतील पदाधिकारी यांची बैठक आयोजित करण्यात आली होती. त्यावेळी मुख्यमंत्री बोलत होते.

या बैठकीस उपमुख्यमंत्री छगन भुजबळ, सार्वजनिक आरोग्यमंत्री डॉ. राजेंद्र शिंगणे, मुख्य सचिव जॉनी जोसेफ आदी राजकीय नेत्यांसह शासनाच्या विविध विभागांचे वरिष्ठ अधिकारी, गणेशोत्सव मंडळे तसेच गोविंदा पथकांच्या समन्वय समितीचे पदाधिकारी उपस्थित होते.

मुख्यमंत्र्यांनी स्वाईन फ्लूचा प्रादुर्भाव रोखण्यासाठी शासनाने केलेल्या उपाययोजनांची यावेळी माहिती दिली. शाळा तसेच महाविालये बंद ठेवण्याबाबतचा निर्णय घेण्याचे अधिकार सर्व जिल्हाधिकार्‍यांना देण्यात आल्याचे सांगून मुख्यमंत्री म्हणाले की, संबंधित जिल्हयाचे पालकमंत्री लक्ष घालून त्याबाबत सर्व संबंधित घटकांमध्ये समन्वय साधतील. सोमवारी सकाळपर्यंत प्राप्त झालेल्या माहितीनुसार राज्यात २७६ जणांना स्वाईन फ्लूची लागण झाली आहे. त्यापैकी १९४ व्यक्ती उपचारानंतर पूर्ण बर्‍या झाल्याने त्यांना घरी सोडण्यात आले आहे. तसेच संशयित म्हणून तपासणीसाठी आलेल्या मात्र या आजाराची लागण न झालेल्या अशा ८४९ व्यक्तींनाही घरी पाठविण्यात आले आहे.

सर्वपक्षीय आवाहन
आगामी काळात श्रीकृष्ण जन्माष्टमी (दहीहंडी), गणेशोत्सव आणि रमजान हे महत्त्वाचे धार्मिक उत्सव आहेत. त्यामुळे या सणांच्या निमित्ताने गर्दी होत असली तरी त्यांच्यावर निर्बंध घालू नयेत असे यावेळी सर्वानुमते ठरले. मात्र उत्सवाच्या कालावधीत नागरिकांनी त्यातही विशेषतः सर्दी, खोकला आणि तापाची लक्षणे असणार्‍यांनी गर्दीत जाऊ नये, असे सर्वपक्षीय आवाहन या बैठकीत करण्यात आले.

दहीहंडीची उंची आणि पारितोषिकांची रक्कम कमीत कमी ठेवावी तसेच दहीहंडीसाठी मानवी मनोरा उभारतांना पाण्याचा वापर करू नये, असे आवाहनही सर्वपक्षीय नेत्यांनी यावेळी केले. शासनामार्फत करण्यात येणार्‍या उपाययोजना आणि सर्व जनतेचे सहकार्य याद्वारे स्वाईन फ्लू या आजारावर मात करण्यात यश येईल, असा विश्वास यावेळी व्यक्त करण्यात आला.

स्वाइन फ्लू रोखण्यासाठी पुणे बंद !

Mon, 10 Aug 2009 15:15:14 +0530

स्वाइन फ्लूचा वाढता प्रसार रोखण्यासाठी आता पुणे संपूर्णतः बंद करण्याचा निर्णय घेण्यात आला आहे. याअंतर्गत शाळा, कॉलेजे, मल्टिप्लेक्स पुढच्या आठवडाभराकरीता बंद ठेवण्याचा आदेश देण्यात आला आहे. चित्रपटगृहेही तीन दिवस बंद रहातील.

जिल्हा प्रशासनाने लोकांना घरीच रहाण्याचा सल्ला दिला असून विशेषतः जे आजारी आहेत त्यांनी तर गर्दीच्या ठिकाणी जाऊच नये असे सांगितले आहे. पुण्याचे पालकमंत्री अजितदादा पवार यांनी पत्रकार परिषदेत ही माहिती दिली. या सुटीचा फायदा घेऊन पिकनिक वा एकत्र येण्याचे अन्य कार्यक्रम करू नयेत. असेही ते म्हणाले. मॉलही बंद ठेवण्याचा सल्ला दिला जात असला तरी सध्या ते शक्य नाही, म्हणून मल्टिप्लेक्स बंद ठेवण्यात येणार असल्याचे ते म्हणाले.

पुण्यात स्वाइन फ्ल्यूचा प्रसार अद्यापही थांबण्याची चिन्हे दिसत नाहीत. एकट्या रविवारी स्वाइन फ्लूचे ४२ रूग्ण शहरात सापडले. २८० रूग्णांची सरकारी रूग्णालयात तपासणी करण्यात आली. त्यातल्या ४२ जणांना स्वाइन फ्लू झाल्याचे निष्पन्न झाले.

सरकारने प्रतिबंधात्मक उपाय योजूनही हा रोग आटोक्यात आलेला नाही. रिदा शेखनंतर बाबासाहेब माने या डॉक्टरचाही या रोगाने मृत्यू झाल्यामुळे या रोगाला आळा घालण्यासाठी हे कठोर उपाय योजण्यात आले आहेत.

सध्या पुण्यात स्वाइन फ्ल्यूचे सहा रूग्ण असून त्यातचे चार व्हेंटिलेटरवर आहेत तर दोघांना कोणत्याही क्षणी डिसचार्ज दिला जाण्याची शक्यता आहे. या सर्वांना ससून रूग्णालायात दाखल करण्यात आले आहे. दरम्यान, स्वाइन फ्लूच्या संशयित रूग्णांना टॅमिफ्ल्यू गोळ्या द्याव्यात असे आदेश देण्यात आले आहेत.

आज डॉ. माने यांच्या मृत्यूनंतर त्यांच्यावरील उपचारात हॉस्पिटलने दिरंगाई केली असा आरोप त्यांचे काका सोमनाथ जाधव यांनी केला आहे. स्वाइन फ्ल्यूची चाचणी उशिरा करण्यात आली आणि त्यामुळे उपचारातही दिरंगाई झाली असे त्यांचे म्हणणे आहे.

देशात स्‍वाइन फ्लूचा सहावा बळी

Mon, 10 Aug 2009 11:03:47 +0530

देशात स्वाईन फ्ल्यू या घातक संसर्गजन्य रोगाने थैमान घातले असून रविवारी पुणे येथे एका डॉक्टरचा स्वाइन फ्ल्यूमुळे मृत्यू झाला आहे. तर तामीळनाडूतील चेन्नई येथे एका चार वर्षीय मुलाचा या आजाराने मृत्यू झाल्‍याने देशात आतापर्यंत सहा जणांचा बळी गेला आहे. मृतांमध्‍ये पुण्यातील तीन, अहमदाबाद, चेन्‍नई व मुंबईतील प्रत्येकी एका जणाचा समावेश आहे.

रविवारी पुण्‍यातील ससून हॉ‍स्पिटलमध्ये डॉ. बाबासाहेब माने या आयुर्वेदीक तज्‍ज्ञाचा या आजाराने मृत्यु झाला आहे. याआधी शिक्षक तुकाराम कोकरे (वय 42) यांचा शुक्रवारी मृत्यु झाला होता. तर पहिल्‍यांदा 3 ऑगस्टला 14 वर्षीय विद्यार्थिनी रिदा शेख हीचा स्वाइन फ्ल्यूने बळी घेतला होता.

स्वाइन फ्ल्यूवर नियंत्रण मिळविण्यासाठी सरकारची तारेवरील कसरत सुरू आहे. स्वाइन फ्ल्यूसंदर्भात नागरिकांना पडलेले प्रश्न अजून तरी निरुत्तरीतच आहे.

आतापर्यंत देशात 800 पेक्षा जास्त लोकांना स्वाइन फ्लू झाल्‍याचे सिध्‍द झाले असून आतापर्यंत 523 जणांना रुग्णालयातून सूटी देण्‍यात आली आहे.

दिल्लीतून तज्‍ज्ञांची एक टीम पुण्‍याकडे रवाना झाली असून तेथे या आजाराच्‍या रुग्णावर उपचारासाठी जोरदार प्रयत्‍न सुरू आहेत.

पुण्यात आठ शाळा बंद-
स्वाइन फल्यूचा वाढता कहल पाहता पुण्यातील आठ विनाअनुदानित शाळा बंद ठेवण्याचा निर्णय त्या त्या व्यवस्थापनाने घेतला आहे.

शाळा बंदचे अधिकार जिल्हाधिकार्‍यांना!

Mon, 10 Aug 2009 11:01:21 +0530

राज्यात वेगाने पसरत असलेल्या 'स्वाईन फ्लू'मुळे निर्माण झालेल्या परिस्थितीचा आढावा घेण्यासाठी आणि आजाराचा प्रसार रोखण्यासाठी मुख्यमंत्र्यांच्या अध्यक्षतेखाली आरोग्य विभाग आणि वैद्यकीय अधिकार्‍यांच्या आज मुंबईत पार पडलेल्या बैठकीत शाळा किंवा महाविद्यालयात 'स्वाईन फ्लू'मुळे कोणी आजारी पडल्यास संबंधित शाळा अथवा महाविद्यालय बंद ठेवण्याचा अधिकार जिल्हाधिकार्‍यांकडे देण्याचा निर्णय घेण्यात आला.

मुख्य सचिवांच्या अध्यक्षतेखाली एक कोअर ग्रुप स्थापन करून राज्यातील 'स्वाईन फ्लू'च्या परिस्थितीवर लक्ष ठेवण्याचा निर्णयदेखील बैठकीत झाला. खासगी हॉस्पिटल आणि क्लिनिक यांना 'स्वाईन फ्लू'च्या रुग्णांवर उपचार करण्याचे अधिकार देण्यासाठी आगामी दोन दिवसांत निर्णय घ्यायचा, असेही बैठकीत ठरवण्यात आले.

त्यासाठी लवकरच खासगी हॉस्पिटलच्या प्रतिनिधींशी सरकार चर्चा करणार असल्याची माहिती मुख्यमंत्र्यांनी दिली.
गर्दीच्या ठिकाणी संसर्गजन्य आजाराने ग्रस्त असलेल्यांनी जाऊ नये, प्रामुख्याने दहीहंडी आणि गणेशोत्सवासारख्या उत्सवापासून लांब राहावे यासाठी मुख्यमंत्र्यांनी नागरिकांना आवाहन केले.

सोमवारी दहीहंडी आणि गणेशोत्सव मंडळांशी चर्चा करणार असल्याचेही ते म्हणाले. स्वाइन फ्लूवर उपचार करण्यासाठी पुरेशी तयारी करण्यात आली आहे.

स्वाइन फ्लूवर मुख्यमंत्री म्हणतात, की...

Sat, 08 Aug 2009 19:10:46 +0530

इनफ्ल्यूएन्झा ए (एच १ एन १) वर उपचार सुरू असताना पुण्यात एका शाळकरी मुलीचा दुर्देवी मृत्यु झाला आणि पुणे परिसरात घबराटीचं वातावरण पसरलं. विशेषत: पालकांनी चिंतातूर होऊन रुग्णालयांमध्ये धाव घेतली. मुंबईमध्येही लोकांनी या आजाराचा धसका घेतला. या रोगाचा फैलाव भारतात वाढत असून गेल्या काही महिन्यांपासून राष्ट्रीय व आंतरराष्ट्रीय विमानतळांवर प्रवाशांची वैद्यकीय तपासणी करण्यात येत आहे. या निमित्तानं मी राज्यातील नागरिकांना हे सांगू इच्छितो की, शासनातर्फे आवश्यक काळजी घेण्यात येत असून त्यासाठीच्या सर्व उपाययोजना करण्यात आल्या आहेत.

PTI

सरकारी रुग्णालयांमध्ये वाढती गर्दी पाहून खाजगी दवाखान्यांना इनफ्ल्यूएन्झा ए (एच १ एन १) ची तपासणी करण्यासाठी परवानगी देण्याची माहिती आम्ही घेत आहोत. मुंबई-पुणे या शहरात पालिकांना दक्षतेचा इशारा देण्यात आला असून दोन्ही ठिकाणी जास्तीत जास्त तपासणी केंद्रे उघडण्यात येत आहेत. BMC च्या रुग्णालयात Isolation Wards सुरू करण्यात येत आहेत. लोकांनी panic होऊ नये म्हणून योग्य रितीने वस्तुस्थितीची माहिती देणं सर्वात महत्वाचं आहे. यादृष्टीनं मी आरोग्य विभागाला स्पष्ट सूचना दिल्या आहेत. रोजच्या रोज यासंदर्भात घेण्यात येणार्‍या उपाययोजनांची माहिती, रूग्णालयांची माहिती जनतेला कळली तर, भीतीचं वातावरण कमी होऊन या रोगाचा व्यवस्थित मुकाबला करता येणं शक्य होईल.

काही दिवसांपूर्वीच आम्ही पुणे, सातारा जिल्ह्यात साथरोग कायदा लागू केला आहे. सातारा जिल्ह्यात पाचगणीसह इतर तीन ठिकाणी Control Rooms सुरू करण्यात आल्या असून सातारा जिल्हा रूग्णालयातही Isolation Ward उभारण्यात आला आहे. पुणे-मुंबई ये-जा करणार्‍या प्रवाशांची संख्या मोठी आहे. त्यासाठी रेल्वे, एस.टी., टॅक्सीजच्या माध्यमातून या रोगाची माहिती देणं आवश्यक आहे. ती पाऊलेही आम्ही उचलली आहेत.

यापूर्वी रोगाच्या निदानासाठी लाळेचे नमुने पुण्याला National Institute of Virology मध्ये पाठवावे लागत. आता मुंबईला Haffkine Institute मध्येही ते तपासण्याची सोय केली आहे. पालिकेला तज्ज्ञ डॉक्टरांची नियुक्ती करण्याच्या सूचनाही आम्ही दिल्या आहेत. या रोगाची लक्षणे सर्वसामान्य flu सारखी असल्याने flu झालेल्या व्यक्तीही आपापल्या डॉक्टर्सकडे धाव घेत असल्याचं चित्र दिसतंय. WHO च्या एका प्रतिनिधीने सांगितल्याप्रमाणे, जागतिक पातळीवर सर्वसामान्यरित्या रूग्णांमध्ये याचा संसर्ग मध्यम स्वरूपाचा (Mild) आढळला आहे. तीव्र स्वरूपाची लक्षणे असलेल्या आणि वारंवार ताप येणार्‍या रूग्णांनाच रूग्णालयांमध्ये विशेष Antiviral Treatment घेण्याची गरज असते. साहजिकच रूग्ण आणि त्यांच्या नातेवाईकांना डॉक्टरांकडून योग्य सल्ला मिळणं गरजेचं आहे.

या परिस्थितीत सर्वांनी एकत्र येऊन एकमेकांच्या समन्वयानं काम करण्याची गरज आहे. हा आरोग्याशी निगडित प्रश्न असल्यानं Medical profession मधील प्रत्येकानं कुठलाही हलगर्जीपणा न करता जबाबदारीनं काम करणं आवश्यक आहे, असं मला वाटतं.

सावधान! महाराष्ट्रात जाऊ नका!

Sat, 08 Aug 2009 18:45:13 +0530

स्वाइन फ्लूच्या भीतीने इतर राज्यातील नागरिक आता महाराष्ट्रात येण्यास घाबरत असून अनेक राज्यांनीही आपल्या नागरिकांना महाराष्ट्रात जाऊ नये असे सुचविले आहे. शिवाय महाराष्ट्रातून येणार्‍या प्रवाशांची तपासणीही करण्यात येत आहे.

तमिळनाडू सरकारने आपल्या नागरिकांना महाराष्ट्रात जाऊ नये असा सल्ला दिला आहे. तसेच महाराष्ट्रातून येणार्‍या गाड्यांतून उतरणार्‍या प्रवाशांची तपासणी केली जात आहे. राजस्थाननेही मुंबई व पुण्याहून येणार्‍या प्रवाशांच्या तपासणीचे आदेश दिले आहेत. राज्य सरकारांनी परस्पर अशी तपासणी सुरू केल्याचा केंद्रीय आरोग्य मंत्रालयाला मात्र पत्ताच नाहीये.

इंदूर आणि पुणे यांत नेहमीचा संपर्क आहे. रोज इंदूरहून दहाहून ट्रॅव्हल्सच्या बस पुण्यासाठी जातात. तेवढ्याच येतातही. शिवाय रेल्वेगाडीही आहे. पण इंदूरला येणार्‍या प्रवाशांची तपासणी केली जात नाही. त्यामुळे इथेही आता प्रवाशांची तपासणी व्हावी अशी मागणी केली जात आहे. मध्य प्रदेशात सध्या तरी कुणालाही स्वाइन फ्लूची लागण झाल्याचे दृष्टोत्पत्तीस आलेले नाही. मात्र, तसे झाल्यास आरोग्य विभागातर्फे पूर्ण तयारी करण्यात आली आहे.

स्वाइन फ्लूचे दिवसभरात ९६ नवे रूग्ण

Sat, 08 Aug 2009 18:45:00 +0530

PTI

केंद्रीय आरोग्यमंत्र्यांनी घाबरू नये असे आवाहन केले असले तरी स्वाइन फ्लूची भीती हटता हटेना, अशी स्थिती आहे. शिवाय रोज नवनवीन रूग्ण दाखल होण्याची प्रक्रियाही थांबलेली नाही. देशभरातून स्वाइन फ्लूचे रूग्ण सापडत असून आज आतापर्यंतच्या दिवसांत देशभरातून ९६ संशयित रूग्ण सापडले आहेत. एका दिवसात इतक्या मोठ्या प्रमाणावर रूग्ण सापडण्याची ही पहिलीच वेळ आहे.

स्वाइन फ्लू आता गुजरातकडे वळला आहे. एका अनिवासी दाम्पत्यामध्ये एच १ एन १ विषाणूची लागण झाल्याचे स्पष्ट झाल्यानंतर त्यांना अहमदाबादच्या शासकीय रूग्णालयात दाखल करण्यात आले आहे. या दोघांची प्रकृती गंभीर पण स्थिर आहे. हे दाम्पत्य नुकतेच अमेरिकेहून परतले होते. या दोन नव्या रूग्णांमुळे गुजरातमध्ये स्वाइन फ्लूग्रस्तांची संक्या १० वर पोहोचली आहे.

दरम्यान, या रोगाचे मुख्य केंद्र बनलेल्या पुण्यात एका अल्पवयीन मुलीसह आणखी सहा नवे रूग्ण सरकारी रूग्णालयात दाखल करण्यात आले आहे. या सगळ्यांची प्रकृती गंभीर आहे.

चंडिगडमध्ये एका २९ वर्षीय इंजिनयरला स्वाइन फ्लूची लागण झाल्याचे स्पष्ट झाल्यानंतर रूग्णालयात दाखल केले आहे. हा रूग्ण मित्राबरोबर कॅनडाला गेला होता. त्याच्या मित्रालाही स्वाइन फ्लू झाल्याचे स्पष्ट झाल्यानंतर त्याला दिल्लीत एडमिट करण्यात आले. चंडिगडमध्ये आतापर्यंत ४४ जणांना स्वाइन फ्लूची लागण झाली आहे.

स्वाइन फ्ल्यूसाठी टॅमिफल्यूच्या २ लाख गोळया

Sat, 08 Aug 2009 18:17:20 +0530

राज्यात विशेषत : पुणे शहरात स्वाईन फल्यूच्या तीव्र संसर्गाने, केंद्र सरकारने तातडीची योजना आखली असून या तापाच्या रुग्णांसाठी टॅमिफल्यूच्या सुमारे २ लाख गोळया मुंबईकडे रवाना केल्या आहेत. पुणे व मुंबईसाठी प्रत्येकी एक लाख गोळया दिल्या जातील.

जीटी, सेंट जॉर्ज, भगवती, राजवाडी, भाभा या रुग्णालयांमध्ये स्वाईन फल्यूच्या उपचारांसाठी स्वतंत्र व्यवस्था नव्याने करण्यात आली आहे. सुरुवातीपासूनच कस्तुरबा रुग्णालयात संबंधित उपचाराची व्यवस्था आहे. मुंबईत १६ जणांना तर पुण्यात ४० रुग्णांना एका दिवसात लागण झाली. यामध्ये चार नवीन शाळातील विार्थ्यांचा समावेश आहे.

पुण्यामध्ये सर्वाधिक रुग्ण असून राज्यातील २०४ पैकी १३३ रुग्णांना पाच दिवसानंतर घरी पाठवण्यात आले. दरम्यान, स्वाईन फल्यूची बाधा शालेय विार्थ्यांनाच झाल्याचे स्पष्ट झाल्यामुळे पुण्यातील पालकांनी मुलांना शाळेत न पाठवल्याने विार्थी संख्या राोडावली, तर २० मोठया शाळा बंद असल्याचे चित्र आहे.

स्वाइन फ्लूच्या तीन रूग्णांची मृत्यूशी झुंज

Sat, 08 Aug 2009 12:06:35 +0530

स्वाइन फ्लू झाल्याची शंका असलेल्या पुण्यातील सहा वर्षाच्या मुलीला येथील सरकारी हॉस्पिटलमध्ये दाखल करण्यात आले आहे. तिची प्रकृती गंभीर असली तरी स्थिर असल्याची समजते. याशिवाय स्वाइन फ्लूची लागण झालेला एक डॉक्टर आणि फार्मासिस्ट मृत्यूशी झुंज देत आहेत.

सरकारी दवाखान्यात दाखल केलेल्या मुलीला सुरवातीला खासगी दवाखान्यात दाखल केले गेले होते. मात्र, तेथून काल रात्री सरकारी दवाखान्यात नेण्यात आले. तिची प्रकृती स्थिर असून तिला व्हेंटिलेटरवर ठेवण्यात आलेले नाही, असे डॉक्टरांनी सांगितले.

स्वाइन फ्लूचा संशय असणार्‍या दोन रूग्णांच्या चाचण्यांचा अहवाल अद्याप आलेला नाही.

दरम्यान, स्वाइन फ्लूच्या भीतीने पुणे कॅंटोन्मेंट बोर्डाच्या दहा शाळांना सुटी देण्यात आली आहेत. शिवाय अनेक कॉलेजेसमध्येही स्वाइन फ्लूग्रस्त आढळल्याने भीतीचे वातावरण आहे.

ताप 'स्वाइन फ्लू'चा !

Fri, 07 Aug 2009 13:49:05 +0530

PTI

'स्वाइन फ्लू'ची दहशत देशभरात पसरली आहे. पण 'चिंता विश्वाची वाहणार्‍या पुण्यनगरीत' या फ्लूचा अंमल अंमळ जरा जास्तच चढलाय. एरवी कोणताच ज्वर अंगी भिनू न देता निरपेक्ष बुद्धीने सगळ्यांकडे पाहणार्‍या पुणेकरावर हा 'वराह ज्वरा' मात्र चांगलाच चढलाय. त्यामुळेच की काय चिकित्सक पुणेकर या रोगाचा संशय जरी आला तरी डॉक्टरकडे पळतोय. त्याच्या या भीतीचा डॉक्टरांना चांगलाच 'ताप' झालाय. पण एकूणतः या सगळ्या घडामोडींमुळे पुण्यनगरीत अनेक किस्से जन्माला आले आहेत. त्यातलेच काही खास आपल्यासाठी. आणि हो आपल्याकडेही काही किस्से, अनुभव असल्यास खाली लिहायला विसरू नका.
*
स्वाईन फ्लूला मराठीत काय म्हणतात?
'काही नाही. स्वाईन फ्लूच'.
'नाही रे'.
स्वाईन म्हणजे काय?
'डुक्कर'
मग?
फ्लू म्हणजे?
ताप
मग 'स्वाइन फ्लू' म्हणजे 'डुक्कर ताप'.

* पुण्यातल्या पाट्या जगप्रसिद्ध. स्वाईन फ्लूनंतर लागलेली ताजी पाटी वाचा. अर्थातच डॉक्टरच्या दवाखान्याची.

' कृपया ताप असेल तर तो स्वाईन फ्लू असेल असे समजू नका. समज असलाच तर डॉक्टरांनी तपासणी केल्यानंतर त्यांनी दिलेला इलाज मान्य करा. डॉक्टरांकडे रक्त तपासणीचा हट्ट धरू नका. ते डॉक्टर आहेत. त्यांना समजते. हा रोग कशाने होतो याची चौकशी डॉक्टरकडे करून त्यांचा वेळ वाया
घालवू नका. पेपर, टीव्ही, अथवा रुग्णालयाबाहेर लावलेला फलक वाचा.'

(वेबदुनियाच्या 'पुण्या'तील वाचकाने कळवलेला हा किस्सा नक्की खरा असावा या खात्रीने छापला आहे!)* मिसळवाल्याकडील पाटी.
'आपण स्वच्छता पाळता आणि हातही स्वच्छ धूता असे आम्ही समजतो. फक्त हात धुण्यासाठी साबण मागू नका.'

* एकाला गेल्या काही दिवसांपासून सर्दी आणि खोकल्याचा त्रास होतोय. संशय आल्याने त्याने कंपनीतील वरिष्ठांना माहिती दिली. वरिष्ठांनी तातडीने सात दिवसाची सुटी देऊन टाकली. अवघ्या काही मिनिटांमध्ये अँम्बुलन्स आली नि त्याला रुग्णालयात नेले. पण याचा फायदा घेऊन इतर अनेकांमध्ये म्हणेज स्वाइन फ्लूची लक्षणे दिसू लागली आहेत. एरवी सुटी न देणारा बॉस स्वाइन फ्लू म्हटला की धास्तावून जाऊन सुटी मंजूर करतोय. हे बेट मात्र मस्तपैकी ही सुटी एंजॉय करताहेत. सबब पुण्यातली अनेक ऑफिसेस सध्या ओस पडली आहेत.

* अनेक वर्तमानपत्रांना सुरवातीला या स्वाइन फ्लूचे काय करायचे ते कळलेच नाही. म्हणजे त्याचे भाषांतर वगैरे. लोकमताची दखल घेणार्‍या एका पेपरने त्याला 'वराह ज्वर' असे नाव दिले. काहींनी त्याला 'डुक्कर ताप' असे संबोधले. ग्रामीण भागात जास्त वाचक असलेल्यांनी 'डुकर्‍या ताप' असे म्हटले. डुक्कर फ्लू, डुकर्‍या, वराह फ्लू ही आणखी काही याच रांगेतली नावं.

* पुण्यात मुलींनी दुचाकीवरून जाताना अतिरेक्यांसारखा 'मास्क' घालावा असा अघोषित कायदा आहे, असे म्हणतात. परंतु, सध्या स्वाइन फ्लूमुळे असाच मास्क चढवून पुरूषमंडळीही 'तेच' सुख अनुभवताहेत. यात मजा आहे ती प्रेमी युगलांची. असा मास्क घालून ही मंडळी पुण्यनगरीत बिनधास्त फिरत आहेत. मास्क चढविल्याने या 'चेहर्‍याआड दडलंय काय?' हे कळतंच नाही.

* आमच्याकडे काही किस्से असे होते. आपल्याकडेही असेच किस्से असतील तर आम्हालाही ते पाठवा आम्ही ते वेबदुनियावर प्रकाशित करू.

मास्क घालून फोडणार दहीहंडी

Fri, 07 Aug 2009 12:58:41 +0530

पुण्यात शुक्रवारीही स्वाईन फ्लूचे आणखी 17 पेशंट सापडल्यानंतर आता 14 तारखेला होणाऱ्या दहीहंडीवरही त्याचे सावट पसरले असून, दहीहंडी फोडणाऱ्या मुलांच्या पालकांनी त्यांना मास्क देऊन या कार्यक्रमात सहभागी होण्यासाठी परवानगी दिली आहे.

पुणे आणि मुंबईमध्ये दहीहंडीची मोठी धूम असते. अशा काळात स्वाईन फ्लू पसरण्याची दाट शक्यता असल्याने अनेक दहीहंडी मंडळही चिंतेत आहेत. काही मंडळांनी तर आपल्या कार्यकर्तांसह दहीहंडी पाहायला आलेल्यांनाही मास्क देण्याची तयारी सुरू केली असून, पुण्यात पाहता-पाहता मास्कची विक्री दुपटीने वाढली आहे.

दहीहंडीला अवघे काही दिवसच शिल्लक असल्याने आणि शाळांमध्ये फ्लूची दहशत असल्याने दहीहंडीचा कार्यक्रम घ्यावा अथवा नाही या संभ्रमात शाळा दिसून येत आहेत.

स्‍वाइन फ्लूः प्रयोगशाळेतील चुकीचा परिणाम

Fri, 07 Aug 2009 12:54:36 +0530

प्रयोगशाळेतील शोधा दरम्‍यान झालेल्‍या चुकीचा परिणाम म्हणजे 'स्‍वाइन फ्लू' असल्‍याचा दावा एका ऑस्ट्रेलियन संशोधकाने केला आहे. या शास्‍त्रज्ञाच्‍या मतानुसार स्‍वाइन फ्लूचा व्‍हायरस 'एच1एन1' प्रयोगादरम्‍यान झालेल्‍या अपघाताचा परिणाम असण्‍याची दाट शक्यता आहे.

'ऑस्ट्रेलियन नॅशनल युनिव्‍हर्सिटी'चे शास्‍त्रज्ञ एड्रियान गिब्स यांनी दिलेल्‍या माहितीनुसार अंड्यापासून एक नवीन व्‍हायरस बनविण्‍याचा आणि त्‍याच्‍या मदतीने लस शोधून काढण्‍यासाठी शास्‍त्रज्ञांचा प्रयत्‍न चालला असताना झालेल्‍या चुकीतून या रोगाचा व्‍हायरस तयार झाल्‍याची शक्यता अधिक आहे.

गिब्स यांच्‍या मदतीनेच 'टॅमीफ्लू' हे स्‍वाइन फ्लू वरील औषध बनविले गेले आहे. आपले म्हणणे आपण सिध्‍द करू शकतो असा दावाही गिब्‍ज यांनी केला आहे.

पुण्याच्‍या गणेशोत्सवावर स्‍वाइन फ्लूचे सावट!

Fri, 07 Aug 2009 12:19:18 +0530

'स्वाइन फ्लू' पुणे शहरासाठी डोकेदुखी ठरला असून या आजाराची व्‍याप्‍ती वाढत चालल्‍याने शासनासमोर मोठा प्रश्‍न उभा राहिला आहे. पुण्‍यातील गणेशोत्सव अवघ्‍या काही दिवसांवर गणेशोत्सव येऊन ठेपल्‍याच्‍या पार्श्‍वभूमीवर स्‍वाइन फ्लूचा वाढता प्रभाव पाहता प्रशासनासमोर या आजारावर नियंत्रणासाठी मोठे आव्‍हान उभे राहिले आहे. या काळात पुण्‍यात सर्वाधिक गर्दी असते. त्‍यामुळे आजाराचा फैलाव वाढण्‍याची भीती व्‍यक्त केली जात आहे.

पुणे शहर हे उत्सवांचे महोत्सवांचे शहर. त्यामुळे दहीहंडी, गणेशोत्सवात पुण्यात लाखोंच्या संख्येने बाहेर गावच्या व्यक्ती येतात. त्यामुळे गर्दीच्या ठिकाणी या आजाराचा संसर्ग होणार अशी पाल प्रत्येकाच्या मनात चुकचुकत आहे. दरम्यान तज्ज्ञांनी गणेश मंडळांना योग्य खबरदारी घ्यावयाचे आवाहन केले आहे. तसेच हा आजार बरा होणारा आहे याबाबत नागरिकांमध्येही जनजागृती करावी असे आवाहनही गणेश मंडळांच्या कार्यकर्त्यांना केले आहे.

मे, २००९ मध्ये स्वाइन फ्लू या आजाराची चर्चा मोठया प्रमाणात सर्वत्र सुरु झाली. पहिल्या काही दिवसांमध्ये परदेशी नागरिकांची तपासणी करण्यासाठी विमानतळांवर, बंदरांवर तपासणी कक्ष उभे राहिले. काही ठिकाणी हे रुग्ण आढळलेही. पण त्यांना योग्य उपचारामुळे दिलासा मिळाला. टॅम्बी फ्लू या औषधी शासनाने सर्वत्र मुबलक प्रमाणात उपलब्ध करुन दिल्या. या दरम्यान पुणे शहरात या आजाराने डोके वर काढले. जुलैच्या पहिल्या आठवडयापासून शहरात एक दोन दिवसाआड स्वाइन फ्लूचे रुग्ण आढळून येऊ लागले.

विशेष म्हणजे या आजाराचा संसर्ग झाला तो शाळकरी मुलांना. त्यामुळे एकापाठोपाठ एक अशा सात आठ शाळाही पुण्यात काही काळासाठी बंद झाल्या. दुसरीकडे महाराष्ट्र शासन, पुणे महापालिका आरोग्य विभागाने जाहिरांतीव्दारे हा आजार बरा होणारा आहे हे सांगण्याचा मोठा प्रयत्न केला. तो कसा होतो, त्याची लक्षणे काय, आजार झाल्यास काय करावे, त्यावर कोणती औषधी घ्यावी आदींची माहिती जनतेपर्यंत पोहचविली.

योग्य निदान न झाल्यानेच रिदाचा मृत्यू- आझाद

Fri, 07 Aug 2009 12:06:43 +0530

प्रसार माध्यमांनी स्वाईन फ्ल्यू संदर्भातील घटनांचे वृत्तांकन करताना संयम दाखविणे गरजेचे आहे असे केंद्रीय आरोग्यमंत्री गुलाम नबी आझाद यांनी स्पष्ट केले. देशात स्वाईन फ्ल्यू ने घातलेल्या थैमानाच्या पार्श्वभूमीवर, दिल्ली आकाशवाणीला दिलेल्या एका विशेष मुलाखतीत ते बोलत होते.

पुण्यातील रिदा शेख या शाळकरी मुलीचा स्वाईन फ्ल्यूने नुकत्याच झालेल्या मृत्यूबाबत शोक व्यक्त करताना आझाद यांनी रूग्णालयाला तिच्या आजाराचे योग्य निदान न करता आल्यामुळेच तिचा मृत्यू झाल्याचे सांगितले. मात्र सध्याच्या परिस्थितीत प्रसारमाध्यमांनी सबसे तेज वृत्त देण्याच्या नादात देशभरात भीतीचे वातावरण पसरविण्यास हातभार लावू नये असेही आवाहन केले.

सध्या जगभरातील बहुतांशी देशांना भेडसावणार्‍या स्वाईन फ्ल्यू या रोगावर नियंत्रण मिळविण्यासाठी सरकारने बहुआयामी कार्यपद्धतीची योजल्याची माहिती आझाद यांनी दिली. त्यात संशयीत रूग्णांची कसून तपासणी करणे, स्वाईन फ्ल्यू च्या निदानासाठी आवश्यक सुविधा निर्माण करणे, एच १ - एन १ चे विषाणू शरीरात आढळून आलेल्या रूग्णांवर योग्य ते उपचार करणे आदी उपायांचा समावेश आहे. संशयित रूग्णाच्या आजाराचे योग्य निदान करण्यासाठी देशात आणखी दोन प्रयोगशाळा सुरू करण्यात येणार असून, त्यामुळे देशभरातील अश्या प्रयोगशाळांची एकूण संख्या आता ४० होईल अशी माहितीही आझाद यांनी सांगितली.

देशभरात आत्तापर्यंत स्वाईन फ्ल्यू चे लक्षण आढळून आलेल्या ५९६ रूग्णांपैकी ४८२ जणांवर योग्य उपचार करून त्यांना त्यांच्या घरी पाठविण्यात आले आहे. तर उर्वरीत रूग्णांच्या तब्येतीत झपाट्याने सुधारणा होत असून त्यांनाही लवकरच इस्पितळातून घरी सोडण्यात येईल असे आझाद यांनी एका प्रश्नाच्या उत्तरात सांगितले.

या आजाराला आटोक्यात आणण्यासाठी सरकारी यंत्रंणा तत्परतेने कार्य करत असून या कार्यात यशही येत असल्याचे आझाद यांनी सांगितले. देशात हा आजार आटोक्यात आणण्यासाठी पुरेसा औषध साठाही उपलब्ध आहे. या आजारावर मात करण्यासाठी डॉक्टरांनी व पॅरामेडिकलच्या अधिकार्‍यांनी कौतुकास्पद कामगिरी केल्याचे सांगत आझाद यांनी त्यांचा गौरव केला.

मुंबईत स्वाईन फ्लूचे ५ रुग्ण सापडले

Fri, 07 Aug 2009 12:06:12 +0530

स्वाईन फ्लूचा देशातील पहिला बळी पुण्यातील शाळकरी मुलगी ठरल्यानंतर आता या रोगाची लागण मुंबईत पाच जणांना झाली आहे. यासाठी महानगर पालिका खडबडून जागी झली आहे. स्वाईन फ्लू विषयी तीव्र चिंता आज पालिका सभागृहात व्यक्त करण्यात आली. मुंबईत स्वाईन फ्लूची चाचणी परळ, हाफकीन इन्स्टिटयूटमध्ये केली जाणार असून त्याचा रिपोर्ट २४ तासात मिळणार आहे, अशी माहिती पालिका अतिरिक्त आयुक्त मनिषा म्हैसकर यांनी दिली.

स्वाईन फ्लूच्या रुग्णांसाठी कस्तूरबा रुग्णालयात १०० बेडची व्यवस्था करण्यात आली आहे. यासंदर्भात खाजगी रुग्णालयांशी चर्चा सुरु असल्याचे म्हैसकर यांनी सांगितले. काल १९ रुग्णांना स्वाईन फ्लू असल्याचा प्राथमिक अंदाज होता. त्यातील पाच जणांना स्वाईन फ्लू झाल्याचे निश्चित झाले असून १४ जणांचा रिपोर्ट अजून येणे बाकी असल्याचे त्या म्हणाल्या . मात्र या १४ रुग्णांची प्रकृती उत्तम असल्याचे त्यांनी सांगितले.
प्रत्येक विभागात डॉक्टर आणि आरोग्य सेवकांचे पथक तैनात ठेवण्यात येईल. शाळा परिसरात देखील खबरदारीचे उपाय केले जातील असेही म्हैसकर यांनी सांगितले.