व्हॅलेंटाईन डे

प्रीतीचा हा खेळ न्यारा

Thu, 14 Feb 2008 15:46:53 +0530

'व्हॅलेंटाईन डे'च्या निमित्ताने वेबदुनियातर्फे प्रेमीजनांना एक आगळी वेगळी संधी उपलब्ध करून देण्यात येत आहे. ऑनलाईन 'प्रीतीचा खेळ' खेळताना प्रेमीजनांना लव्ह मीटरच्या माध्यमातून आपल्या प्रेमाची खोली मोजता येईल. तर दुधारी असलेल्या प्रीतीच्या तुमच्या सुरीची धार किती हेही ओळखता येणार आहे. आणि आपली प्रेयसी किंवा प्रियकर आपल्याबरोबर नसल्यास आजूबाजूला कुणी नाही असं पाहून त्याचं किंवा तिचं छानसं चुंबनही घेता येईल. मग बघताय काय पटकन खालच्या लिंकवर क्लिक करा.

'जवळ ये लाजू नको' असं तुम्हाला वाटतंय. पण तुमचा जोडीदार तुमच्याजवळ नाहीये. ठीक आहे काही काळजी करू नका. आता असं समजा की तुमचा जोडीदार तुम्हाला एक छानसं चुंबन देतोय ....कल्पनेनेच मस्त वाटलं ना? मग आम्ही आपल्याला हा अनुभव 'व्हर्च्युअली' देतोय. हा 'व्हर्च्युअल किस' कसा वाटतोय बघा जरा.
'किस' बाई 'किस'

तुम्ही प्रेमात आकंठ बुडालेले आहात काय? मग तुमच्या प्रेमाची खोली किती ते जरा इथे पहा बघू.
लव्ह मीटर

'प्रीती सुरी दुधारी' असं म्हटलं जातं. म्हणजे प्रीतीला दोन्ही बाजूंनी धार असते. आता बघूया तुमच्या सुरीला किती धार आहे ते?
प्रीती सुरी दुधारी

रंगीबिरंगी व्हॅलेंटाईन डे साजरा करा

Thu, 14 Feb 2008 14:49:42 +0530

प्रियकर-प्रेयसीसाठी तसा प्रत्येकच दिवस प्रेमाचाच असतो. पण तरी देखील व्हॅलेंटाईन डेचे एक वेगळे महत्त्व आहे. आपल्या जोडीदाराला या दिवशी फूल दिले तर मग काय बहार येते. प्रेमाची आठवण म्हणून या दिवशी फूल दिले जाते. फुले मन जोडतात. म्हणून तर एखाद्या रूग्णालाही भेटण्यासाठी जाताना फूलच का देतात? फुल देण्यामागचा अर्थ काय? यातून काय संदेश मिळतो? हे जाणून घेऊ आणि आपणही रंगीबिरंगी गुलाबांसोबत व्हॅलेंटाईन डे साजरा करू या.

पांढरा गुलाब
लवकरच तुमच्या आयुष्यात कोणीतरी येणार असा संदेश देतो. या रंगाचे गुलाबाचे फूल वडील आपल्या मुलीस आणि मुले आपल्या आईला देतात. हा रंग निर्मळ प्रेमाचे प्रतीक मानला जातो.

लाल गुलाब
लाल गुलाब प्रेमाचे प्रतीक आहे. हे 'माझे तुझ्यावर प्रेम आहे ' हा संदेश हा गुलाब देतो. हा रंग प्रेमाचा खरा रंग मानला जातो. या रंगाचे गुलाब देऊन प्रियकर-प्रेयसी एकमेकांवरील प्रेम प्रकट करतात.

पिवळा गुलाब
माझ्याशी मैत्री करशील काय? हेच जणू हा गुलाब विचारतो. हा गुलाब मैत्रीचे संकेत देतो. यात आनंद सामावलेला असतो. पिवळ्या रंगाच्या गुलाबाचे गुच्छ देणे सांगते की तू माझा जीवलग मित्र/मैत्रीण होतास आणि कायमस्वरूपी राहशील. तुम्ही अनोळखी व्यक्तीला हा गुलाब भेट दिलात तर ही मैत्रीची सुरुवात मानली जाते.

गुलाबी गुलाब
हा रंग प्रतिष्ठेचे प्रतिनिधित्व करतो. एखादी व्यक्ती आणि त्याचा स्वभाव आवडत असेल तर त्याला या रंगाचा गुलाब भेट देऊ शकता. तू मला आवडतोस हा संकेत गुलाबी गुलाब देते.

अशा पद्धतीने प्रत्येक गुलाब आपला वेगळा भाव आणि त्यातील प्रेम प्रदर्शित करतो. या प्रकारे काही फुले निवडून तुम्ही तुमचा व्ह्रॅलेंटाईन डे साजरा करू शकता.

फोटो गॅलरीसाठी येथे क्लिक करा...

आज कुठे तू सांग

Thu, 14 Feb 2008 14:49:01 +0530

पुनव रातीच्या चंद्रा
आज कुठे तू सांग

सुहास वदनी नील आकाशी
अमृत सिंचन पृथ्वीपाशी
दिलेस अमृत माझ्या ओठी
आज विषाचा प्याला का मज सांग

शशिप्रभा ही जशी विखुरली
चटक चांदणी गाली हसली
दिलीस कोमलकरी कौमुदी
आज कंटक हार कां मज सांग

निळ्या मखमली हसल्या तारा
छेडिल्यास तू हृदयीच्या तारा
सुंदर स्वप्ने सूर निर्मिले
आज बेसूर गीत का मज सांग

'व्हॅलेंटाईन डे'च्या कार्ड्‍ससाठी येथे क्लिक करा....

प्रेम

Thu, 14 Feb 2008 14:48:30 +0530

प्रेम असेच असते
सरल्यावरही उरते
उरल्यावरही बहरत राहते
आपल्या स्मृति सुगंधाने
मनाच्या कोंदणात
आठवणींच्या स्वयं प्रकाशाने
तळपत राहाते.

प्रिया प्रिया प्रिया‍ ऽऽऽऽऽऽ

Thu, 14 Feb 2008 14:48:05 +0530

पाहते प्रिया मी वाट
पसरल्या धुक्यात दाट
पश्चिमेस उधळले केशरी रंग सांजचे
पाखरेही परतली शिखांतरीच जायचे
मृदुल रेशमी बंधनात
पाहते प्रिया मी वाट।।1।।

कुंज रातराणीचे धुंद गंध उधळुनी
धरा अधीर जाहली अमृत सिंचन प्राशनी
प्रीतीमाळ करतलात। पाहते प्रिया मी वाट।।2।।

आर्त भाव आळविले प्रीतीगीत गुंफिले
सूर सूर जुळविले हृदयतार छेडिले
मधुर मानस मंदिरात। पाहते प्रिया मी वाट।।3।।

जीवलागण

Thu, 14 Feb 2008 14:47:38 +0530

मी अख्खं भूमंडळ पालथं घातलं असतं
तुझ्या डोळ्यात मला हवा तो
भाव शोधण्यसाठी
मी आकाश-पाताळ एक केलं असतं
तुला माझ्यात गुंतवण्यासाठी
पण तू कसा क्षणात उतरविलास
माझा तोरा वाटे कुणीतरी अलगद
फुलासारखा झेलावा माझा जिव्हाळा
कैक जन्म माझे तयार होते
केवळ अशा एका क्षणावर कुर्बान व्हायला
तू विचारलंस.....
तुझ्या मनात डोकावणारा 'तो' कोण

मी पुन्हा पुन्हा समजावेत माझाच दृष्टिकोन
मी खरंच नव्हते का तुझ्या खिजगणतीत
अन् मला वेडीला वाटायचं
तू स्रवतोयस आपली जीवलागण
केवळ माझ्याचसाठी
मग हा दळभद्री आत्मसन्मानाचा
सोहळा तरी कशासाठी
असो, माझे खिन्न उसासे
मला खिजवत म्हणतील की
की तुझा जन्म यासाठी, याजसाठी
त्याने नवीन सावली शोधताच
उन्मळून पाडण्यसाठी.

'प्रेमात पडतांना'

Thu, 14 Feb 2008 14:47:09 +0530

तिच्या प्रेमात पडतांना
तिला प्रेमात पाडायचं राहून गेलं
तोंड दुखेपर्यंत बडबडलो
पण हवं ते सांगायचं राहूनच गेलं.

तिनं माझ्या नजरेतून जग पाहिलं
तिच्या नजरेला नजर भिडवतांना
तिला डोळ्यात साठवायचं राहूनच गेलं.

तिच्या हाताचा, ओठणीचा,
स्पर्श हवाहवासा वाटतो
सांगेन तिला कधीतरी म्हणतांना
हा विषय काढायचं राहूनच गेलं.

हसत राहीलो, हसवत राहिलो
तिला दरवेळी, दर भेटीला.
तिच्या हसण्यामागचे अर्थ शोधतांना
माझ्या हसविण्याचा मतितार्थ सांगायचं राहूनचं गेलं.

ती आली की वेळही
उडून जायचा मला न समजता.
पण,
त्या दिवशी ती आली आणि निघाली
त्यावेळी तिला नेमकं अडवायचं राहून गेलं...

एक दिवस असंच..

Thu, 14 Feb 2008 14:46:32 +0530

डोळ्यांनी चांदणं खुडतांना
हळूच हाती लागला
तुझ्या पापणीआडचा चंद्र

मनात मलाच शोधतांना
हलकेच सापडत गेल्या
तुझ्या असण्याच्या खाणाखुणा

पाकळीवरचा दवबिंदू वेचतांना
अलगद अंगी बिलगला
तुझा चिंबलाजरा स्पर्श

दाटलेले भाव कळताना
अलवार कुजबुजलेले
तुझे गुलाबगोड शब्द

आणि

सरतेशेवटी तुझ्या नजरेत
नेमका समजलेला
माझ्या हरवलेपणाचा
ओळखीचा अर्थ !

एक प्रेम कथा

Thu, 14 Feb 2008 14:46:10 +0530

ती जन्मताच आंधळी, त्यामुळे सगळ्यांच्याच तिरस्कारास पात्र.
आई-वडील, सख्खे भाऊ, बहिणींही एक डोक्यावरचंन टाळता येणार ओझं म्हणून सहन करणारे.

ह्यात एकच समाधानाची बाब म्हणजे तिचा प्रियकर.
तिच्यावर जिवापाड प्रेम करणारा, तिच्या अंधपणाचा कोणताही बाऊ न करता.
मग तिला वाटायचे आपण खुप नशिबवान आहोत.
तिने कित्येक वेळेस त्याला म्हंटले सुद्धा, "जर मला दृष्टी लाभली असती तर तुझ्याशीच लग्न करून, शेवट पर्यंत साथ दिली असती."
आणी अचानक एके दिवशी चमत्कार झाला.

Smita

कोणीतरी तिला आपले डोळे देण्यास तयार झाला.
शेवटी यशस्वी शस्त्रक्रिये नंतर दिला दिसू लागले.
सर्व प्रथम तिने प्रियकराला पाहण्याचा हट्ट धरला.
त्याला पाहताच तिला जबरदस्त धक्का बसला.
तो चक्क आंधळा होता.
तेवढ्यात त्याने विचारले, "करशील आता माझ्याशी लग्न?"
तिने सहजतेने त्याचा प्रस्ताव नाकारला.
त्याने कांहीही प्रतिक्रीया व्यक्त केली नाही.
तिच्यापासुन दुर जाताना फक्त एवढेच म्हणाला, "माझ्या डोळ्यांची काळजी घे."
ती उघड्या डोळ्यांनी पहातच राहिली.

फोटो गॅलरीसाठी येथे क्लिक करा...

प्रेम म्हणजे...

Thu, 14 Feb 2008 14:45:29 +0530

आपण एखाद्यावर प्रेम करतो म्हणजे काय करतो? आपण कधी त्याचा विचार करतो का? बऱ्याचदा नाही. मग खाली दिलेली ही गोष्ट वाचा. प्रेम म्हणजे काय याचा अर्थ कदाचित तुम्हाल कळेल.

एकदा एका प्रेयसीनं तिच्या प्रियकराला विचारलं,
सांग बरं तुला मी का आवडते? तू माझ्यावर प्रेम का करतो?
अगं, मी अशी काही कारणं सांगू शकत नाही. पण तू मला आवडतेस हे मात्र नक्की.

अरे तू माझ्यावर प्रेम करतोस, मग तुला माहित नाही, तू का प्रेम करतोयस ते? तुला मी का आवडते हेच माहित नसेल तर तुला माझ्याविषयी वाटणाऱ्या भावनेला प्रेम तरी का म्हणायचे?

प्रिये, अगं खरंच. मला त्याचं कारण माहित नाहीये. पण तरीही माझं तुझ्यावर प्रेम आहे आणि मी ते सिद्ध करू शकतो.
सिद्ध काय कसंही करू शकशील रे. पण मला कारण हवंय. माझ्या मैत्रिणीच्या बॉयफ्रेंडने ती का आवडते याची ढिगानं कारणं दिली होती. तुला एवढीही कारणं सुचत नाहीयेत?

ठीक आहे. तुला कारणंच हवीत ना मग ही घे सांगतो.
मला तू आवडते कारण तू सुंदर आहेस.
तुझा आवाज सुंदर आहे.
तू अतिशय काळजी घेणारी आहेस.
तू अतिशय प्रेमळ आहेस
तू विचारी आहेस.
तुझे हास्य मोहक आहे.
तूझी प्रत्येक हालचाल मला वेड लावते.

प्रेयसी प्रियकराच्या या स्पष्टीकरणावर जाम खुश झाली. दुर्देवाने काही दिवसांनंतर त्या प्रेयसीला अपघात झाला आणि ती कोमात गेली. प्रियकर तिला लगोलग भेटायला गेला. पण कोमात असल्याने संवाद साधणंच शक्य नव्हतं. अखेर निरूपायने तो एक पत्र तिच्या उशाशी ठेवून गेला. त्या पत्रातला मजकूर असा.

प्रिये,
तुझ्या गोड आवाजावर मी प्रेम करत होतो.
पण आता तू बोलू शकतेस का?
नाही. त्यामुळे मी तुझ्यावर प्रेम करू शकत नाही.

तुझा काळजी घेण्याचा स्वभाव मला आवडायचा. पण आता तू तो स्वभाव दाखवूच शकत नाही. त्यामुळे मी तुझ्यावर प्रेम करू शकत नाही.

तुझे मोहक हास्य नि तुझे विभ्रम मला चित्तवेधक वाटायचे. म्हणून मी तुझ्यावर प्रेम करायचो.
पण आतातू हसू शकतेस? तुझे विभ्रम दाखवू शकतेस? नाही. म्हणून मी तुझ्यावर प्रेम करू शकत नाही.
प्रेम करण्यासाठीच कारणंच हवी असतील तर आत्ता याक्षणी तुझ्यावर प्रेम करण्यासाठी माझ्याकडे कारणच नाही.

खरोखरच प्रेमाला कारणांची गरज असते?
नाही. नक्कीच नाही. म्हणूनच....
मी अजूनही तुझ्यावर तितकंच गाढ प्रेम करतोय.
थोडक्यात या गोष्टीचे निष्कर्ष असे.
खरे प्रेम कायम रहाते. उडते ती वासना.
प्रेमाचे बंध आयुष्यभरासाठी असतात, पण ते प्रेमात पडलेल्यांना पुढे नेतात. मागे खेचत नाहीत.
बालिश प्रेम म्हणते, मला तुझी गरज आहे, म्हणून मी तुझ्यावर प्रेम करतो.
परिपक्व झालेले प्रेम म्हणते, मी प्रेम करतो म्हणून मला तुझी गरज आहे.
तुमच्या आयुष्यात कुणी यावं हे तुमच्या कपाळावरची नशीबाची रेषा सांगते, पण तुमच्या आयुष्यात कुणी थांबायचं हे तुमचे ह्रदय ठरवते.
प्रेमकथा महत्त्वाच्या नसतात, महत्त्वाची असते, ती तुमच्यातील प्रेम करण्याची क्षमता.

आणि शेवटी....
ज्यांचा देवावर विश्वास असतो, ते भूतलावर असतात आणि देव मात्र स्वर्गात असतो. पण जे देवावर प्रेम करतात ते त्याच्यासमोर असतात.

'व्हॅलेंटाईन डे'च्या कार्ड्‍ससाठी येथे क्लिक करा....

ना उम्र की सीमा हो ...........

Thu, 14 Feb 2008 14:44:32 +0530

नात्याला अंकुर फुटण्यासाठी वातावरण अनुकूल असावे लागते, मग ते कोणतेही नाते असो. नाते फूलण्यासाठी सामंजस्य, सहनशीलता आणि प्रेमाची आवश्यकता असते. यापैकी एक जरी कमी असेल तर तिथे नात्याला मर्यादा पडते. इतकेच काय नात्याला वयोमर्यादाही नसते. नाते तयार करण्यासाठी वयाची अट अजिबात नसते.

तरीही दोन वेगवेगळ्या वयातील मैत्रीची उदाहरणे चटकन आपल्या डोळ्यासमोर येत नाहीत. मैत्री म्हणजे समवयस्कांमधीलच असेच आपण गृहित धरतो. प्रौढ महिला आणि तरूण मुलगा किंवा मुलगी यांच्यात मैत्री असू शकते हे आपल्या लक्षातच येतन नाही. किंबहूना त्याकडे आपण या दृष्टीकोनातून पहातही नाही. मैत्रीसाठी एखाद्या वयाची अट ठेवल‍ी आहे का? किंवा आपल्या राज्यघटनेत असा काही नियम आहे का? मग समाजात अशा मैत्रीचे उदाहरण बघितल्यावर आपण त्याचा स्वीकार का करत नाही?

मित्रात भांडणे, राग आणि स्पर्धेची भावना असतेच. परंतु, हेच नाते एखाद्या परिपक्व व्यक्तीचे आपल्यापेक्षा कमी वयाच्या मित्रांबरोबर असेल तर ही भावना स्वाभाविकरित्या कमी होते. वयाने मोठा असलेला मित्र आपला अनुभव आणि मोठेपणाच्या भावनेने केवळ मैत्री नाही तर सुरक्षिततेची सावली देतो. विशेषत: मित्र जेव्हा एखाद्या कौंटूबिक समस्येवर निर्णय घेऊ शकत नसेल, त्यावेळी प्रौढ मित्र त्याचा मार्गदर्शक ठरू शकतो.

मैत्रीचा फायदा केवळ एकतर्फी नसतो. एखादी प्रौढ महिला घरातील कामे बाजूला ठेवून एखादी बाब एंजॉय करू शकत नाही. अशावेळी एखादी युवती तिची मैत्रीण असेल तर तिचा जिवंतपणा आणि उमेद पाहून त्या महिलेच्या जीवनाला एक वेगळी दिशा मिळू शकते. अर्थात युवक-युवतींचे स्वप्न, काहीतरी करून दाखविण्याची हिंमत आणि आपली एक वेगळी ओळख निर्माण करण्याचा जोश याचा महिलांवर प्रभाव पडून त्या संकुचित वृत्तीतून बाहेर पडू शकतात.

पिता पुत्र किंवा पती पत्नी यांचे नाते मैत्रीचे नसते, परंतु या नात्यांमध्ये आपल्या मर्यादेबरोबर मैत्रीचा गंध नसेल तर नाते नीरस होते. कारण मैत्रीचे नाते परिपूर्ण असून सर्व नात्यांमध्ये पूर्णता आणते.

फोटो गॅलरीसाठी येथे क्लिक करा...

प्रेमाष्टक

Thu, 14 Feb 2008 14:42:10 +0530

(बा! मन्या.... प्रेम कर.)

मन्या सज्जना प्रेम पंथेचीं जावे!
तरी ही 'करी' भेट ती नेत जावे!
तिला त्याज्य ते सर्व सोडोनी द्यावे!
तिला मान्य ते सर्व भावे करावे ।।1।।

तुला व्हायचे बा मन्या प्रेमदेव!
तरीं दृष्टी तू सर्वत्र ठेव!
तुला भेंटेल जी प्रेमे उदार!
तिचे प्रेम स्वीकार, स्वीकार स्वीकार ।।2।।

प्रभाते मन्या नेम बांधून घ्यावा!
गजरा फुलांचा तिला नित्य द्यावा!
सदा प्रेममार्गी करी वाटचाल!
धरी रे मन्या मन्या हाचि तू एकताल ।।3।।

मन्या सज्जना द्रव्य खर्चीत जावे!
तिचे मागणे नित्य पुरवीत जावे!
चिंता धनाची वाहू नये रे!
हिशेब कधीही पाहू नये रे ।।4।।

मन्या आड येता तिचे सर्व भाऊ!
डरोनी त्यांसी नको माघार घेऊ!
वेळीच हाण तू त्यांनाही लाथा!
'प्रसंगी' टेकवी सन्मूख मा था ।।5।।

मन्या सज्जना प्रेम करण्यासी पाहे!
प्रसन्न 'मजनू' सदा त्यांसि आहे!
तया मित्र होती सदा साह्यकारी!
हेचि व्रत म्हणोनी तुवा अंगिकारीं।।6।।

'प्रयत्नांती ईश्वर' आहे मन्या रे!
ठाऊक हे ही सकळा जना रे!
जपावे मन्या तरी तू 'प्रेम-प्रेम'!
धरी रे मन्या हाचि तू 'नित्यनेम' ।।7।।

'जगी सर्व सुखी' असा कोण आहे!
'विचारी मन्या', तू चि शोधोति पाहे!
करी नित्य-नेमे जो 'प्रियाराधना'!
असे प्रिय तोचि 'सकल नारी-जना।।8।।

(रामदास स्वामींनी क्षमा करावी)

व्हॅलेंटाईन डेची तयारी

Thu, 14 Feb 2008 14:41:54 +0530

प्रेमात प्रत्येक दिवस निराळा असतो. पण व्हॅलेंटाईन डेची बातच काही और. नवीन वर्षाच्या सुरूवातीपासूनच तरुण या प्रीतीदिनाची आतुरतेने वाट बघत असतात. प्रत्येक तरुण या दिवशी काही वेगळे करण्याचा प्रयत्न करत असतो. व्हॅलेंटाइन डे काही दिवसांवरच येऊन ठेपला आहे. त्यासाठी आजपासूनच तयारीला लागाल. तरच तुमचे सगळे मनसुबे तडीस जाऊ शकतात. नाहीतर वेळेवर पश्चात्ताप करण्या व्यतिरिक्त काहीच शिल्लक राहणार नाही. चला तर मग व्हॅलेंटाईन डेची तयारी करण्यासाठी आम्ही तुम्हाला मदत करतो.

* सगळ्यात आधी ठरवा की तुम्हाला व्हॅलेंटाईन डे कसा साजरा करायचा आहे. तुम्ही आपल्या जोडीदारासोबत एकटेच एकांत स्थळी जाऊ इच्छिता की आपल्या मित्रांसोबत व्हॅलेंटाईन डेचा आनंद लुटू इच्छिता.
* हे ठरविल्यानंतर त्याजागी जाण्यापूर्वी तिथे बुकिंग करावे लागते का? हे बघा. बुकिंगची व्यवस्था असेल तर आधीच बुकींग करून ठेवणे योग्य.
* आता तुम्हाला कसे तयार व्हायचे आहे याचा विचार करा. तुम्हाला इतरांपेक्षा वेगळे दिसायचे आहे हे मनाशी पक्के ठरवा. सगळ्यात आधी केशरचनेचा विचार करा. कारण काही वेळेस केसांमुळेच सर्व मेहनतीवर पाणी फिरते. तुमची केशरचना फॅशन नुसार आहे की नाही हे तपासून बघा.
* त्यानंतर कपड्यांचा विचार करा. वेषभूषा कशी करावी हा फार मोठा प्रश्न असतो. ज्या कपड्यांमध्ये तुम्हाला कंफर्टेबलही वाटेल असेच कपडे निवडा. वेळेवर धावपळ करण्यापेक्षा आधीच डिझाइन आणि रंग ठरवून ड्रेस तयार करून घ्या. शक्य असेल तर एक-दोनदा ट्राय करून पहा.

Satmeet Kaur

* जास्त भडक मेकअप करू नका. हळुवार संगीतात, प्रकाशात तुम्ही प्रियेला भेटाल तर तुमचा मेकअपही रोमॅंटिकच असायला हवा.
* प्रियेची पसंती लक्षात घेऊनच भेटवस्तू खरेदी करा. भेटवस्तूचे पॅकिंग नवीन पद्धतीचे असेल हे ध्यानात घ्या. पॅकिंग अशी असावी ती भेटवस्तूची आठवण कायस्वरूपी त्याच्या हृदयात कोरली जाईल.
* व्हॅलेंटाईन डेला तुमच्या प्रियेसमोर प्रेम जाहीर करा पण ध्यानात घ्या की प्रत्येक नात्याच्या काही मर्यादा असतात. भावनेच्या आहारी जाऊन असे कोणतेच काम करू नका की नंतर पश्चातापाखेरीज काहीच हाती लागणार नाही.

तुम्हाला काय करायचे आहे हे तर आम्ही सांगितले पण याव्यतिरिक्तही तुमचे काही विचार असतील तर तसे करा. करा तर मग व्हॅलेंटाईन डे साजरा.
बेस्ट ऑफ लक.

फोटो गॅलरीसाठी येथे क्लिक करा...

आवडी-निवडी लक्षात घ्या

Thu, 14 Feb 2008 14:40:59 +0530

आपल्या प्रियकर/प्रेयसीची आवड जाणणे प्रेमात फार आवश्यक असते. याने आपसातील नाते बळकट होतेच पण एकमेकांचा स्वभाव ओळखण्यासही मदत होते. तुमचा प्रियकर रागावला तर, त्याचा राग दूर करण्यासाठी हे फार महत्त्वाचे आहे. तो /ती रागावला असेल तर त्याला आवडते तेच करा. म्हणून तर प्रेमात म्हणतात ना 'जो तुमको है पसंद वही बात करेंगे...' आता त्यांना काय आवडते ते लक्षात घ्या...

*त्यांचा आवडता रंग
*भाग्यशाली अंक
*आवडते फूल
*त्याला/तिला काय ऐकणे आवडते?
*आवडता गायक/गायिका, आवडते गाणे, आवडता संगीतकार

Satmeet Kaur

*आवडते हॉटेल, मिष्टान्न, जेवणातील पदार्थ...
*आवडता अभिनेता/अभिनेत्री
*त्याला/तिला एकांतात वेळ घालवायला आवडेल असे ठिकाण
*आवडता परफ्यूम, मेकअप ब्रॅंड
*आवडता लेखक/साहित्यिक
*आवडता ड्रेस
*आवडता खेळ/खेळाडू
*आरामाचा आवडता वेळ
*आवडते व्यक्तित्व

या आणि अशा काही गोष्टी जाणून घेऊन तुम्ही लवकर त्याचा/तिचा राग दूर करू शकता. आणि मग खुशाल गुणगुणा 'तुम रूठी रहो, मै मनाता रहू....'

'व्हॅलेंटाईन डे'च्या कार्ड्‍ससाठी येथे क्लिक करा....

प्रेयसीला असे खुश ठेवा

Thu, 14 Feb 2008 14:40:31 +0530

प्रेयसीच्या चेहर्‍यावर हास्य पाहू इच्छित असाल तर खाली दिलेल्या टिप्सचे पालन करा. त्यामुळे तुमची प्रेयसी आनंदीत होईलच शिवाय तिला आनंदी पाहून तुमचाही आनंद द्विगुणित होईल.

* तिच्या सौंदर्याची स्तुती करा.
* काही सेकंदांसाठी तिचा हात हातात घ्या.
* प्रेमळ चुंबन द्या.
* झोपेतून उठविण्यासाठी तिच्याच आवाजातली रेकॉर्ड केलेला आवाज ऐकवा.
* तुम्ही तिच्यावर प्रेम करता याची तिला वेळोवेळी जाणीव द्या.

* जर ती नाराज असेल तर तिला बाहूपाशात घेऊन ती तुमच्यासाठी किती महत्त्वाची आहे याची तिला जाणीव द्या.
* तिच्या छोट्या-छोट्या गोष्टीही लक्षात ठेवा. कारण प्रेमात हाही महत्त्वाचा भाग आहे.
* कधी कधी तिच्या आवडीची गाणे तिलाच ऐकवा. (तुमचा आवाज कितीही खराब असला तरी)
* तिच्या मित्र-मैत्रिणींसोबतही काही वेळ घालवा.
* आपल्या कुटुंबातील व्यक्ती, आपले मित्र यांच्याशीही तिची ओळख करून द्या. यामुळे तिचा तुमच्यावरील विश्वास वाढेल.
* कधी-कधी तिच्यासोबत थोडी मस्तीही करा. (गुदगुल्या करणे, बाहूपाशात घेणे आदी)

* तिच्या केसांमधून तुमचा हात फिरवा. यामुळे तिला तुमच्या प्रेमाची जाणीव होईल.
* हसविण्यासाठी काही जोक्स ऐकवा.
* अर्ध्या रात्री तिच्या खिडकीजवळ एक छोटा दगड फेका आणि तिला सांगा की तुम्हाला तिची किती आठवण येते.
* तिच्याशी एकांतात वागता तसेच मित्रांसमोरही वागा.
* तिच्यावरील प्रेम नेहमी तिच्यासमोर व्यक्त करीत जा.

फोटो गॅलरीसाठी येथे क्लिक करा...

प्रेमदिनी काय कराल?

Thu, 14 Feb 2008 14:39:54 +0530

* आपल्या जोडीदारावर प्रेमाच्या कविता लिहा.
* आपल्या आवडी-निवडींवर लक्ष केंद्रीत करा. आपल्या जोडीदाराबरोबर याबद्दल चर्चा करा.
* जोडीदारासाठी गीत-संगीताच्या कॅसेट खरेदी करा.
* जोडीदाराला आपल्याकडून ग्रीटींग कार्ड द्या.
* जोडीदाराकडून भेटवस्तू मिळाल्यावर त्यालाही त्याच्या आवडीची भेटवस्तू द्यायला विसरू नका.
* घराच्या एखाद्या कोपर्‍यात लपवून ठेवलेल्या भेटवस्तूबद्दल संकेत द्या.
* तुमचा जोडीदारा पत्नी असेल तर रात्री यायला उशीर होईल असे सांगून लवकर घरी जाऊन तिला
आर्श्चर्याचा धक्का द्या आणि तिच्यासोबत तिच्या आवडत्या हॉटेलला जेवायला जा.
* जोडीदाराला प्रेमपत्र पाठवून एखादा प्रेमळ सल्ला द्या.
* जोडीदारासोबत रोमांटिक ठिकाणी फिरायला घेऊन जा.
* गुलाबांचा गुच्छ भेट म्हणून पाठवा.
* शक्य असेल तर त्याच्या/तिच्या उशीजवळ एक प्रेमळ संदेश ठेवून दिवसाची सुरवात रोमॅंटिक करा.

Satmeet Kaur

* तिला एक प्रेमळ संदेश द्या.
* तिच्यासोबत एखाद्या एकांतस्थळी जा.
* आपली चूक स्वीकारण्याची तयारी ठेवा.
* आपले विचार मांडण्यासाठी वेळ काढा.
* जोडीदारासाठी विशेष लेख लिहा.
* व्हॅलेंटाईन डे सोबतच साजरे करा.
* तुमच्या आवडत्या स्थळी जाणे पसंत करा.
* एकत्र कोणताही खेळ खेळा.
* एकमेकांना प्रसन्न ठेवायचा प्रयत्न करा.
* पण हे करताना आपल्या पालकांना मात्र विसरू नका. त्यांच्याकडेही लक्ष द्या.

'व्हॅलेंटाईन डे'च्या कार्ड्‍ससाठी येथे क्लिक करा....

व्हॅलेंटाईन पार्टीसाठी केशरचना

Thu, 14 Feb 2008 14:38:57 +0530

स्त्रियांचे घनदाट काळे केस प्रत्येकाला आ‍कर्षित करतात. आपल्याकडे सगळ्यांनी लक्ष द्यावे असे वाटत असेल तर केशरचना नीटनेटकी असणे आवश्यक आहे. व्हॅलेंटाईन पार्टीच्या काही दिवस अगोदर आपल्या केसांना शॅम्पू़, हिना किवा कंडीशनरने कंडीशन करा. आपल्याला कलरींगची आवड असेल तर विंटेज अंबर, एश अंबर, वाइल्ड अंबर किंवा सोनेरी रंगाने केस रंगवा.

व्हॅलेंटाइन डेला परिधान करायचे कपडे अगोदरच निवडून ठेवा आणि त्यानुसारच केशरचना करा. आपले केस लांबसडक असतील तर आपल्याला बुचडा अधिक शोभून दिसेल. लहान केसांवर मल्टी कलर स्टिकींग किंवा सुंदर दिसण्यासाठी पोनी (वेणी) करू करू शकता.

चेहर्‍यानुसार केशरचना
आपला चेहरा लहानसा असेल तर कर्ल आणि वेणींना मिळून बाऊंसी लुक दिला जावू शकतो. केसांना पसरवू देऊ नका. केसाची बांधणी अशा प्रकारे करा की आपला चेहरा मोठा दिसला पाहिजे.

जर लांब चेहर्‍याची मुलगी असेल तर केस मागच्या बाजूने बांधा. केस मोकळे ठेवू इच्छित असाल तर त्यांना डाव्या बाजूने ठेवा म्हणजे आपला चेहरा झाकला जाणार नाही.

चेहरा थोडासा जाड असेल तर अशी केशरचना करा, की चेहरा थोडासा झाकला जाईल. जाड चेहरा जेवढा केसांनी झाकला जाईल तेवढा सुंदर दिसेल.

आपल्या चेहर्‍याचा आकार गोलाकार असेल तर सेंटरवरून केसाला उचलून माग‍ील बाजूस ठेवा आणि चेहरा झाकून ठेवा. आवश्यकता असल्यास साइडने फ्लिक्स किंवा कर्ल ठेवू शकता.

आपले केस मोकळे ठेवू इच्छित असाल तर, कान केसांनी झाकायचा प्रयत्न करा. एका बाजूने चेहरा झाकलेला ठेवा. केस मोकळे ठेवून त्यांना आयरींग करू शकता. खास व्हॅलेंटाइन डे साठी रेड हार्ट शेप किंवा इतर अन्य डिझायनर क्लिप बाजारात उपलब्ध आहेत.

आऊटफिटनुसार केशरचना
साडी घालणार असाल तर केशरचनाही तशीच हवी. साडीबरोबर थोडा हेवी मेकअप केला तर तिच्या सौदर्यांत वाढ होते. केस पातळ असतील तर 'आर्टीफीशियल बन' च्या मदतीने केसांना वरच्या बाजूला सेट करा. ते खूप आकर्षक दिसतील. जिन्सबरोबर केस मोकळे सोडू शकतात. पंजाबी ड्रेस परिधान केला असेल तर केसांची वेणी बांधा. केस लांबसडक असतील तर लांब वेणी अधिक आकर्षक दिसेल.

'व्हॅलेंटाईन डे'च्या कार्ड्‍ससाठी येथे क्लिक करा....

लग्नानंतरचा व्हॅलेंटाईन

Thu, 14 Feb 2008 14:38:24 +0530

'व्हॅलेटाइन डे' हा केवळ प्रियकर आणि प्रेयसी हेच साजरे करू शकतात असे नाही. विवाह बंधनात अडकलेले पती-पत्नीही हा दिवस साजरा करू शकतात. हा दिवस आपल्या आठवणीत रहावा म्हणून विविध रूपात साजरा करू शकतात.

प्रेमाने दिलेली भेटवस्तू

एखाद्याने आपल्याला भेटवस्तू दिली तर ती आपल्याला नक्कीच आवडते. आपल्या प्रेमाचे ते एक प्रतीकही असते. म्हणून या व्हॅलेंटाईन डेला आपल्या पत्नीला तिची आवडीची एखादी चांगली भेटवस्तू विकत घ्या. आपल्या पत्नीवर तुमचे 'वजनदार' प्रेम असेल तर एखाद्या सराफी दुकानात जा आणि तिच्यासाठी चांगले दागिने खरेदी करा.

प्रेम व्यक्त करण्‍यासाठी फुलांपेक्षा दुसरा कोणताच उत्तम पर्याय नाही. पण, फुलांचा रंग नारंगी, गुलाबी, लाल असावा कारण हे रंग स्त्री-पुरूषांच्या प्रेम भावनेला व्यक्त करतात. आवड असेल तर आपण आपले घर रंगीबेरंगी फुलांनी सजवून आपल्या जोडीदाराला आनंद‍ी करू शकता. शयनगृहदेखील फुलांनी सजवून पत्नीला एक चांगली भेट द्या.

घरात मेणबत्त्या लावून 'व्हॅलेंटाईन डे' वेगळ्या प्रकारे साजरा करू शकता. मेणबत्त्यांचा मंद प्रकाश आपल्या प्रेमाला दृढ करू शकतो. शक्य असल्यास जेवणाच्या टेबलावरही मेणबत्त्या लावा आणि आपल्या जोडीदाराच्या आवडीचे जेवण त्याला स्वत: च्या हाताने जेवू घाला. मंद प्रकाशात आपण व आपला जोडीदार प्रेमाने जेवण करू शकाल.

महागड्या भेटवस्तू किंवा अलंकार दिल्यामुळेच प्रेम व्यक्त केले जाते असे नाही. आपण एखादी प्रेम कविता किंवा सुंदर पेटिंगही भेटवस्तू म्हणून देऊ शकता. त्यामुळे आपला प्रियकर किंवा प्रेयसी अधिक जवळ येण्यास मदत होते.

डिस्को पार्टी....
व्हॅलेंटाईन डेला छान पार्टी ठेवू शकता. या पार्टीत नृत्य करून आपले मन प्रसन्न होईल व अधिकाधिक वेळ आपल्या जोडीदाराला देता येऊ शकेल.

फोटो गॅलरीसाठी येथे क्लिक करा...

पहिला वाहिला व्हॅलेंटाईन

Thu, 14 Feb 2008 14:37:46 +0530

मिताली व तिची आई रेल्वे प्रवास करत असताना मितालीला राहूल नावाचा एक चांगला मि‍त्र मिळाला होता. प्रवासादरम्यान दोघांमध्ये चांगली मैत्री झाली. ती चांगली घनिष्टही झाली. पण प्रवासानंतर वेगळे व्हावे लागणारच होते, म्हणून राहूलने तिच्या लहान भावाच्या घरचा दूरध्वनी क्रमांक घेतला होता.

स्टेशनवर उतरताना राहूलने तिच्या आईला घरी येण्याचे निमंत्रण दिले आणि तो निघून गेला. परंतु, राहूलचे मन कशातच लागत नव्हते. त्याला नेहमी रेल्वेतील आठवणी येत होत्या. काय करावे काय सुचत नव्हते? एक दिवस अचानक मितालीची चौकशी करण्यासाठी त्याने तिच्या घरी फोन केला. मितालीविषयी विचारले असता‍ तिच्या आईने लगेच मितालीला फोन दिला. फोनवर अशा काही गप्पा झाल्या की, अचानक दोघांच्या मैत्रीचे रूपांतर प्रेमात झाले.

काही दिवसानंतर मिताली राहूलला देण्यासाठी एक भेटवस्तू घेऊन आली. या भेटवस्तूबद्दल तिने आपल्या आईला सर्व काही सांगितले होते. त्यामुळे तिच्या आईनेही तिला विरोध केला नाही. संपूर्ण सहकार्य करण्‍याची ग्वाही आईने तिला दिली. आता मिताली आणि राहूल आपल्या प्रेमाचा पहिल्या व्हॅलेंटाइन डे ची आतुरतेने वाट पाहत आहेत.

फोटो गॅलरीसाठी येथे क्लिक करा...

सोहनी-महिवाल

Thu, 14 Feb 2008 14:37:03 +0530

पंजाबच्या चिनाब नदीच्या काठी एका गावात कुंभार समाजात सोहनी नावाचे रत्न जन्माला आले. सोहनी अतिशय सुंदर होती. त्याचवेळी एका मोगल व्यापार्‍याच्या घरी इज्जत बेग याने जन्म घेतले. पुढे हाच सोहनीचा प्रियकर महिवाल म्हणून ओळखला जाऊ लागला. या दोघांच्या प्रेमाची कहाणी आज फक्त पंजाबातच नव्हे, तर देशभरात प्रसिद्ध आहे.

इज्जत बेगला फिरण्याचा खूप शौक. त्याने आपल्या वडिलांची परवानगी घेऊन देश फिरण्याचा निर्णय घेतला. दिल्लीत त्याचे मन रमले नाही. मग तो लाहोरला गेला. तिथेही तो लवकरच कंटाळला. मग आपल्या घरी परतण्याचे त्याने ठरविले. रस्त्यातच तो गुजरातमध्ये एके ठिकाणी थांबला. तिथे त्याने सोहनीला पाहिले. तिला पाहिले आणि तो सर्व काही विसरला. तो तिच्या प्रेमात एवढा वेडा झाला की त्याने तिच्या घरी जनावरे पाळण्याची नोकरी पत्करली. पंजाबमध्ये म्हशींना माहिया म्हणतात. त्यामुळे म्हशींना चरायला नेणारा तो महिवाल. म्हणून त्याचे नाव महिवाल पडले. महिवाल अतिशय सुंदर होता. महिवाल व सोहनी दोघेही परस्परांच्या प्रेमात पडले.

पण सोहनीच्या आईला ही बाब कळली तेव्हा तिने सोहनीलाच फटकारले. पण त्याचवेळी सोहनीने महिवाल मूळ एका व्यापाराचा मुलगा आहे आणि तो केवळ आपल्यावरील प्रेमाखातीर जनावरे चारतो, हे आईला सांगितले. शिवाय त्याच्याशी लग्न न झाल्यास आपण जीव देऊ असा इशाराही तिने दिला. सोहनीच्या आईने महिवालला घरातून हाकलून दिले. महिवाल जंगलात जाऊन सोहनीच्या नावाने रडू लागला. इकडे सोहनीची अवस्थाही काही वेगळी नव्हती. पण तिच्या विरोधाला न जुमानता तिचे लग्न इतर कुणाशी तरी करून देण्यात आले. पण सोहनीला ते अजिबात मान्य नव्हते.

इकडे महिवालने आपल्या रक्ताने लिहिलेली एक चिठ्ठी सोहनीला पाठवली. ती वाचून सोहनीने त्याला उत्तर दिले, मी तुझीच आहे आणि तुझीच राहीन. त्यानंतर मग महिवालने साधूचा वेष धारण करून सोहनीच्या घरी गेला. दोघांच्या भेटी होऊ लागल्या. पुढे सोहनी मातीच्या मडक्याच्या आधारे नदी पार करून महिवालला भेटायला जायची. दोघेही प्रेमरत अवस्थेत तासंतास बसायचे. ही बाब सोहनीच्या वहिनला कळली. तिने मातीच्या पक्क्या मडक्याऐवजी कच्चे मडके ठेवले. सोहनीला ही बाब कळली. पण प्रियकरातूर सोहनी ते मडके घेऊन नदीत उतरली. पण अखेरीस ते मडके फुटले आणि ती पाण्यात बुडून मरण पावली. इकडे महिवाल तिची वाट बघत बसला. पण सोहनीचा मृतदेह त्याच्या पायाला लागला तेव्हा त्याला वस्तुस्थिती कळली. आपल्या प्रेयसीचा मृत्यू झाल्याचे कळताच तो वेडा झाला. त्याने सोहनीला आपल्या बाहूपाशात घेऊन नदीत उडी मारली.

सकाळी मच्छिमारांनी माशांसाठी जाळे टाकले, त्यावेळी जाळ्यात त्यांना सोहनी व महिवालचे परस्परांना बाहूपाशांत घेतलेले मृतदेह मिळाले. गावकर्‍यांनी त्यांच्या प्रेमाचे एक स्मारक बांधले. या स्मारकाला हिंदू लोक समाधी व मुस्लिम लोक मजार म्हणतात.

अर्थात असे असले तरी प्रेम हे प्रेमच असते त्याला धर्म, जातीचे बंधन नसते, हेच खरे.

शिरी- फरहाद

Thu, 14 Feb 2008 14:36:35 +0530

आर्मेनियाच्या बादशाहाची मुलगी शिरी अतिशय सुंदर होती. तिचे चित्र पाहूनच पर्शियाचा राजा खुसरो तिच्यावर फिदा झाला होता. त्याने आपल्या शिपायांमार्फत तिच्याशी लग्नाचा प्रस्ताव पाठवला. खुसरोचा प्रस्ताव शिरीने मान्य केला, पण एका अटीवर. पर्शियाचे लोक व आपल्या स्वतःसाठी दुधाचा सागर आणून द्यावा ही ती अट. या सागरासाठी कालवे खोदण्याचे काम ज्याच्याकडे देण्यात आले होते, त्याचे नाव फरहाद. दरम्यानच्या काळात खुसरोने शिरीशी निकाह केला होता.

खुसरोने शिरीच्या सल्ल्यानुसार कालव्यांची खोदाई व्हावी यासाठी फरहादची तिच्याशी गाठ घालून दिली. शिरीला पाहताच फरहाद तिचा दिवाना झाला. कालवा खोदता खोदताच तो तिच्या नावाचा जणू जपच करू लगाला. एके दिवशी कालव्याचे काम पहायला शिरी तिथे आली. तिच्या प्रेमात बुडालेल्या फरहादने तिच्या पायावर झुकून तिच्यावर आपले प्रेम असल्याचे सांगितले. शिरीने मात्र त्याला झिडकारले.

पण सच्च्या प्रेमाचा पराभव कधी होतच नाही. शिरीचे नामस्मरण करता करता फरहादने कालवा खोदला पण तो आता शिरीच्या प्रेमात वेडा व्हायचाच बाकी राहिला होता. खुसरोला त्याच्या शिरीप्रेमाची खबर कळताच, त्याचा संताप अनावर झाला. त्याला खुसरोने बोलावणे पाठवल्यावर त्याने त्याच्यासमोर जाऊन आपले शिरीवर प्रेम असल्याचे सांगितले. खुसरोने त्याची तिथेच खांडोळी करण्याचा प्रयत्न केला, पण त्याच्या वझीराने त्याला रोखले. फरहादने डोंगर फोडून रस्ता बनविल्यास त्याचा शिरीशी निकाह करून देण्यात येईल, असे त्याला सांगणअयात आले. फरहाद हे करूच शकणार नाही, अशी त्यांची खात्री होती. पण प्रेमात दिवाना झालेल्या फरहादने ही अट कबूल केली. रस्ता बनविण्याच्या नादात त्याने खाणे-पिणे सोडून दिले. त्याच्या या अनिवार प्रेमाची जाणीव अखेर शिरीलाही झाली.

फरहादने आव्हान म्हणून बनवायला घेतलेला रस्ता पूर्ण व्हायला आला होता. तो पाहून खुसरो घाबरला. त्याने शिरीने आत्महत्या केल्याचा खोटा निरोप फरहादकडे पाठवला. तो निरोप ऐकताच फरहाद वेडाच झाला. त्याच भरात त्याने स्वतःच्या डोक्यावर कुर्‍हाड मारून आत्महत्या केली.

शिरीला फरहादच्या मृत्यूची बातमी कळताच ती तातडीने त्या जागी गेली. फरहादचे आपल्यावरचे निस्सीम प्रेम पाहून तिला प्रचंड धक्का बसला. खुसरोने तिला राजवाड्यात परतण्याचे आदेश दिले. पण तिने हा आदेश धुडकावला आणि तिथेच आपल्याला मृत्यूच्या हवाली केले.

या दोन प्रेमीजनांचे बरोबरच दफन करण्यात आले. त्यांच्या प्रेमाची कहाणी त्यांच्या या त्यागामुळेच अमर बनली आहे.

लैला मजनूची अमर प्रेमकहाणी

Thu, 14 Feb 2008 14:34:48 +0530

प्रेम असा विषय निघाला की लैला आणि मजनू ही नावं आली नाही तर नवल. एवढा या नावाचा आणि प्रेमाचा संबंध आहे. किंबहूना प्रेम कसं हवं तर लैला मजनूसारखं असा प्रेमाचा निकषही ठरला आहे. पण हे लैला मजनू नेमके होते कोण? त्यांची प्रेमकहाणी नेमकी आहे तरी काय? हे बर्‍याचदा माहित नसतं. त्या अमर प्रेमाचीच ही कथा.

अरबस्तानातील अब्जोपती शाह अमारीचा मुलगा कॅसला लहानपणापासूनच इश्काचा स्पर्श झालेला. एका ज्योतिषाने त्याला पाहताक्षणी सांगितलं याच्या आयुष्यात प्रेमाला फार महत्त्व आहे. त्यासाठी तो काहीही करेल. ज्योतिषाची भविष्यवाणी खोटी ठरावी यासाठी शाह अमारीने खूप प्रयत्न केले. पण ते सारे व्यर्थ ठरले.

पुढे एकदा दमास्कसमध्ये मदरशात शिकण्यासाठी गेलेल्या मजनूने नाजदच्या शहाची मुलगील लैलाला पाहिलं आणि बेटा पहिल्या कटाक्षात घायाळ झाला. तिथेच तो तिच्या प्रेमात पडला. मौलवीने त्याला प्रेम बिम झूठ असल्याचं सांगून त्यापेक्षा अभ्यासावर लक्ष केंद्रीत कर असं सांगतिलं. पण प्रेमात आकंठ बुडालेला कैस ऐकायला कसा तयार होईल? त्याच रोगाची लागण लैलालाही झाली. पुढे याची परिणती लैलाला घरात कोंडून ठेवण्यात झाली. लैलाचा विरह कॅसला सहन होईना. तो वेड्यासारखा भटकू लागला. त्याचे हे प्रेम पाहून लोकांनी त्याला मजनू म्हणायला सुरवात केली. ते नाव आजही टिकून आहे. प्रेम या शब्दाला मजनू हा प्रतिशब्द म्हणून वापरला जातो, यातच काय ते आले.

लैला व मजनू यांना वेगळे करण्याचे खूप प्रयत्न झाले. पण निष्फळ ठरले. लैलाचे बख्त नावाच्या व्यक्तीशी लग्न लावून देण्यात आले. पण तिने नवर्‍याला आपण फक्त मजनूचे आहोत, असे स्पष्ट सांगितले. त्याच्याशिवाय आपल्याला कोणीही स्पर्श करू शकत नाही, असे सांगितले. बख्तने तिला तलाक दिला. आता मजनूच्या प्रेमाने वेडी झालेली लैला त्याच्या शोधात जंगलात फिरू लागली. अखेरीस तिला मजनू मिळाला तेव्हा दोघेही प्रेमपाशात बद्ध झाले. पण लैलाच्या आईने त्यांना वेगळे केले आणि लैलाला ती घरी घेऊन गेली.

विरहाच्या दुःखानेच लैलाचा मृत्यू झाला. लैलाच्या मृत्यूची बातमी ऐकल्यावर मजनूचेही प्राणपाखरू उडून गेले. त्याच्यानंतर त्या दोघांच्या प्रेमाची खोली लोकांना कळून आली. अखेर त्या दोघांना जवळ जवळ दफन करण्यात आले. मात्र त्यांना दफन केले तरी त्यांच्या प्रेमाची कहाणी मात्र अमर झाली आहे.

'व्हॅलेंटाईन डे'ची उद्योग जगताला गिफ्ट

Thu, 14 Feb 2008 11:10:55 +0530

व्हॅलेंटाइन डे ने उद्योग जगताला नवसंजीवनी दिली आहे. या दिवशी आपले प्रेम व्यक्त करण्यासाठी देण्यात येणार्‍या विविध भेटवस्तूंची बाजारात विक्री वाढली आहे.

या माध्यमातून, चालूवर्षी उद्योग जगताला तीन हजार करोड रुपयांची कमाई मिळण्याचा अंदाज तज्ज्ञांनी वर्तवला आहे. ही रक्कम गेल्या दोन वर्षात झालेल्या फायद्याच्या दुपटीहून अधिक आहे.

आज (गुरुवार) साजरा होत असलेल्या या दिवसासाठी गेल्या महिनाभरापासून बाजार सजले आहेत. यातूनच आपल्या प्रिय व्यक्तीला भेट देण्यात येणार्‍या वस्तूंमध्येही आधुनिकतेने शिरकाव केला असल्याने अधिक मौल्यवान वस्तू भेट स्वरूपात देण्याचा नवा पायंडा पडला आहे. आणि याचाच फायदा उद्योग जगताला झाला आहे.

व्हॅलेंटाईडेच्या कार्ड्‍ससाठी येथे क्लिक करा...

यूवर व्हॅलेंटाईन

Fri, 08 Feb 2008 14:31:40 +0530

व्हॅलेंटाईन डे साजरा करत असताना तो कसा सुरू झाला हे जाणून घेणेही गरजेचे आहे. रोम राज्यात आठशे वर्षांपूर्वी व्हॅलेंटाईन डे साजरा करण्यास सुरुवात झाली होती. प्रेमाची अभिव्यक्ती करणारा हा दिवस संत व्हॅलेंटाईन यांच्या बलिदानाचा दिवस म्हणून ओळखला जातो. रोममध्ये केलेडियस द्वितीय राजाच्या साम्राज्यात रोमन सैनिकांना लग्न आणि प्रेम करण्यावर बंदी घातली होती. हा राजा प्रेम म्हणजे निव्वळ टाईमपास आहे, असे मानत होता. त्यामुळे प्रेम करणार्‍यांचाही त्याला राग यायचा. संत व्हॅलेंटाईनने याला विरोध करून काही सैनिकांचा विवाह लावून दिला. केलेडियसला हे समजल्यानंतर त्याने वेलेंटाईनला तुरुंगात कैद केले.

तुरुंगात असतानाच व्हॅलेंटाईनचे जेलरच्या आंधळ्या मुलीवर प्रेम बसले. त्याच्या प्रेमाच्या शक्तीने त्या मुलीचे अंधत्व नाहीसे झाले, असे सांगितले जाते. इसवी सन 269 च्या 14 फेब्रुवारीला प्रेम केल्याची शिक्षा म्हणून व्हॅलेंटाईनला फाशी दिली गेली. फाशीच्या आदल्या दिवशी व्हॅलेंटाईनने प्रेयसीला पत्र लिहिले आणि पत्राचा शेवट 'यूवर व्हॅलेंटाईन, तुझा चाहता' या वाक्याने केला. तेव्हापासूनच 14 फेब्रुवारीला व्हॅलेंटाईनच्या स्मरणानिमित्त हा दिवस साजरा केला जातो.

वेगवेगळ्या देशात व्हॅलेंटाईन डे वेगवेगळ्या पद्धतीने साजरा केला जातो. 18 व्या शतकात इंग्लंडमध्ये तरुणी कागदाच्या तुकड्यावर काही मुलांची नावे लिहून ते कमळात ठेवून पाण्यात बुडवीत असत. ज्या मुलाचे नाव पाण्यावर तरंगत वर येत असे त्यालाच आपला जन्माचा जोडीदार बनवीत असत. या दिवशी सोनेरी पक्षी नजरेस पडला तर श्रीमंताशी लग्न आणि गौरैया पक्षी नजरेस पडला तर गरीबाशी लग्न होते, अशीही समजूत असे. इटलीत उपवर मुली खिडकीत बसून वाट बघत आणि जो तरुण आधी दिसतो त्याला त्या वरत.

डेन्मार्कमध्ये तरुण-तरुणी प्रेम व्यक्त करण्यासाठी विशिष्ट पत्र लिहितात, त्यालाच जोकिंग लेटर म्हणतात. जर्मनीत लहानशा कुंडीत कांद्याचे बीज पेरले जाते. प्रत्येक कुंडीवर एका तरुणाचे नाव लिहिले जाते. ज्या कुंडीत पाहिल्यांदा अंकुर फुटतो त्यालाच आपला व्हॅलेंटाईन मानतात. पाश्चात्य देशात साजरा केला जाणारा हा दिवस आता भारतात देखील उत्साहाने साजरा केला जातो. या दिवशी फुले आणि ग्रीटींग कार्डांची विक्री मोठ्या प्रमाणात होते.

व्हॅलेंटाईन डे फक्त प्रियकर-प्रेयसी किंवा पती-पत्नीत साजरा केला जाणारा भारत हा एकमेव देश आहे. परदेशात मात्र याचा अर्थ व्यापक आहे. एक मुलगा आपल्या 70 वर्षे वयाच्या आजीलाही लाल गुलाब देऊन आपला व्हॅलेंटाईन बनवू शकतो. व्हॅलेंटाईन म्हणजे ज्या व्यक्तीवर आपण मनापासून प्रेम करतो अशी व्यक्ती. आपण डोळे बंद केल्यावरदेखील त्याचेच अस्तित्व आपल्या डोळ्यांसमोर तरंगत राहते. ज्याप्रमाणे मीरेने कोणत्याही स्वार्थाशिवाय कृष्णावर प्रेम केले त्याप्रमाणे. एखाद्या आईसाठी आपल्या मुलापेक्षा कोणता प्रेमळ व्हॅलेंटाईन असू शकेल? मित्रदेखील आपला व्हॅलेंटाईन होऊ शकतो. व्हॅलेंटाईनचा खरा अर्थ आहे कोणत्याही स्वार्थाशिवाय प्रेम.