मंदीच्या विळख्यात

आयबीएमचा 2800 कर्मचाऱ्यांना नारळ

Tue, 27 Jan 2009 13:07:44 +0530

अमेरिकेतील मंदीच्या आवर्तात आता आयटी क्षेत्रातील बडी कंपनी इंटरनॅशनल बिझनेस मशीन्स कॉर्पोरेशन (आयबीएम) सापडली आहे. मंदीचा फटका बसलेल्या या कंपनीने 2800 कर्मचाऱ्यांच्या हाती नारळ दिला आहे. आयबीएमचे प्रवक्ते डग शेल्टन यांनी या वृत्तास पुष्टी दिली आहे.

कंपनीने गेल्या आठवड्यात या कर्मचाऱ्यांना नोकरी सोडून जाण्यास सांगितले. मात्र, किती कर्मचाऱ्यांना असे सांगितले याविषयीची नेमकी माहिती कळू शकली नाही.

कालचा सोमवार युरोप आणि अमेरिकेतील कंपन्यांसाठी काळा सोमवार ठरला. कारण या दोन्ही खंडात तब्बल 67 हजार जणांच्या नोकऱ्या या दिवशी गेल्या.

आयबीएमच्या प्रत्येक विभागातून समानतेने नोकरकपात करण्यात आली. सॉफ्टवेअरसह सेल्स व वितरण या विभागतही कपात झाली. यापुढे कंपनीच्या सॉफ्टवेअर विभागातूनही नोकरकपात होण्याची शक्यता आहे.

कंपनीने मंदीमुळे ही नोकरकपात केल्याचे आयबीएमने मान्य केलेले नाही. कंपनी गरजेप्रमाणे वेळोवेळी नोकरकपात करते आणि नवी भरतीही करते, असे सांगण्यात आले.

निर्यात क्षेत्रातील एक कोटी जणांची नोकरी धोक्यात

Tue, 06 Jan 2009 19:07:47 +0530

भारतीय निर्यात मंडळाने केंद्र सरकारतर्फे जाहीर करण्यात आलेल्या दुसऱ्या आर्थिक पॅकेज बद्दल नाराजी व्यक्त केली असून, जर सरकारने याविषयी गांभीर्याने विचार केला नाही तर या क्षेत्रातील एक कोटी नोकऱ्या धोक्यात येण्याची शक्यता व्यक्त केली आहे.

महासंघाचे अध्यक्ष ए शक्तिवाल यांनी दिलेल्या माहितीनुसार 2009 पर्यंत वस्त्र, अलंकार, हस्तशिल्प, अभियांत्रिकी, आणि सेवा क्षेत्रावर मोठे संकट ओढवण्याची शक्यता त्यांनी व्यक्त केली आहे.

पुढच्या वर्षात देशाच्या निर्यात क्षेत्रात मोठी घसरण होणार असून, याचा फटका प्रत्यक्षरुपात या उद्योगांना बसणार आहे. हे वर्ष देशातील निर्यातदरांसाठी अवघड असल्याचे भाकीतही त्यांनी व्यक्त केले आहे.

यंदाचे वर्ष आणखीनच अडचणीचेः पंतप्रधान

Sun, 04 Jan 2009 11:33:48 +0530

भारतीय अर्थव्यवस्थेवर पुढचे आर्थिक वर्ष जागतिक मंदीचे संकट अधिक गडद होण्‍याची शक्‍यता पंतप्रधान डॉ.मनमोहन सिंह यांनी व्‍यक्‍त केली आहे.

सरकारने अर्थव्यवस्थेला गती देण्‍यासाठी दुस-या बेल आऊट पॅकेजची घोषणा केल्‍यानंतर दुस-याच दिवशी पंतप्रधान म्‍हणाले, की जागतिक मंदीमुळे येत्या आर्थिक वर्षात देशासमोर अधिक गंभीर आव्‍हाने निर्माण होणार असून आपल्‍याला खूप मेहनत करावी लागणार आहे. असे असले तरीही आपण विकासाचा दर 7 टक्क्यांपर्यंत नेण्‍यास या वर्षात यशस्‍वी होणार असल्‍याचेही त्‍यांनी स्‍पष्‍ट केले.

मध्‍यमवर्गीयांचे कारचे स्‍वप्‍न साकार

Sat, 03 Jan 2009 17:05:02 +0530

जागतिक मंदीमुळे भले भले हैराण झाले असले तरीही मध्यम वर्गीयांसाठी तरी सध्‍या मंदी वरदान ठरत आहे. कार निर्मिती करणा-या कंपन्‍यांनी कारच्‍या किंमतींमध्‍ये मोठी कपात केल्‍याने मध्‍यमवर्गीयांचा कार खरेदीकडचा ओघ वाढला आहे.

मंदीमुळे अनेक कार कंपन्‍यांनी गाड्यांच्‍या किंमती कमी केल्‍या आहेत. मारुती सुजुकीनेही आपल्‍या ब-याच कार मॉडेल्‍सच्‍या किंमतीत 15 ते 35 हजार रुपयांपर्यंत कपात केली आहे. तर ह्युंदई मोटर्सने सैन्‍ट्रोच्‍या किमतीत 38 हजार आणि आय-10 मध्‍ये 30 हजारांची कपात केली आहे.

मंदीत घरच्यांचे सहकार्य गरजेचे

Sat, 03 Jan 2009 11:36:27 +0530

आर्थिक मंदीचे परिणाम आता हळूहळू जाणवू लागले आहेत. पगारामध्ये कपात किंवा नोकरी जाण्याचे संकट निर्माण झाले आहे. मंदीमुळे उत्पन्न कमी होत असून पदोन्नतीही मिळत नाही. घरातील प्रमुख व्यक्ती अशा संकटात असतांना त्यांना तणावापासून लांब ठेवणे गरजेचे आहे. यासाठी कुटुंबातील सदस्य महत्वाची भूमिका बजावू शकतात. घरातील चांगले वातावरण तणाव दूर करण्यासाठी महत्वाचे ठरू शकते.

मागू नका:
सध्याच्या अनिश्चित्तेच्या काळात घरातील कर्ता व्यक्ती खूप तणावात असतो. त्याच्यावरील तणाव कमी करण्यासाठी घरातील सदस्य महत्वाची भूमिका बजावू शकतात. यासंदर्भात मानसोपचार तज्ज्ञ डॉ. योगेंद्र देशपांडे म्हणतात, 'घरातील सदस्यांनी परिस्थिती पाहूनच कोणत्याही प्रकारची मागणी केली पाहिजे. तणाव कमी करण्यासाठी सर्वांनी आपल्या अपेक्षा कमी केल्या पाहिजे. यामुळे विषम परिस्थितीत कुटुंबातील कर्त्या व्यक्तीस एकटे वाटणार नाही. घरातील खर्चात कपात करून वातावरण चांगले ठेवण्याचा प्रयत्न सर्वच सदस्यांनी केला पाहिजे.

तणावाचे परिवर्तन आजारात होऊ नये:
कुटुंबातील सदस्यांनी खर्च कमी करून सहकार्य करण्याचा प्रयत्न केला पाहिजे. याबाबत डॉ.स्मिता अग्रवाल म्हणतात, 'घरातील कर्ता पुरूष घरात काही कमतरता झाल्यास आपल्यालाच जबाबदार धरतो. यामुळे परिवारातील सदस्यांनी वायफळ खर्च कमी करावा आणि अशी कोणतीही मागणी करु नये की जी पूर्ण करता येणार नाही. बायकोने आपल्या नवर्‍यास किंवा मुलांनी आपल्या वडिलांना योग, प्राणायाम सुरू करण्यासाठी प्रवृत्त करायला हवे. यामुळे तणाव कमी होईल, तणावाचे परिवर्तन आजारात होणार नाही.' डॉ. व्ही.एस. पॉल म्हणतात की, जेव्हा तणावाचा परिणाम सामाजिक कार्यात किंवा दैनिक कार्यावर होतो तेव्ही त्यांचे रुपांतर आजारात होते. त्याला 'डिप्रेशन डिसऑर्डर' म्हटले जाते. यापासून वाचण्यासाठी घरातील व्यक्तींनी पैसे सोडून इतर बाबींवर चर्चा केली पाहिजे. तणाव वाढल्यास वेळीच मानसोपचार तज्ज्ञांचा सल्ला घ्यावा.

एकाकी कुटुंबात जागरूकता हवी:
एकत्र कुटुंब पध्दतीत तणाव कमी असतो. कारण तेथे कमविणारे आणि जबाबदारी उचलणार्‍या अन्य व्यक्तीही असतात. परंतु, एकट्या कुटुंबात मोठा तणाव असतो. यामुळे अशा कुटुंबात जास्त जागरूकतेची गरज आहे. याबाबत समाजशास्त्रज्ञ डॉ. डि. के. गुप्ता म्हणतात की, कुटुंबातील सदस्यांनी संयम ठेवण्याची गरज आहे. सर्व सदस्यांनी समाधानी राहावे. विपरित परिस्थित त्यांनी सकारात्मक विचार करावा. नोकरी गेल्याने किंवा पगारात कपात झाल्याने सर्वच संपणार नाही, हे लक्षात घ्यावे.

लक्षात ठेवा:
- घरातील वातावरण हसतखेळत असावे.
- आर्थिक बाबींवर लक्ष न देता मनोरंजनावर लक्ष केंद्रीत करावे.
- खर्च कमी करा, अपेक्षा वाढवू नका.
- कामात मदत करण्याची इच्छा व्यक्त करा.
- चांगली पुस्तके वाचण्यासाठी प्रवृत्त करा.
- रोज नवीन काहीतरी करण्यासाठी प्रयत्न करा.
- सामाजिक जबाबदारीची आठवण करून द्या.
- तणावापासून मुक्त करण्यासाठी लक्ष दुसरीकडे वळवा.

20 हजार कोटींच्‍या आर्थिक पॅकेजची घोषणा

Fri, 02 Jan 2009 22:11:55 +0530

आर्थिक मंदीचा सामना करण्यासाठी 20 हजार कोटी रुपयांचे आर्थिक पॅकेज जाहीर केले आहे. सरकारच्‍या या निर्णयामुळे सरकारला सुमारे 40 हजार कोटी रुपयांचा फटका सहन करावा लागणार आहे.

सार्वजनिक क्षेत्रातल्या बँकांना जास्तीत जास्त निधी वितरीत करण्याकरता कर्ज वाटपाच्या लक्ष्यात वाढ करण्याचे निर्देश सरकारने दिले असून महागाईचा दर कमी झाल्याने कमीत कमी व्याजदरात अधिक कर्ज उपलब्‍ध करून देण्‍याचे निर्देश बँकांना देण्‍यात आले आहेत.

नियोजन आयोगाचे उपाध्यक्ष मॉंटेक सिंह अहलूवालिया यांनी रिजर्व बँकेच्‍या व्‍याजदरात कपात करण्‍याची घोषणा केल्‍यानंतर काहीच वेळेत या आर्थिक पॅकेजची घोषणा केली आहे. यापूर्वीच सरकाने 20 हजार कोटींचे पॅकेज जाहीर केले असून आता दुस-या टप्‍प्‍यातही तितकेच पॅकेज जाहीर केले आहे. त्‍यामुळे आजारी वाहन आणि बँकिंग क्षेत्राला दिलासा मिळणार आहे.

भ्रष्टाचाराचा 'मेडाफ टच'

Wed, 31 Dec 2008 19:47:04 +0530

मिडास नावाच्या राजाची गोष्ट लहानपणी आपण ऐकली असेल. ज्याला हात लावेल त्याचे सोने होईल, असा त्याला वर मिळाला होता. सोन्याच्या हव्यासापोटी हा वर मिळवलेल्या या राजाची मुलगीही अखेर त्याच्याच स्पर्शाने सोन्याची होऊन जाते, अशी ही कथा. अमेरिकेतही या कथेच्या उलटी स्थिती मेडाफ नावाच्या एका बिलंदराने आणली आहे. 'मेडाफ' नावाच्या या बड्या गुंतवणुकदाराने ज्या बॅंकेला स्पर्श केला तिचे दिवाळे वाजण्याची वेळ आली. हा 'मेडाफ टच' आधीच मंदीच्या खाईत रूतलेल्या अमेरिकेला आणखी खोलवर नेणारा ठरेल अशी शक्यता दिसत आहे.

अमेरिकेत आलेल्या आर्थिक मंदीने जगाला वेठीस धरले आहे. अमेरिकेतील अनेक बँकांना ताळे लागले आहे. गुंतवणूकदारांचे पैसे बुडल्याने अनेकांवर बेरोजगारीची वेळ आली आहे. अमेरिकेच्या या सावळ्या गोंधळाला जितक्या अमेरिकी बँका जबाबदार आहेत, त्याच प्रमाणात अमेरिकी नॅसडॅकचे माजी अधिकारी आणि नॅसडॅक मार्केटचे माजी चेअरमन 70 वर्षीय बर्नाड मेडाफ यांचाही यात मोठा हातभार आहे.

मेडाफ यांना अमेरिकेत अटक करण्‍यात आली असून, त्यांनी दाखवलेल्या हातचालाखीने अमेरिकेसह अनेक बँकांचे बारा वाजले आहेत. बर्नाड यांच्या या यादीत स्पेन, ब्रिटनमधील काही बँकांचाही समावेश आहे. मेडाफ यांनी 50 अब्ज डॉलरचा घोटाळा केला असून आतापर्यंत जगeत हा पहिलाच इतक्या मोठ्या प्रमाणावर झालेला बँक घोटाळा आहे.

सध्या मेडाफ यांना 1 कोटी डॉलरच्या जामिनावर मुक्त करण्यात आले आहे. मेडाफ यांचा घोटाळा उघड झाल्यानंतर जगभरातील बँकांमध्ये चौकशी सुरु झाली असून, मेडाफ यांच्या यादीत आपला समावेश आहे का? याचा तपास करण्‍याचे आदेश बँकांनी आपल्या कर्मचार्‍यांना दिले आहेत.

मेडाफ नॅसडॅक एक्सचेंजमध्ये गुंतवणूकदारांसाठी सल्लागार कंपनी चालवत. ते या माध्यमातून कंपनी आणि शेअरधारकांमध्ये दलालीचे काम करत. या सोबतच नॅसडॅकला अंधारात ठेवत मेडाफ उद्योगांना गुंतवणूक करण्यासाठी एक सल्लागार कंपनीही चालवत. परंतु, त्यांनी ही कंपनी फारसी प्रकाशात येऊ नये याची पुरेपुर काळजी घेतली होती.

या माध्यमातून ते युरोपियन गुंतवणूकदारांना आकर्षित करण्यासाठी अनेक खोटी आश्वासनेही देत. त्यांच्या या आश्वासनांची माहिती झाल्यानंतर इन्व्हेस्टमेंट बँकेने पाच वर्षांपूर्वीच त्यांच्यावर लक्ष ठेवण्‍यासाठी एक टीम स्थापन केली होती.

यानंतर आता कुठे या टीमला मेडाफ यांनी केलेल्या घोटाळ्याची माहिती मिळाली असून, त्यांनी यानंतर मेडाफ यांच्या विरोधात गुन्हा दाखल करत त्यांना अटक केली. परंतु, तोपर्यंत मेडाफ यांच्या धक्क्याने जगातील अनेक बँका कोसळल्या आहेत.

मेडाफ यांनी केलेल्या घोटाळ्याचा सर्वांत जास्त फटका स्पेनमधील सेनटेंडर बॅंकेला बसला आहे. यानंतर ब्रिटनमधील एबे बँक, एलायंनस् एण्ड लिस्टर, बॅडफर्ड एण्ड बिंगली आदी बँका आणि आर्थिक संस्थांना याचा जबर फटका बसला आहे. जवळपास 2.3 कोटी डॉलरपर्यंतचे नुकसान या बॅंकांना सहन करावे लागत आहे.

हा घोटाळा उघडकीस आल्यानंतरच अमेरिकी बाजाराचे बारा वाजले आहेत. आधीच अमेरिकेत जबदरस्त आर्थिक बंदी आली आहे. या सगळ्याचा परिणाम भारतीय बाजारावर जाणवतोच आहे. परंतु, अशियाई बाजारालाही मेडाफ यांच्या या कारनाम्याने मोठा फटका बसला आहे.

टाटा मोटर्सचा जमशेदपूर प्रकल्‍प 28 पासून बंद

Wed, 24 Dec 2008 20:58:25 +0530

आर्थिक मंदीच्‍या कारणांमुळे मागणी जोरदार घसरल्‍याने देशातील सर्वांत मोठ्या वाहन निर्माती कंपनी टाटा मोटर्सने जमशेदपूर वाहन प्रकल्‍पात चौथ्‍यांदा 'ब्लॉक क्लोजर'ची घोषणा केली आहे.

कंपनीचे प्रवक्ते पी.जे. सिंह यांनी या बंदची आज औपचारिक घोषणा करताना ऑटो क्षेत्रात कर्ज देणे बंद करण्‍यात आल्‍याने आणि मागणी कमी झाल्‍याने दि.28 ते 31 डिसेंबरपर्यंत बंद पाळण्‍यात येणार असल्‍याचे जाहीर केले आहे.

अमेरिकन अर्थव्यवस्था पूर्णतः मोडकळीस: बीडन

Sun, 21 Dec 2008 16:35:49 +0530

अमेरिकन अर्थव्यवस्था पुर्णतः मोडकळीस येण्‍याचा धोका निर्माण झाला असल्‍याची माहिती अमेरिकेचे नवनिर्वाचित उपराष्ट्राध्‍यक्ष जो बिडन यांनी दिली आहे. एका मुलाखतीत बिडन यांनी मान्‍य केले आहे, की देशाची अर्थव्‍यवस्‍था आमच्‍या अपेक्षेपेक्षाही खराब झाली आहे. ती सुधारण्‍यासाठी किमान 700 अब्‍ज डॉलरच्‍या प्रोत्‍साहन पॅकेजची आवश्‍यकता असल्‍याचे त्‍यांनी सांगितले.

आपल्‍या कारकिर्दीच्‍या पहिल्‍या वर्षात ओबामा प्रशासनासमोर अर्थव्यवस्था हीच प्राथमिकता असणार आहे.

रिलायन्स पाच हजार जणांना काढणार?

Thu, 11 Dec 2008 14:24:22 +0530

जागतिक आर्थिक मंदीचा फटका अंबानींच्या रिलायन्स समूहालाही बसला असून, आगामी काळात रिलायन्स आपल्या पाच हजार कर्मचाऱ्यांची कपात करणार असल्याचे वृत्त आहे.

कंपनीने आपल्या विविध विभागातील जवळपास पाच हजार कर्मचाऱ्यांना राजीनामा देण्यास सांगितले असल्याची माहिती मिळाली आहे. रिलायन्स रिटेलमध्ये सर्वाधीक कपात होण्याची शक्यता आहे.

कंपनीने अद्याप या वृत्ताला दुजोरा दिला नाही. परंतु आर्थिक मंदी अधिक गडद झाल्यास अशा स्वरूपाचे पाऊल उचलणे भाग असल्याचे कंपनीच्या एका अधिकाऱ्याने स्पष्ट केले आहे.

याहू इंडिया 60 जणांना नारळ देणार

Thu, 11 Dec 2008 12:23:35 +0530

इंटरनेट सेवा पुरवणाऱ्या याहू इंडिया कंपनीलाही आर्थिक मंदीचा फटका बसला असून, कंपनीतही नोकर कपात सुरू झाली आहे.

आपल्या 60 कर्मचाऱ्यांना काढण्यात येणार असल्याचे कंपनीने स्पष्ट केले असून, आतापर्यंत कंपनीने आपल्या भारताबाहेरील 1500 कर्मचाऱ्यांची कपात केली आहे.

आंतरराष्ट्रीय बाजारात स्पर्धेत टिकण्यासाठी कंपनीने हा निर्णय घेतल्याची माहिती कंपनीच्या अधिकाऱ्यांनी दिली आहे.

डाऊ पाच हजार जणांना घरी बसविणार

Tue, 09 Dec 2008 23:03:50 +0530

अमेरिकेत आर्थिक मंदीने आता भयावह स्वरूप धारण केले आहे. अनेकांच्या नोकर्‍या या मंदीने गिळंकृत केल्या आहेत. या मंदीची नवी शिकार रसायन क्षेत्रातील अग्रणी डाऊ ही कंपनी बनली आहे. कंपनीने आजच पाच हजार जणांची नोकरकपात आणि वीस प्रकल्पही बंद करणार असल्याचे जाहीर केले आहे. याशिवाय कंपनी आपले अनेक लहान व्यवसाय विकून टाकणार आहे.

मंदीला सामोरे जाण्यासाठी खर्च कपात हा एकमेव 'अजेंडा' राबविण्याचे कंपन्यांनी ठरविले आहे. त्यामुळेच नोकरकपात मोठ्या प्रमाणावर होत आहे. डाऊ ही रसायन क्षेत्रातील जगातील बड्या कंपनींपैकी एक आहे. आज जाहीर केलेल्या योजनेनुसार कंपनी २०१० पर्यंत सातशे दशलक्ष डॉलर्स रूपये वाचविणार आहे. याशिवाय कंपनी १८० प्रकल्प तात्पुरते बंद करणार असून सहा हजार तात्पुरत्या कर्मचाऱ्यांना घरी बसविणार आहे.

कोणते प्रकल्प बंद करणार व कोणत्या प्रकल्पातील कंपन्यांना काढून टाकणार याविषयी अजून अनिश्चितता आहे, असे कंपनीच्या प्रवक्त्याने सांगितले.

दरम्यान, भारतात भोपाळ येथे याच कंपनीच्या प्रकल्पात गॅस गळती झाली होती. सध्या पुण्याजवळ याच कंपनीचा प्रकल्प उभा रहात असून त्याला वारकर्‍यांनी मोठा विरोध केला आहे.

सोनीने दिला आठ हजार कर्मचार्‍यांना नारळ

Tue, 09 Dec 2008 18:49:39 +0530

आतापर्यंत अमेरिका आणि युरोपमध्ये पसरलेली आर्थिक मंदी आता आशिया खंडातील कंपन्यांच्या दारावर येऊन धडकली आहे. याचा पहिला फटका सोनी या बड्या कंपनीला बसला असून कंपनीने आपल्या आठ हजार कर्मचार्‍यांना काढून टाकण्याचा निर्णय तडकाफडकी घेतला आहे.

एवढेच नव्हे तर कंपनीने अनेक क्षेत्रातील गुंतवणूकही मागे घेतली असून १.१ अब्ज डॉलर्सपर्यंत खर्च कपात करण्याचे ठरविले आहे. पण या सगळ्यांपेक्षाही आठ हजार जणांना काढून टाकण्याचा निर्णय फारच धक्कादायक ठरला आहे. आशियात एवढ्या मोठ्या प्रमाणात नोकर कपात करणारी सोनी ही पहिलीच कंपनी आहे. सोनी सध्या अनेक व्यावसायिक संकटांचा सामना करत आहे. प्रतिस्पर्धी एप्पलचा आयपॉडच्या तुलनेत सोनी मागे पडली आहे, तर फ्लॅट स्क्रीन टिव्हीच्या विक्रीतही फारसा फायदा झालेला नाही.

सोनीने आता केलेली कपात सीमीत आहे की हा फक्त 'ट्रेलर' आहे, याविषयी तज्ज्ञांनी प्रश्नचिन्ह दर्शविले आहे. कंपनीचे जगभरात १ लाख ८६ हजार कर्मचारी आहेत. कंपनी चित्रपट निर्मितीपासून व्हिडीओ गेम्सपर्यंत विविध व्यवसायात आहे. त्यामुळेच आणखी कर्मचारी कपात होण्याची शक्यताही तज्ज्ञ नाकारत नाहीत. 'सोनीची कर्मचारी संख्या मोठी आहे. त्यामुळेच कर्मचारी कपात अजूनही होण्याची शक्यता आहे. सध्या सोनीच्या हातात नियमित फायदा देणारा कोणताही महत्त्वाचा व्यवसाय नाही, असे कतसुशिको मोरी या डायवा एसबी कंपनीच्या फंड मॅनेजरने सांगितले. आता नोकरकपातीनंतर व्यवसाय वाढविण्यासाठी सोनी काय करेल हे पहावे लागेल, असेही ते म्हणाले.

सोनीच्या शेअर्समध्येही लक्षणीय घसरण झाली आहे. वर्षभरात या शेअर्समध्ये ७० टक्क्यांनी घसरण झाली. नोकरकपातीच्या घोषणेनंतर शेअर्स ३. ९ टक्क्याने बंद होऊन १ हजार ८९६ येनवर बंद झाले.

आर्थिक मंदीने परमेश्वराची आठवण !

Mon, 08 Dec 2008 18:03:16 +0530

आर्थिक मंदीने लोकांना अडचणीत आणले असताना आगतिक झालेल्या लोकांनी आता परमेश्वराच्या दारी धाव घेतली आहे. इंग्लंडमध्ये चर्चमध्ये येणार्‍या भाविकांची गर्दी कधी नव्हे ते अचानक वाढली आहे. चर्च ऑफ इंग्लंडनेच ही माहिती दिली आहे.

चर्चमधील धर्माधिकार्‍यांच्या मते या मंदीने लोकांना आता त्यांच्या मुल्यांचाच पुनर्विचार करायला लावला आहे. चर्चच्या सेवेत एक रविवार या उपक्रमात गेल्या सप्टेंबरमध्ये ३७ हजार नव्या सदस्यांनी हजेरी लावली. गेल्या वर्षीच्या तुलनेत हा आकडा दुप्पट आहे.

हा काळ परिणामांचा आहे. आयुष्यात खूप मोठा धक्का बसल्याने बरेच लोक पुन्हा एकदा चर्चकडे वळू लागले आहेत, असे सांगून आर्चबिशप रेव्हरंड कॅनॉन पॉल बायस म्हणाले, की मूल झाले, अथवा लग्न झाले की किंवा आयुष्यातील जवळची व्यक्ती सोडून गेली, की लोक चर्चमध्ये जातात. सध्याचा आर्थिक पेचप्रसंगही असाच आहे.

मंदीवर सरकारची 20 हजार कोटींची मलमपट्टी

Sun, 07 Dec 2008 17:42:21 +0530

जागतिक मंदीच्‍या विळख्‍यात अडकलेल्‍या भारतीय अर्थव्‍यवस्‍थेला सावरण्‍यासाठी केंद्र सरकारने 20 हजार कोटी रुपयांच्‍या पॅकेजची घोषणा केली आहे. या पॅकेजअंतर्गत लहान उद्योगांना अनेक सवलती देण्‍यात येणार असून उद्योग सुरू करण्‍यासाठी 1 कोठी रुपयांपर्यंत कर्ज दिले जाणार आहे. या शिवाय सेंट्रल वॅटमध्‍ये 4 टक्के सवलती दिल्‍या जाणार आहेत.

सरकारने 5 लाख ते 20 लाख रुपयांपर्यंतच्‍या गृहकर्जाच्‍या व्‍यवजदरातही खास सुट देण्‍याचा निर्णय घेतला आहे. याशिवाय निर्यातीला प्राधान्‍य देण्‍यासाठी 350 कोटी रुपयांची तरतुद करण्‍यात आली आहे.

टाटांचे पोलाद मंदीतही मजबूत

Thu, 04 Dec 2008 15:03:02 +0530

जागतिक आर्थिक संकट जगभरातील जवळपास सर्वच कंपन्यांना भेडसावत आहे. या काळात कंपन्यांमध्ये उत्पादन कमी झाल्याने कर्मचारी कपात करण्याची वेळ कंपन्यांवर आली आहे. अशातच पोलाद निर्मितीत महत्त्वाची कंपनी असलेल्या टाटा स्टीलला मात्र मंदीच्या काळात चांग लाच फायदा झाला आहे.

या काळात कंपनीने आपल्या उत्पन्नात वाढ झाल्याचे स्पष्ट केले असून, नफा 1400 कोटीने वाढल्याचे स्पष्ट केले आहे. यानंतर कंपनी जगातील प्रमुख सहा कंपन्यांच्या यादीत समाविष्ट झाली आहे.

कंपनीने आज अधिकृतपणे जाहीर केलेल्या आकडेवारीनुसार कंपनीने नोव्हेंबर दरम्यान 578400 टन हॉट मेटल आणि 513789 टन क्रूड स्टील तयार केले. गेलयावर्षीच्या मानाने यात 26 आणि 23 टक्क्यांची वाढ झाली आहे.

जेटने पुन्हा केली नोकर कपात

Wed, 03 Dec 2008 23:05:07 +0530

जागतिक आर्थिक मंदीचा फटका बसल्यानंतर आज पुन्हा जेट एअरवेजने आपल्या काही कर्मचाऱ्यांना नारळ दिले असून, अनेक कर्मचाऱ्यांच्या पगारात कपात करण्याचा निर्णय घेतला आहे.

कंपनीने दिलेल्या माहितीनुसार कर्मचाऱ्यांच्या पगारात 25 टक्के कपात करण्यात आली असून, पुढील वर्षभरापर्यंत कर्मचाऱ्यांना कमी वेतनात काम करावे लागणार आहे.

नेमके किती जणांना काढण्यात आले हे सांगण्यास कंपनीने नकार दिला असून, मुंबईत झालेल्या हल्ल्यांचा फटकाही कंपनीला बसल्याचे जेटने स्पष्ट केले आहे.

ऑक्टोबरमध्ये कंपनीने एकदाच शेकडो कर्मचाऱ्यांना नोकरीवरून काढण्याची घोषणा केली होती, परंतु यानंतर देशभरात जेटविरोधात वातावरण तयार झाल्याने जेटने या कर्मचाऱ्यांना पुन्हा कामावर घेण्याची घोषणा केली होती. आता पुन्हा एकदा जेटने आपल्या कर्मचाऱ्यांना कामावरून कमी केले आहे.

मेरिल कर्मचाऱ्यांचा बोनस कापणार

Wed, 03 Dec 2008 18:19:41 +0530

अमेरिकेतील मेरिल लिंच कंपनीने वर्षभरात आपल्या कर्मचाऱ्यांना देण्यात येणाऱ्या बोनसमध्ये कपात करण्याचा निर्णय घेतला असून, कर्मचाऱ्यांचा 50 टक्के बोनस कापण्यात येणार असल्याचे बँकेने स्पष्ट केले आहे.

जागतिक आर्थिक मंदीचा फटका कंपनीला बसल्याने कंपनीने हा निर्णय घेतल्याचे कंपनीच्या व्यवस्थापनाने स्पष्ट केले आहे.

न्यूयॉर्क टाईम्स करणार 530 कर्मचाऱ्यांची कपात

Wed, 03 Dec 2008 18:19:39 +0530

जागतिक आर्थिक मंदीचा फटका मिडियालाही सहन करावा लागत असून, अमेरिकेतील मोठे दैनिक असलेल्या न्यूयॉर्क टाईम्सनेही आपल्या वितरण विभागातील 530 जणांना नारळ देण्याची घोषणा आज केल्याने खळबळ उडाली आहे. कंपनीने सिटी एंण्ड सबअर्बन बंद केल्याने या कर्मचाऱ्यांची कपात करण्यात येत आहे.

टाटांच्या आणखी एका कंपनीत' ब्लॉक क्लोजर'

Tue, 02 Dec 2008 17:34:30 +0530

जागतिक आर्थिक मंदीचा चांगलाच फटका टाटा उद्योगाला बसला असून, टाटांच्या जमशेदपूर येथील आणखी एका कंपनीत चार दिवसांसाठी ब्लॉक क्लोजर जाहीर करण्यात आल्याने उद्योग जगतात चिंतेचे वातावरण आहे.

टाटांच्या जमशेदपूर येथील टेल्को कंन्स्ट्रक्शन इक्विपमेंट कंपनीने आज चार दिवसांसाठी कंपनीत काम बंद करण्याचा निर्णय घेतला आहे.

या कंपनीत टाटांची 60 टक्के तर जपानच्या हिताची कंपनीची 40 टक्के गुंतवणूक आहे. या कंपनीने आर्थिक मंदीचा फटका बसल्यानंतर उत्पादनात 50 टक्के कपात केली आहे. टेल्कॉन वर्कर्स युनियनचे अध्यक्ष रामचंद्र यांनी या वृत्ताला दुजोरा दिला आहे.

सिटी ग्रुप जपानमधील शाखा विकणार

Sun, 30 Nov 2008 19:24:44 +0530

मंदीच्या विळख्यात अडकलेल्या सिटी ग्रुप इंकार्पने जपानमधील निक्कोसिटी ट्रस्ट एंण्ड बँकिंग कॉर्पोरेशन ही आपली शाखा विकण्याचा निर्णय घेतला आहे. या व्यवहारातून बँकेला 40 अब्ज येन मिळण्याची शक्यता वर्तवली जात आहे.

लवकरच ही निलामी होणार असून, यात जपानमधील प्रमुख बँक मित्सुबिशी यू एफ् जे समूहाला सूमितोमो ट्रस्ट आणि मिजुहो ट्रस्ट या प्रमुख बँका सहभागी होण्याची शक्यता आहे.

जपानमधील वर्तमानपत्रांनी या संबंधीचे वृत्त प्रकाशित केले असून, 10 ते 20 अब्ज येनमध्ये हा करार होण्याची शक्यता त्यांनी वर्तवली आहे.

बँक अधिकाऱ्यांनी बलिदान द्यावे- ओबामा

Wed, 26 Nov 2008 17:47:10 +0530

अमेरिकेत आलेल्या आर्थिक मंदीतून मार्ग काढण्यासाठी कर्मचारी कपात करण्या ऐवजी बँकेच्या वरिष्ठ अधिकाऱ्यांनी बलिदान देत आपल्या वेतनात कपात करावी असे आवाहन अमेरिकेचे नवनियुक्त राष्ट्राध्यक्ष बराक ओबामा यांनी केले आहेत.

बँकेची परिस्थिती खराब असल्याने कर्मचारी कपात हा त्यावर एकमेव तोडगा नसून, कपात करण्याऐवजी आपली सामाजिक जबाबदारी लक्षात घेऊन बँकेच्या अधिकाऱ्यांनी आपल्या पगारात कपात करण्याचा निर्णय घेणे गरजेचे असल्याचे ओबामा म्हणाले.

फेडरल बँकेचे 'बेल आऊट' पॅकेज जाहीर

Wed, 26 Nov 2008 17:24:38 +0530

मंदीच्या कचाट्यात अडकलेल्या अमेरिकी उद्योगांना नवसंजीवनी देण्यासाठी अमेरिकी सरकारने 700 अब्ज डॉलरचे विशेष पॅकेज जाहीर करूनही काही फायदा न झाल्याने अमेरिकी फेडरल बॅकेने आज 800 अब्ज डॉलरच्या पॅकेजची घोषणा केल्याने अमेरिकी उद्योजकांनी दिवाळी साजरी केली आहे.

अमेरिकेत घर विकत घेण्यासाठी आणि निर्माण खर्च कमी करण्यासाठी या पॅकेजची घोषणा करण्यात आल्याचे बँकेने स्पष्ट केले आहे.

गेल्या सात वर्षांमध्ये अमेरिकी बाजारात मोठी घसरण झाली असून, घराच्या किंमतींमध्ये 17.4 टक्क्यांची घसरण दिसून आली आहे.

बँकेने दिलेल्या माहितीनुसार देशातील बाजारातील उत्पादनही घटले आहे. संपूर्ण देशाला मंदीचा फटका बसला असून, कर्जदारांना दिलासा देण्यासाठी हे पॅकेज उपयोगी असल्याचे बँकेने स्पष्ट केले आहे.

कोळशा क्षेत्रावर मंदीचा परिणाम नाही- दीक्षित

Wed, 26 Nov 2008 16:44:47 +0530

जागतिक आर्थिक मंदीचा परिणाम भारतीय कोळसा उद्योगावर पडला नसल्याने या क्षेत्रात मुळीच नोकर कपात करण्यात येणार नसल्याचे आज साऊथ इस्टर्न कोल फील्ड लिमिटेडचे अध्यक्ष एम पी दीक्षित यांनी स्पष्ट केले आहे.

भारतीय कोळसा उद्योगात मंदीचा कोणताही परिणाम झाला नसून, या क्षेत्रात आगामी शंभर वर्षांमध्ये मंदी फिरकरणारही नसल्याचे त्यांनी स्पष्ट केले.

सध्या विविध प्रकल्पांसाठी कर्मचाऱ्यांची गरज असल्याने तूर्तास 581 कर्मचाऱ्यांची भरती कंपनीने केली असून, गेल्यावर्षी 749 कर्मचारी भरण्यात आले असल्याचे ते म्हणाले.

मंदीची संक्रांत कापड उद्योगावर

Wed, 26 Nov 2008 15:06:56 +0530

अर्थमंत्री पी. चिदंबरम भारतात अजूनही आर्थिक मंदीची सुरवात झालेली नाही, असे सांगत असले तरी त्यांच्याच गृहराज्यात मात्र या मंदीचे पडसादही उमटू लागले आहेत. तमिळनाडूतील कापड उद्योगातील उत्पादन या मंदीमुळे तब्बल ७२ टक्क्यांनी कमी झाले आहे. आंतरराष्ट्रीय बाजारातील मागणी घटल्याने ही वेळ आली आहे.

राज्यात कापड उद्योगात पन्नास अब्ज रूपयांची गुंतवणूक आहे. पण मंदीमुळे या उद्योगाची अवस्था अतिशय गंभीर आहे. अनेक कापड गिरण्या बंद पडण्याच्या स्थितीत आहेत. ब्रिटन व अमेरिकेतील अनेक मोठ्या ऑर्डर्स रद्द झाल्या आहेत. धागे उत्पादकांवरही संक्रांत कोसळली आहे. कारण बांगलादेश व मध्यपूर्वेतून येणार्‍या ऑर्डर्स मंदावल्या आहेत.

या सगळ्यामुळे पन्नास टक्के कामगार बेरोजगार झाले आहेत. ही स्थिती आणखी गंभीर होण्याची शक्यता या उद्योगातील सूत्रांनी सांगितले. हा काळ आतापर्यंतचा सगळ्यात कठीण असल्याची माहिती त्यांनी दिली.

कापड उद्योगांत पाकिस्तान व चीनसह भारत एक महत्त्वाचा देश आहे. पाकिस्तान व चीनने मंदीला तोंड देण्यासाठी उपाय योजले आहेत. पण भारतात मात्र सरकारने काहीही उपाययोजना न केल्याने स्थिती गंभीर बनली आहे. त्यामुळे आगामी काळात अनेक गिरण्या बंद पडतील आणि कामगार बेकार होतील अशी भीती साऊथ इंडिया स्मॉल स्पिनर्स असोसिएशनचे अध्यक्ष सुंदर राजन यांनी सांगितले.

वस्रोद्योगासाठी सरकारचे 'बेल आऊट'

Tue, 25 Nov 2008 18:22:40 +0530

वस्रोद्योगात आलेल्या मंदीचा सर्वांनी एकजूटीने सामना करणे गरजेचे असून, ही मंदी फारकाळ टिकणार नसल्याचे मत केंद्रीय वस्त्रोद्योगमंत्री शंकरसिंह वाघेला यांनी व्यक्त केले आहे.

पुढील वर्षांपर्यंत या क्षेत्रात पुन्हा एकदा वाढ दिसून येणार असल्याचे भाकीतही त्यांनी या प्रसंगी केले. वस्रोद्योग क्षेत्राला नवसंजीवनी देण्यासाठी 300 ते 2 हजार कोटी रुपयांची मदत देण्याची घोषणाही त्यांनी केली.

जागतिक मंदीमुळे वस्रोद्योगातील पाच लाखांवर कर्मचारी बेकार होण्याची भीती व्यक्त करतानाच निर्यातीवरही याचा परिणाम होणार असल्याचे त्यांनी स्पष्ट केले.

विक्रम पंडित यांची गच्छंती टळली?

Mon, 24 Nov 2008 23:05:16 +0530

सिटी ग्रुप दिवाळखोरीच्या मार्गावर आल्यानंतर कंपनीचे प्रमुख विक्रम पंडित यांच्या हकालपट्टीच्या बातम्या गेल्या काही दिवसांपासून येत होत्या. आज अमेरिकी सरकारने सिटी ग्रुपला आर्थिक मदत जाहीर केल्यानंतर विक्रम पंडित यांची गच्छंतीही टळली असल्याचे मानले जात आहे.

गेल्या वर्षभरात कंपनीचे 74 हजारांवर कर्मचारी काढण्यात आले असून, कंपनीची आर्थिक अवस्था खराब असल्याने आणखी कर्मचारी कपात करण्यात येणार असल्याचे बोलले जात होते. यानंतर कंपनीचे प्रमुख विक्रम पंडित यांनाही आपल्या पदाचा राजीनामा द्यावा लागणार अथवा त्यांची हकालपट्टी होणार असल्याचे बोलले जात होते.

आज अमेरिकेने सिटी ग्रुपसाठी विशेष पॅकेज जाहीर केल्यानंतर आता पंडितांनीही आनंद व्यक्त केला असून, आता कंपनी आणि ग्राहकांसाठी वाट्टेल ते करण्याची आपली तयारी असल्याचे त्यांनी स्पष्ट केले आहे.

टाटांच्या ब्लॉक क्लोजरने 500 कोटीचा फटका

Mon, 24 Nov 2008 18:46:55 +0530

देशातील सर्वात मोठी कार उत्पादक कंपनी असलेल्या टाटा मोटर्सने आपल्या जमशेदपूर येथील कारखान्यात अचानक ब्लॉक क्लोजर जाहीर केल्यानंतर टाटांच्या सहाय्यक कंपन्यांनाही टाळे लागले असून, या कंपन्याही बंद पडल्याने 500 कोटीचा फटका या उद्योगांना बसल्याचे बोलले जात आहे.

ट्रक, डंपर, आणि इतर अन्य वाहन बनवणाऱ्या टाटा मोटर्सचे काम थांबल्याने लघु उद्योजकांचे मोठे नुकसान झाल्याचे या उद्योजकांच्या संघटनेचे अध्यक्ष एस एन ठाकुर यांनी स्पष्ट केले आहे.

टाटांनी कालच या कंपनीत ते 25 ते 29 तारखेपर्यंत ब्लॉक क्लोजर जाहीर केले. यानंतर कंपनीच्या सहाय्यक कंपन्यांनीही आपल्या कर्मचाऱ्यांना सुटी जाहीर केली असून, आता या कंपन्या 1 डिसेंबर रोजीच सुरू होतील असे ठाकुर यांचे म्हणणे आहे.

भारतीय बाजारात मंदी नाही - चिदंबरम

Mon, 24 Nov 2008 18:46:53 +0530

महागाईशी दोन हात करण्यासाठी सरकार सज्ज असून या कामात कोणताही हलगर्जीपणा खपवून घेतला जाणार नसल्याचे स्पष्ट करतानाच योग्य वेळ आल्यानंतर आवश्यक वस्तूंचे भाव स्थिर करण्यात येतील असे मत अर्थमंत्री पी चिदंबरम यांनी व्यक्त केले. सरकार संपूर्णपणे बाजारावर लक्ष केंद्रित करून असल्याचे ते म्हणाले.

महागाई वाढण्यापासून रोखण्यासाठी सरकारने अनेक वस्तूंची निर्यात रोखली असून, यामुळे बाजारात वस्तूंचे भाव स्थिर होण्यास मदत होणार असल्याचे चिदंबरम म्हणाले.

जागतिक आर्थिक मंदी असतानाही भारताचा विकासदर सातत्याने वाढत असून, चालू आर्थिक वर्षात विकासदर सात ते आठ टक्क्यांवर पोहचेल असा विश्वासही त्यांनी व्यक्त केला.

भारतीय बाजारात मंदीसारखे काही नसून, माध्यमांनी या शब्दाचा उपयोग करणे टाळावे असे आवाहनही त्यांनी केले.

अमेरिका सिटी ग्रुपला मदत करणार

Mon, 24 Nov 2008 16:19:27 +0530

बुडीत खात्यात निघालेल्या अमेरिकेतील सर्वात मोठ्या सिटी ग्रुप आणि त्यांच्या वित्तीय संस्थांना अखेर अमेरिकी अर्थखात्याने मदत करण्‍याचे जाहीर केले असून, सिटी ग्रुपला 20 अब्ज डॉलरची मदत करण्‍याची घोषणा सरकारने केली आहे.

अमेरिकेतील या सर्वात मोठ्या बँकेला बुडीत खात्यात निघण्यापासून रोखण्यात येणार असून, बँकेचे समभाग विकत घेण्यात येणार असल्याचे अमेरिकी सरकारने स्पष्ट केले आहे.

गेल्या काही दिवसांपासून बँक दिवाळखोरी जाहीर करण्‍याची तयारी करत असल्याचे वृत्त सातत्याने येत असल्याने बँकेच्या संचालक मंडळावरही निर्माण झालेला दबाव यानंतर काहीसा कमी झाल्याचे बोलले जात आहे.

नोकरी गेल्यानंतर पुढे काय?

Mon, 24 Nov 2008 14:26:55 +0530

अचानक नोकरी जाणे हे एखाद्या दुस्वप्नासारखे असते. अचानक सगळे थांबल्यासारखे वाटते आणि भवितव्याची चिंता मन पोखरू लागते. सगळे काही अनिश्चित बनते. अशा वेळी आशेचा किरण शोधणे हे अतिशय धैर्याचे आणि संयमाचे काम आहे. पण हाच आशेचा किरण आपल्याला पुढे नेऊ शकतो. भविष्यकालीन अनिश्चितता संपवू शकतो. म्हणून तो किरण आपल्या मनातूनच काढून पृष्ठभागावर आणला पाहिजे.

विमनस्क होऊ नका.
नोकरी गेल्यानंतरही सैरभैर होऊ नका. शांत व्हा. स्थिरचित्त व्हा. विमनस्क होऊ नका. विचारशक्ती सुरू रहाणे या काळात अत्यंत गरजेचे आहे. आशावाद हाच तुम्हाला या परिस्थितीतून मार्ग काढण्यासाठी उपयुक्त ठरू शकतो. या आशावादी दृष्टिकोनातून लोकांमध्ये मिसळा. त्यामुळेच तुम्हाला दुसरी नोकरी वा रोजगाराचे दुसरे साधन मिळू शकतो. शिवाय हा दृष्टिकोन इतरांवर प्रभाव पाडून तुमच्याविषयी सकारात्मक मन बनविण्यासाठी प्रेरणादायक ठरू शकतो. नोकरी गेल्यानंतरही मिळणार्‍या 'पॅकेज'कडे नीट लक्ष द्या. त्यानंतरच्या शक्यता आजमावा. भावी करीयरसाठी काय करता येईल याचा नीट विचार करा. कंपनीकडून काही प्रशिक्षण मिळते आहे का ते बघा. कदाचित या प्रशिक्षणातून तुम्हाला पुढचा रोजगाराचा मार्ग सापडू शकतो.

संधीचा फायदा घ्या.
हा काळ म्हणजे संधी समजा. करीयरचा पर्याय स्वीकारताना कदाचित तुमची भरभराटच होईल. एरवी नोकरीत असताना तुम्ही कधी याचा विचारच केला नसता, ती संधी आता तुम्ही साधू शकता. एक लक्षात ठेवा जीवन हे विविध पर्यायांनी भरलेले असते. हे नाही तर ते आयुष्यात असतेच. त्यामुळे ही नाही तर दुसरी नोकरी तुम्ही पकडू शकता. संधींचा शोध घेण्यासाठी एखाद्या व्यावसायिक सल्लागाराची मदत घेतली तरी चालेल.

तब्बेतीला जपा.
या काळात तब्बेतीकडे लक्ष द्या. त्यासाठी दिनचर्या व्यवस्थित राहू द्या. तणावमुक्त रहा. खर्चात कपात करावीच लागेल. पण आरोग्य खर्च हा यात सगळ्यात शेवटी यायला हवा. तुमची तब्बेतच चांगली राहिली की आपोआपच त्यावरचा खर्चही कमी येईल. आपल्या जवळच्या लोकांकडून मदत घ्या. अभिमान, गर्व वगैरे जरा बाजूला ठेवा. तुमच्या चांगल्या संपर्कामुळेच तुम्हाला कदाचित भवितव्य घडवता येऊ शकेल.

सकारात्मक विचार करा.
सकारात्मक विचारांमुळे सकारात्मक उर्जा उत्पन्न होते. ती नकारात्मकतेला दूर ठेवते. नकारात्मक विचार येणार नाहीत, असे नाही. पण त्यांचा विचार करू नका. म्हणूनच चांगल्या लोकांना ऐका. त्यांच्या सानिध्ध्यात रहा. त्यामुळे चांगले विचार तुमच्याही मनात येतील. त्यांच्याकडून कदाचित तुम्हाला चांगला सल्ला मिळू शकेल. म्हणून मनाचा रस्ता मोकळा ठेवू द्या. बाहेरून चांगले विचार त्या रस्त्याद्वारे तुमच्या मनात येऊ शकतील. उदासीचे मळभ बाजूला करा. तर्कदृष्ट्या विचार करा. नकारात्मक मत नोंदवू नका. तसे केल्यास तुमचे विचारही तसेच होतील. म्हणून वाचनही प्रेरणादायी, सकारात्मक करा.

योग्य वेळेची वाट पहा.
तुमच्या मनात काय करायचे आहे ते नक्की करून ठेवा. त्यासाठी वाट पहा. वेळ आल्यानंतर, संधी मिळाल्यानंतर ती साधून घ्या. पण त्यासाठी वेळेची वाट पहा. त्यासाठी थोडा संयम राखा. स्वतः बनवलेल्या नियमांचे पालन करा. एखादी गोष्ट साध्य करण्यासाठी तुमच्यात काही कमी असेल तर ती दूर करा. काहीवेळा तुमच्याकडे जे जास्त असते तेही अशावेळी अडथळा ठरते. अशावेळी त्याला थोडे झाकून ठेवा.

कुटुंबाला विश्वासात घ्या.
ही सगळ्यात महत्त्वाची बाब आहे. कौटुंबिक बाबतीत शांतता राहू द्या. पत्नी, मुलांना विश्वासात घेऊन सगळ्या गोष्टी सांगा. त्यामुळे या कसोटीच्या काळातही त्यांना आपल्यावरची जबाबदारी लक्षात येईल. घरातील ताणतणाव दूर होतील. हे बघा, घरचा पाठिंबा तुमच्या पाठिशी असेल तर अवघडातील अवघड काम तुम्ही कराल. घरची शांतता, तुमचे मनही शांत ठेवते. ही शांतताच पुढे जायला बळ देते. आता नोकरी नाही हे समजून घेऊन खर्च करा. तुमचे खरे मित्रही या काळात ओळखू येतील. पैसा नसल्यावर जे मित्र तुमच्यापासून निघून जातील, तुमच्याबरोबर रहायला टाळाटाळ करतील ते तुमचे खरे मित्र नाही हे ओळखा. सकारात्मक विचार करून खर्चावर नियंत्रण राखा.

सिटीग्रुपला तारण्‍यासाठी प्रयत्‍न सुरू

Mon, 24 Nov 2008 13:13:06 +0530

सिटीग्रुपच्‍या 'बॅलेंस शीट'वरून अब्‍जावधी डॉलरच्‍या संकटग्रस्त संपत्तींना हटवून बँकेला तारण्‍यासाठी शेवटचे प्रयत्‍न सुरू झाले असून आता त्‍यावरच सिटीग्रुपची भिस्‍त राहणार आहे.

सिटीग्रुपला मॉर्गेजसंबंधीच्‍या गुंतवणुकीमुळेच मोठ्या प्रमाणावर तोटा सहन करावा लागला असून मिळालेल्‍या माहितीनुसार सिटीग्रुप एका ठराविक पातळीपर्यंत हे नुकसान सहन करून उर्वरित नुकसान सरकारला सोसावे लागणार आहे.

यासंदर्भात 'न्यूयॉर्क टाइम्स'ने दिलेल्‍या वृत्तानुसार जर सरकारला मोठा तोटा सहन करावा लागला तर या बँकेत सरकारची भागिदारी वाढविली जाणार आहे.

टाटात पुन्हा 'ब्लॉक क्लोजर'

Sun, 23 Nov 2008 19:35:47 +0530

देशातील मोठी कार उत्पादक कंपनी असलेल्या टाटा मोटर्सने पुन्हा एकदा आपला कारखाना पाच दिवसांसाठी बंद ठेवण्याचा निर्णय घेतला आहे.

एका महिन्यात टाटांनी आपल्या प्रकल्पात दुसऱ्यांदा 'ब्लॉक क्लोजर' जाहीर केल्याने उद्योग जगतात चिंता निर्माण झाली आहे. टाटांनी पाच दिवस कारखाने बंद करण्याची घोषणा केली असली तरी सहा दिवस प्रकल्प बंद राहणार आहेत.

25 ते 29 नोव्हेंबर या काळात जमशेदपूर कारखाना बंद राहणार असून, तीस तारखेला रविवार असल्याने या दिवशीही कारखाना बंदच राहणार असल्याचे टाटा कंपनीच्या अधिकाऱ्यांनी स्पष्ट केले आहे.

जागतिक आर्थिक मंदीचा फटका सध्या देशातील उद्योगांना भेडसावत असून, मंदीमुळे सलग दुसऱ्यांदा टाटांनी काम बंद केल्याने आर्थिक मंदी आपले पाय भारतातही पसरत असल्याचे तज्ज्ञांचे म्हणणे आहे.

यापूर्वी टाटांनी सहा ते आठ नोव्हेंबर या दरम्यान तीन दिवसांसाठी काम बंद करण्याची घोषणा केली होती.

मंदी रोखण्यात पंतप्रधानांना अपयश- भाजप

Sun, 23 Nov 2008 18:28:22 +0530

जागतिक आर्थिक मंदीचा फटका भारतालाही बसला असून, देशाचे पंतप्रधान मोठे अर्थतज्ज्ञ असतानाही देशाला हा फटका बसल्याने पंतप्रधानांचे अपयश उघड झाल्याचा आरोप भारतीय जनता पार्टीने केला आहे.

भाजप सरचिटणीस अरुण जेटली यांनी आज नियमित पत्रकारपरिषदेत पंतप्रधानांच्या आर्थिक धोरणावर टीका केली.

अर्थमंत्री पी चिदंबरम आणि स्वतः: पंतप्रधान अर्थतज्ज्ञ असतानाही भारतीय अर्थव्यवस्थेला आर्थिक मंदीचा फटका बसला असून, भारतावर आलेले संकट रोखण्यात उभय नेत्यांना अपयश आल्याचा आरोप जेटली यांनी या प्रसंगी केला.

जनरल मोटर्स दिवाळखोरीकडे?

Sun, 23 Nov 2008 17:08:12 +0530

आर्थिक मंदीचा विळखा अमेरिकेत वाढत असून, अमेरिकेतील सर्वात मोठी कार उत्पादक कंपनी असलेल्या जनरल मोटर्सनेही आता आपण दिवाळखोरीत निघाल्याचे मान्य केले असून, लवकरच कंपनी याची घोषणा करण्याची शक्यता आहे.

अमेरिकन प्रसार माध्यमांनी आज याविषयीचे वृत्त प्रकाशित केले असून, कंपनीतील संचालक मंडळात याविषयी मतभेद असल्याचे माध्यमांचे म्हणणे आहे.

अमेरिकेत सध्या जबरदस्त आर्थिक मंदी असून, अनेक कंपन्या दिवाळखोरीत निघाल्या आहेत. कंपनीने दिवाळखोरी जाहीर करू नये म्हणून संचालक मंडळाचे प्रयत्न सुरू असून, शेवटचा पर्याय म्हणून कंपनी दिवाळखोरी जाहीर करू शकते असे मत तज्ज्ञांनी व्यक्त केले आहे.

फेडरल बँक करणार नोकर भरती

Sun, 23 Nov 2008 16:26:42 +0530

जागतिक आर्थिक मंदीचे सावट वाढत असतानाच अनेक बँकांनी आपल्या कर्मचाऱ्यांची कपात करण्याचा निर्णय घेतला आहे, असे असताना फेडरल बँक लिमिटेडने मात्र आगामी काळात देशात आपल्या शाखांमध्ये वाढ करण्याचा निर्णय घेतला आहे.

शाखांची संख्या वाढवण्यात येणार असल्याने बॅकेने आपल्या कर्मचाऱ्यांचीही संख्या वाढवण्याचा निर्णय घेतला असून, तीन हजार कर्मचाऱ्यांची भरती करण्यात येणार असल्याचे बँकेने स्पष्ट केले आहे.

बँकेचे प्रबंध निदेशक आणि मुख्य कार्यकारी अधिकारी एम वेणुगोपालन यांनी आज माहिती जाहीर केली. 2011 पर्यंत बँकेचे उत्पन्न एक लाख करोडपर्यंत पोहचवण्यात येणार असल्याचे ते म्हणाले. यासाठी बँकांच्या शाखांची संख्या वाढवण्यात येणार असून, कर्मचारी संख्याही वाढवण्यात येणार असल्याचे त्यांनी स्पष्ट केले.

विश्वासाचा दोरा अजून तुटला नाही- लघु उद्योग

Sun, 23 Nov 2008 15:44:35 +0530

जागतिक आर्थिक मंदीचा फटका बसल्यानंतरही देशातील लघु उद्योजकांमध्ये विश्वास कायम असून, सरकार आणि ग्राहकांच्या बळावर आलेल्या संकटाचा सामना करण्यात यश येईल असा विश्वास देशातील लघु उद्योजकांनी व्यक्त केला आहे.

आर्थिक मंदीने सध्या बँकांनी कर्ज देणे आवरते घेतले असून, गुंतवणूकदारांनी बाजाराकडे पाठ केल्याने लघु उद्योगावर बेकारीची कुऱ्हाड कोसळली आहे.

सध्या राजधानी दिल्लीत भारतीमय आंतरराष्ट्रीय व्यापार मेळ्यात देशभरातून अनेक लघु उद्योजक सहभागी झाले आहेत. यात आलेल्या उद्योजकांमध्ये अजूनही उत्साह कायम असून, सरकारसोबत बांधला गेलेला विश्वासाचा दोरा जोपर्यंत बळकट आहे, तोपर्यंत आपल्याला कोणतेही भय नसल्याचे या व्यापाऱ्यांचे म्हणणे आहे.

जेट एअरवेजचे कर्मचारी पुन्‍हा अडचणीत

Sun, 23 Nov 2008 12:31:14 +0530

जेट एअरवेजच्या 1900 कर्मचा-यांना कामावरून काढून टाकल्‍यानंतर झालेल्‍या वादावर पडदा पडतो न पडतो तोच पुन्हा कर्मचा-यांना एका नव्‍या संकटाचा सामना करावा लागणार आहे. जेटच्या व्‍यवस्‍थापनाने मंदीच्‍या पार्श्‍वभूमीवर कर्मचा-यांच्या पगारात 20 टक्के कपात करण्याचं धोरण अवलंबले आहे.

यासाठी जेट एअरवेजचे चेअरमन नरेश गोयल यांनी पायलट, इंजिनिअर आणि अन्य अधिकाची रविवारी बैठक बोलावली आहे. या बैठकीत व्‍यवस्‍थापनाच्‍या निर्णयावर कर्मचा-यांची मते जाणून एकत्रितपणे निर्णय घेतला जाणार आहे. गेल्‍या वर्षभरापासून जेट एअरवेजला मोठा तोटा सहन करावा लागत आहे. त्‍यावर मात करण्‍यासाठी पावले उचलली नाहीत तर यापुढे कंपनी चालवणे कठीण होईल अशी व्‍यवस्‍थापनाची भूमिका आहे.

आता विक्रम पंडितांचीच गच्छंती?

Sat, 22 Nov 2008 15:44:46 +0530

जागतिक मंदीचा फटक्याने शेअर बाजारात गटांगळ्या खात असलेल्या सिटी ग्रुपने आता आपले मुख्य कार्यकारी अधिकारी विक्रम पंडीत यांचीच गच्छंती करण्याचे ठरवल्याचे कळते. मुळचे मराठी असलेले पंडित गेल्याच वर्षी बॅंकेचे सीईओ बनले होते. कठीण परिस्थितीतून बॅंकेला ते बाहेर काढतील या आशेने त्यांना या पदावर नेमण्यात आले होते.

सिटीग्रुपला वाचविण्यासाठी सध्या वेगवान हालचाली सुरू आहेत. सरकारी मदत घेणे किंवा बॅंकेचा काही व्यवसाय इतर बॅंकांना विकणे हा त्यांच्यासमोरचा पर्याय आहे. याचसंदर्भात सध्या बैठकांवर बैठका सुरू आहेत. अनेक पर्याय विचारात घेतले जात आहेत. विक्रम पंडितांची हकालपट्टी करण्यापासून ते अगदी संपूर्ण बॅंक अथवा तिचा काही भाग विकण्यापासूचे पर्याय आजमावले जात आहेत.

बॅंकेला या कठिण परिस्थितीतून बाहेर काढण्यासाठी पन्नास ते शंभर अब्ज डॉलर्सची आवश्यकता आहे. पण यापुढे काय कृती केली जाणार हे अद्याप स्पष्ट झालेले नाही.

विक्रम पंडितांचा प्रवास
श्री. पंडित जगातील सर्वांत मोठी बॅंक असलेल्या सिटी ग्रुपचे गेल्या वर्षी मुख्य कार्यकारी अधिकारी (सीईओ) बनले. सोळाव्या वर्षी अमेरिकेत शिकण्यासाठी गेलेल्या पंडीतांनी उच्च शिक्षण घेऊन तिथेच कारकिर्दीची श्रीगणेशा केला आणि मॉर्गन स्टॅन्लेसारख्या मोठ्या कंपन्यांमध्ये काम करत अखेर सिटी ग्रुपच्या सीईओपदापर्यंतचा टप्पा गाठला. शेगावच्या गजानन महाराजांवर नितांत श्रद्धा असणारे पंडीत आज एवढ्या मोठ्या पदावर असले तरी मनाने निखळ मराठी आहेत.

सिटी बॅंक 'झोपण्याची' शक्यता

Sat, 22 Nov 2008 15:44:43 +0530

सिटी नेव्हर स्लिप असे बोधवाक्य असणारी सिटी बॅंकही आता कायमस्वरूपी झोपण्याच्या तयारीत आहे. जागतिक मंदीच्या विळख्यात आता जगातील मोठ्या बॅंकांपैकी एक असलेली सिटी बॅंकही सापडली असून मंदीने बॅंकेला गिळंकृत करून टाकण्याचे ठरविल्याचे दिसते. कालच बॅंकेच्या शेअर्स २५ टक्के खाली आल्यानंतर आता सिटीग्रुपने स्वतःला विकण्यासाठी चाचपणी सुरू केली असून विलिनीकरणाचा पर्यायही चाचपून पाहिला जात आहे. विक्रम पंडीत या मराठी माणसाने याच वर्षी या बॅंकेच्या अध्यक्षपदाची सूत्रे हातात घेतली होती.

या आठवड्यात बॅंकेचे शेअर्स पन्नास टक्के खाली आले आहेत. त्यामुळेच बॅंकेने आता सध्या तरी विलिनीकरणावर गंभीर विचार करायला सुरवात केली आहे. अर्थात याविषयीची चर्चा अत्यंत गोपनीय असून सोमवारी यासंदर्भात व्यवस्थापन मंडळाची बैठक होणार असून त्यात काही निर्णय होण्याची शक्यता आहे.

वॉल स्ट्रीट जर्नलला सिटी ग्रुपने केलेल्या खुलाशात सांगितले आहे, की बॅंकेची भांडवल व रोकडस्थिती मजबूत आहे. त्याचा लाभ उठविण्यासाठी बॅंकेने आता नवी रणनीती अवलंबण्याची योजना बनवली आहे. सौदी अरेबियाचे सुलतान अलवालिद बिन तलाल यांनी बॅंकेतील वाटा पाच टक्क्यांनी वाढविण्याचे ठरविले आहे.

५२ हजार कर्मचारी काढणार
आर्थिक अरिष्टामुळे बॅंक जागतिक स्तरावरील आपल्या विस्तारावरही मर्यादा घालणार आहे. त्याचवेळी सध्या असलेले काम वीस टक्क्यांनी कमी केले जाणार आहे. शिवाय ५२ हजार कर्मचार्‍यांना नारळ दिला जाणार आहे.

शेअर्स घसरले
दरम्यान, बॅंकेच्या या हालचालींमुळे गुंतवणूकदार हादरले आहेत. त्यामुळे लोकांनी शेअर्स विकण्याचा धडाका लावला. परिणामी बॅंकेच्या शेअर्सचा भाव पाच डॉलरपेक्षा खाली गेला. गेल्या १४ वर्षातील हा नीचांक आहे. बॅंकेची किंमत आता ४८.७ अब्ज डॉलर्सपर्यंत घसरली आहे.

सरकारी मदतीस नकार
एवढी गंभीर परिस्थिती असूनही बॅंक सरकारकडून कोणतीही मदत मागण्याच्या 'मूड'मध्ये नाही. काही गुंतवणूकदारांच्या मते सरकारी मदत बॅंकेशी केलेल्या कराराशी निगडीत असेल. तर ती स्वीकारावी. याउलट बॅंकेने आपल्या व्यवसायापैकी काही भाग विकल्यास त्यातून हवे तेवढे भांडवल मिळविणे कठीण जाईल.

सरकारने गेल्या महिन्यात सातशे अब्ज डॉलर्सचे पॅकेज जाहीर केले होते. त्यातील २५ अब्ज डॉलर्सचे पॅकेज या बॅंकेला दिले जाण्याची शक्यता आहे. बॅंकेला स्थावर मालमत्ता व क्रेडीट कार्ड क्षेत्रात वीस अब्ज डॉलर्सहून अधिक तोटा होण्याची शक्यता आहे.

इतर बॅंकांनाही फटका
काल अनेक बॅंकांच्या शेअर्सची घसरगुंडी उडाली. जे. पी. मॉर्गन चेज अँड कंपनीच्या शेअर्समध्ये १७.९, बॅंक ऑफ अमेरिका कॉर्पोरेशनच्या शेअर्समध्ये १३.९ टक्क्यांची घसरण झाली आहे. डाऊ जोन्सचा निर्देशांकही ५.६ टक्क्यांनी घसरला आहे.

कर्मचारी कपात जोरात
या आर्थिक संकटातून बाहेर पडण्यासाठी बड्या वित्तीय संस्थांनी नोकरकपातीचा पर्याय अवलंबला आहे. जे.पी.मॉर्गने तीन हजार तर न्यूयॉर्क मेल्लन कॉर्पोरेशनने १८०० कर्मचार्‍यांना नारळ दिला आहे.

सिटीग्रुपचे डोळे आता सरकारी मदतीकडे

Sat, 22 Nov 2008 15:07:36 +0530

शेअर्सची सातत्याने घसरगुंडी उडत असल्याने धाबे दणाणलेल्या सिटीग्रुपच्या बॅंक व्यवस्थापनाने आता सरकारशी बोलणे सुरू केले आहे. या आधी सरकारी मदत घेणार नसल्याचे बॅंकेने स्पष्ट केले होते. बॅंकेच्या अधिकार्‍यांनी फेडरल रिझर्व्ह आणि वित्त विभागाच्या अधिकार्‍यांशी चर्चा करून या परिस्थितीतून काय मार्ग काढता येईल, याची चर्चा केली. सरकारचा पाठिंबा व वित्त विभागाकडून अर्थ सहाय्याची सिटीग्रुपला आशा आहे.

आपल्या काही शाखा इतर बॅंकांमध्ये विलीन करण्याचा निर्णय बॅंकेने अंतर्गत पातळीवर घेतला आहे. पण सरकारी मदतीशिवाय बॅंक हे करू शकेल काय हे अद्याप स्पष्ट होऊ शकलेले नाही. सिटीग्रुपच्या प्रवक्त्या क्रिस्टिना प्रेट्रो यांनी या विषयावर प्रतिक्रिया व्यक्त करण्यास नकार दिला आहे.

बॅंकेच्या शेअर्समध्ये काल वीस टक्के घसरण झाली. प्रति शेअर्स किंमत ३.७७ डॉलर्सपर्यंत आली होती. आठवडाभरात बॅंकेच्या शेअर्समध्ये साठ टक्के घसरण झाली आहे. डिसेंबर ९२ नंतर ही मोठी घसरण आहे.

या सगळ्या घडामोडींमुळे बॅंकेच्या गुतंवणूकदारांमध्ये घबराट पसरली असून या प्रकरणाचा शेवट काही तितका चांगला होणार नाही याचा अंदाज आता लोकांना आल्याचे आरबीसी कॅपिटल मार्केट्सचे बॅंकिंग विश्लेषक गेरॉर्ड काडिसी यांनी सांगितले.

दरम्यान, बॅंकेचे मुख्य कार्यकारी अधिकारी विक्रम पंडित यांनी काल पत्रकार परिषद घेऊन बॅंक आपल्या व्यवसायाचे स्वरूप बदलणार नाही. तसेच स्मिथ बार्नेसह दलाली व्यवसाय सुरू असल्याचे सांगितले. सिटीग्रुपची भांडवली स्थिती मजबूत असून कर्मचार्‍यांनी शेअर्सच्या घसरणीकडे लक्ष देऊ नये असे त्यांनी सांगितले.

गुजरातच्या केमिकल उद्योगालाही मंदीचा फटका

Fri, 21 Nov 2008 23:35:30 +0530

जागतिक आर्थिक संकटाची सावली गुजरात मधील केमिकल उद्योगावरही दिसून येत असून, मागणी कमी झाल्याने उद्योगांचे उत्पन्न घटले आहे.

प्रकाश ग्रुप ऑफ कंपनीजचे प्रबंध निदेशक दिलीप शाह यांनी दिलेल्या माहितीनुसार मंदीमुळे आतापर्यंत उद्योगाला 20 ते 30 टक्के फटका बसला आहे. शाह यांना गुजरातमधील इतर उद्योजकांनीही दुजोरा दिला आहे.

पाच लाख कर्मचारी बेकार होणार

Fri, 21 Nov 2008 22:40:30 +0530

आर्थिक मंदीचा जबर फटका देशातील वस्रोद्योगाला बसणार असून, येत्या पाच महिन्यांमध्ये पाच लाखांवर कर्मचारी बेकार होण्याची शक्यता सरकारने व्यक्त केली आहे.

आर्थिक मंदीने भारतीय बाजारावर परिणाम झाला असून, निर्यात कमी झाल्याने या कर्मचाऱ्यांवर बेकारी ओढवणार असल्याची भीती वाणिज्य सचिव जी के पिल्लै यांनी व्यक्त केली आहे.

वाणिज्य मंत्रालय वस्रोद्योगासाठी खास पॅकेजवर काम करत असून, पुढील महिन्यात हे पॅकेज पंतप्रधान मनमोहन सिंग यांच्याकडे पाठवण्यात येणार असल्याचे पिल्लै म्हणाले.

भारतालाही बसेल मंदीचा फटका- स्वराज पॉल

Fri, 21 Nov 2008 22:23:50 +0530

भारतीय बाजारपेठांमध्ये आर्थिक मंदीचा परिणाम दिसून येत नसला तरी आगामी काळात भारतीय बाजारालाही आर्थिक मंदीचा मोठा फटका बसेल अशी भीती अप्रवासी भारतीय उद्योगपती लॉर्ड स्वराज पॉल यांनी व्यक्त केली आहे.

आशियातील श्रीमंतांच्या यादीत पॉल यांचे नाव अग्रक्रमावर आले असून, त्यांची संपत्ती 1.5 अब्ज पौंडांपर्यंत झाली आहे. गेल्या दोन वर्षात आपण 22 कंपन्यांचे अधिग्रहण केले असून, भारतात 1994 पासून आतापर्यंत 32 कंपन्या स्थापण्यात आल्याचे पॉल यांनी स्पष्ट केले आहे.

आर्थिक मंदीचा फटका भारताला बसला नसल्याचे बोलले जात असले तरी आगामी काळात भारतीय बाजारावरही याचा परिणाम दिसून येईल असे पॉल म्हणाले.

मारुती निघाली गावांकडे

Fri, 21 Nov 2008 18:59:53 +0530

जागतिक आर्थिक मंदीतून मार्ग काढण्यासाठी आता मारुती उद्योग समूहाने एक अभिनव योजना आखली असून, गावांकडे वळण्याचा निर्णय घेतला आहे.

गावांमध्ये गाडीची विक्री वाढवण्यासाठी येत्या काही दिवसांमध्ये गाव पातळीवर दहा हजारांवर डीलर आणि एक्झिकेटीव्ह नियुक्त केले जाणार असल्याचे कंपनीने स्पष्ट केले आहे.

कंपनीचे अधिकारी मयंक पारीख यांनी दिलेल्या माहितीनुसार शहरात विक्रीत घट झाल्याने आता गावाकडे जाण्याचा निर्णय कंपनीने घेतला आहे.

फिलिप्सही संकटात, पण नोकरकपात नाही

Fri, 21 Nov 2008 15:25:00 +0530

इलेक्ट्रॉनिक उत्पादनात आघाडीचे नाव असलेल्या फिलिप्स इलेक्ट्रॉनिक्स या नेदरलॅंडस्थित कंपनीने नोकरकपात करणार नाही, असे स्पष्ट केले आहे. उलट आपली उत्पादन यंत्रणा विकसित देशातून विकसनशील देशात हलविण्याचेही कंपनीने ठरविले आहे.

कंपनीचे अध्यक्ष व मुख्य कार्यकारी अधिकारी गेरॉर्ड क्लिस्टरले यांनी ही बाब स्पष्ट केली. मात्र, त्याचवेळी मंदीचा परिणाम कंपनीवर झाल्याचेही मान्य केले. इतर कंपन्यांप्रमाणेच फिलिप्सही संकटात आहे, असे त्यांनी सांगितले.

जे. पी. मॉर्गन ३ हजार कर्मचार्‍यांना काढणार

Fri, 21 Nov 2008 15:20:50 +0530

जागतिक मंदीमुळे अनेक कंपन्या आता नोकरकपात जाहिर करू लागल्या आहेत. आता या यादीत जे. पी. मॉर्गन या अमेरिकेतील बड्या वित्तसंस्थेचे नाव आले आहे. या बॅंकेने दहा टक्के कर्मचार्‍यांना कामावरून काढून टाकण्याचे ठरविले आहे. ही संख्या तीन हजारापर्यंत जाते.

जे.पी.मॉर्गनच्या व्यवसायावर सध्या मंदीचा मोठा परिणाम झाला आहे. तिच्या शेअर्सचीही घसरण सुरू आहे. आता कर्मचारी कपात म्हणजे कंपनीचा नफा कमी झाल्याचे निदर्शक आहे. बॅंकेचे अडीचशे अब्ज डॉलर्स गृहकर्जात अडकले आहेत. बॅंकेत ३१ हजार कर्मचारी आहेत.

मंदीतूनही मजबूत होऊन बाहेर पडू - पंतप्रधान

Fri, 21 Nov 2008 15:10:38 +0530

जागतिक मंदीतूनही भारत मजबूत होऊन सहीसलामत बाहेर पडेल, असे सांगून पंतप्रधान डॉ. मनमोहनसिंग यांनी आठ टक्के विकासदरही कायम राहील असा विश्वास व्यक्त केला.

हिंदूस्तान टाईम्सच्या 'लीडरशिपट समीट'मध्ये ते बोलत होते. ''देशात आणि जागतिक पातळीवरही आम्ही विकासात्मक काम करू. आर्थिक संकटातून बाहेर पडण्यासाठी आमचे कौशल्य उपयोगी पडेल. जे देश फक्त आपल्यापुरते पाहतील आणि आपल्याच प्रश्नात अडकतील त्यांचे पतन होईल. त्यांना यश मिळणार नाही,'' असे सांगून पंतप्रधान म्हणाले, की आज जग एकमेकांत गुंतले गेले आहे. एक देश दुसर्‍यावर अवलंबून राहिला आहे. हे परस्परावलंबित्व आपल्याला समजून घेणे गरजेचे आहे. म्हणूनच दुसरा देश म्हणजे एखादे स्वतंत्र बेट नाही हेही समजून घ्यायला हवे.

बॅंकांमुळे आर्थिक संकटातून बचाव- सोनिया

Fri, 21 Nov 2008 15:10:36 +0530

सध्या जगभर असलेल्या आर्थिक संकटातही भारत वाचला याचे कारण भारतीय बॅंका आहेत, असे सांगत कॉंग्रेसाध्यक्षा सोनिया गांधी यांनी बॅंकाच्या राष्ट्रीयकरणाचा इंदिरा गांधी यांचा निर्णय योग्य होता, असे सांगितले.

हिंदूस्ताना टाईम्सतर्फे झालेल्या 'लीडरशीप समिट'मध्ये त्या बोलत होत्या. इंदिरा गांधी यांनी दूरदृष्टिने घेतलेल्या निर्णयामुळेच आपण आर्थिक संकटातून वाचलो हे सांगून, अजूनही सावधगिरी बाळगायला पाहिजे, असा सल्लाही दिला. उदारीकरणाच्या दिशेने पुढील वाटचाल सावधगिरी व सतर्कतेने केली पाहिजे. उदारीकरणाचे आम्ही समर्थक असलो तरी याचा अर्थ अनियंत्रित अर्थव्यवस्थेला पाठिंबा नाही, असेही त्यांनी स्पष्ट केले.

शंभर वर्षात एकदा येते आर्थिक मंदी

Fri, 21 Nov 2008 11:21:08 +0530

सध्‍या जगाला ज्‍या अर्थिक संकटांचा सामना करावा लागत आहे. अशा प्रकारचे संकट 100 वर्षांतून एक किंवा दोन वेळाच येत असल्‍याचे अमेरिकेतील अर्थ तज्‍ज्ञांचे म्‍हणणे आहे.

अमेरिकेचे अर्थमंत्री हेन्‍री पाल्सन यांनी या संकटांचा सामना करण्‍यासाठी कडक कायदे करण्‍याची आवश्‍यकता असल्‍याचेही सांगितले आहे.
आर्थिक संकटामागे सरकारची निष्क्रियता आणि चुकीचे निर्णय यासारखे अनेक कारणे असल्‍याचेही त्‍यांनी सांगितले.

अमेरिकन वृत्तसंस्‍थेत 10 टक्‍के कर्मचारी कपात

Fri, 21 Nov 2008 10:38:03 +0530

अमेरिकन वृत्तसंस्‍था असोसिएटेड प्रेसने (एपी) 2009 मध्‍ये आपल्‍या कर्मचा-यांमध्‍ये 10 टक्के कपात करण्‍याचा निर्णय घेतला आहे.

एपीचे प्रवक्ते पॉल कोलफर्ड यांनी याबाबत माहिती देताना सांगितले, की एपीचे अध्यक्ष आणि मुख्य कार्यकारी टॉम कर्ली यांनी कपातीची घोषणा केली आहे. सर्व विभागांची आणि कर्मचा-यांची काम करण्‍याची क्षमता पाहून एपी पुढच्‍या वर्षात कर्मचा-यांची कपात करणार आहे.

पीएसयू कर्मचा-यांच्या पगारात भरघोस वाढ

Fri, 21 Nov 2008 09:02:10 +0530

जगभर मंदीच्‍या पार्श्‍वभूमीवर नोकर कपात होत असताना केंद्र सरकारच्या ताब्‍यातील सार्वजनिक क्षेत्रातील उद्योगांमध्‍ये मात्र कर्मचा-यांच्‍या पगारांमध्‍ये भरघोस वाढ होत आहे. कर्मचा-यांच्‍या या पगारवाढीला सरकारने नुकतीच मान्यता दिली. सरकारच्‍या या निर्णयानुसार सरकारी कंपन्यातील कर्मचा-यांच्‍या पगारात 50 ते 300 टक्क्यांनी वाझ होणार आहे.

1 जानेवारी 2007 पासून ही वाढ मिळणार आहे. पंतप्रधानांच्‍या अध्यक्षतेखाली झालेल्‍या बैठकीत यास मंत्रीमंडळाने मंजूरी दिली. केंद्राच्‍या या विभागांमधील एक लाख 20 हजार कर्मचा-यांना आणि दोन लाख 58 हजार अधिका-यांना या लाभ होणार आहे. या पगारवाढीशिवाय मनुष्‍यबळ विकास निधी, कार्यक्षमता भत्ता यातही मोठी वाढ होणे अपेक्षित आहे. राष्ट्रपती प्रतिभाताई पाटील यांच्‍या अधिसूचनेनंतरही वाढ अंमलात येईल.

अमेरिकेत 16 वर्षातील सर्वाधिक मोठी बेरोजगार

Fri, 21 Nov 2008 08:41:47 +0530

अमेरिकेत यंदा गेल्‍या 16 वर्षांतील सर्वांधिक मोठी बेरोजगारी आली असून बेरोजगारी भत्ता मिळविणा-यांची संख्‍या पाच लाख 42 हजारापर्यंत पोचली आहे.

सरकारी आकडेवारीनुसार 15 नोव्‍हेंबर रोजी संपलेल्‍या आठवड्यात पाच लाख 15 हजार लोकांना बेरोजगारी भत्ता देण्‍यात आला आहे. या आठवड्यात त्‍यात 27 हजार लोकांची वाढ झाली आहे. डिसेंबर 1982 नंतरची ही सर्वाधिक संख्‍या आहे.

रशिया देणार भारत आणि चीनला कर्ज

Fri, 21 Nov 2008 08:41:43 +0530

जागतिक मंदीच्‍या पार्श्‍वभूमीवर देशांतर्गत उद्योगधंद्यांना सावरण्‍यासाठी रशियाने अजब शक्‍कल लढवली आहे. मंदीचा मार झेलत असलेल्‍या आपल्‍या कंपन्‍यांच्‍या मशीनरी आणि उपकरणांच्‍या खरेदीसाठी भारत आणि चीनला कर्ज देण्‍याचा निर्णय रशियाने घेतला आहे. याद्वारे देशातील उद्योगांना दिलासा मिळणार आहे तर भारत व चीनला कर्जही दिले जाणार आहे.

रशियन पंतप्रधान व्लादिमीर पुतिन यांनी यूनायटेड रशिया पार्टीच्‍या संमेलनाला संबोधित करताना याबाबत माहिती दिली आहे.

नोकरी बदलण्याचा विचार करताय? सावधान!

Thu, 20 Nov 2008 14:33:50 +0530

आर्थिक मंदीचा विळखा रोज नवनव्या क्षेत्राला कवेत घेऊ पहात आहे. त्यामुळेच सध्या नोकरी बदलण्याच्या विचारात असाल तर सावधान. तसा निर्णय घाईघाईत घेऊ नका. नाही तर ज्या कंपनीत जाल तीच मंदीच्या तडाख्यात सापडलेली असायची आणि आधीच्या कंपनीची दारेही बंद व्हायची. त्यामुळे नीट विचार करूनच निर्णय घ्या. मनुष्यबळ विकास क्षेत्रातील (एचआर) तज्ज्ञांचाही हाच सल्ला आहे.

सध्या नोकरकपातीची टांगती तलवार रियालिटी, विमान वाहतूक व आर्थिक क्षेत्रावर आहे. त्यामुळे या क्षेत्रातील नोकरदारांचे धाबे नक्कीच दणाणले आहे. त्यापैकी अनेक जण नोकरी सोडून दुसरी नोकरी पकडण्याच्या तयारीत आहेत.

पण सध्या तरी तुम्ही जी नोकरी करताय तीच पक्की आहे ना हे चाचपून बघा. ती आणखी मजबूत करण्याचा प्रयत्न करा. आळस टाळा आणि झटून काम करा. अन्यथा कपातीच्या वेळी तुमचाच विचार केला जाईल. कारण शेवटी प्रत्येक मालक आपल्या कर्मचार्‍यांकडून 'आऊटपूट' किती मिळते याचाच विचार करतो. त्यामुळे त्यात कमी पडलात तर कपातीची टांगती तलवार तुमच्यावरही कोसळू शकते.

त्याचवेळी दुसरी नोकरी स्वीकारात असाल तर सावध रहा. कारण नव्या ठिकाणी तुम्ही नव्हे असाल. तिथेही मंदीचा फटका बसल्यास कपातीची कुर्‍हाड नव्या कर्मचार्‍यांवर कोसळते, हे लक्षात ठेवा. नव्या नोकरीत रूळायला वेळ लागतो. कामाचा आवाका यायलाही वेळ लागतो. अशा वेळी तुमच्यविषयी चुकीचे मुल्यमापन होऊन नेमके तुम्हालाच काढले जायचे.

नोकरी बदलायचीच असेल तर नवे उगवते क्षेत्र कोणते याचा शोध घ्या. ज्या क्षेत्रात विस्ताराला संधी आहे किंवा विस्तार होतो आहे ते क्षेत्र निवडा. तेथे तुम्हाला नक्कीच संधी असेल. सौंदर्य, शिक्षण ही विस्तारणारी क्षेत्रे आहेत. चांगल्या शिक्षकांची कमतरता नेहमीच जाणवत असते. त्यामुळे तिथे संधी कायम आहेत.

मंदीमुळे नोकर कपात अपरिहार्य

Thu, 20 Nov 2008 11:58:01 +0530

आर्थिक मंदीचे अमेरिकेत घोंघावणारे वादळ भारतातही येऊन धडकले आहे. या वादळात अनेकांच्या नोकर्‍या जाणार हे आता स्पष्ट होऊ लागले आहे. सरकारने कंपन्यांना नोकर कपात करण्याऐवजी खर्चात कपात करण्यावर भर द्यावा असे सुचविले असले तरीही नोकर कपात ही अपरिहार्य असल्याचे दिसत आहे.

अनेक कंपन्यांनी मंदीला तोंड देण्यासाठी सध्या तरी नोकरकपातीऐवजी खर्च कपातीचा पर्याय स्वीकारला आहे. याअंतर्गत आपले विस्तार प्रकल्प थांबवले आहेत. टाटा ग्रुपच्या कंपन्यांना अध्यक्ष रतन टाटा यांनी पत्र पाठवून खर्चात शक्य तेवढी कपात करावी असे सांगितले आहे. त्यासाठी नव्या कंपन्यांचे अधिग्रहण, प्रकल्प विस्तार हे थांबविण्यास सांगण्यात आले आहे.

अनेक कंपन्यांनी नवी बांधकामे, नवे प्रॉडक्ट लॉंचिंग थांबवले आहे. जाहिरातींवरचा खर्चही कमी केला आहे. पण हे सगळे झाले तरीही आणखी खर्चात कपात म्हणून नोकरदारांवर कात्री चालविण्यात येत आहे. अनेक छोट्या कंपन्यांनी नोकर कपात सुरू केली आहे. मोठ्या कंपन्यांनी हा पर्याय अवलंबला नसला तरी ते करण्यावाचून त्यांना काही दिवसांनंतर पर्याय उरणार नाही. कारण उत्पादनाला बाजारात मागणी नाही आणि दुसरीकडे खर्च वाढता, अशा परिस्थितीत नोकरकपात त्यांना करावीच लागेल, असे या क्षेत्रातील एका उद्योजकाने सांगितले.

इन्फोसिस सारख्या बड्या कंपनीनेही आता थेट नोकरकपात न करता कर्मचार्‍यांना शिक्षणासाठी सुटी घेण्याचे आवाहन केले आहे. या काळात हे कर्मचारी आपला निम्मा पगार घेऊ शकतील. पण वरिष्ठ अधिकार्‍यांच्या मते याचा मंदीशी संबंध नाही. ही योजना आत्ताच जाहीर झाली आणि मंदीही आली हा केवळ योगायोग आहे. अर्थात, असे असले तरीही कर्मचारी याचा संबंध मंदीशी जोडत आहेत.

बॅंकींग, विमा, गुंतवणूक या क्षेत्राला मंदीचा मोठा फटका बसण्याची शक्यता वर्तवली जात आहे. त्याचा परिणाम अर्थातच इतर क्षेत्रांवरही होण्याची शक्यता दिसत आहे. टाटांसारख्या कंपनीचे पुणे, पंतनगर, जमशेदपूर येथील प्रकल्प काही दिवसांसाठी बंद ठेवण्याची वेळ येते, याचा अर्थ मंदी किती गंभीर आहे, याचा अंदाज येतो. काम बंद ठेवल्यानंतरही टाटांनी कर्मचारी कपात करणार नाही, असे सांगितले असले तरी आगामी काळात याच मताला ते चिकटून रहातील याची खात्री देता येणार नाही.

सिटी ग्रुप, एचएसबीसी बॅंकेच्या भारतातील कंपन्यांवरही बेरोजगारीची कुर्‍हाड कोसळण्याची शक्यता दिसत आहे. अर्थात सगळ्याच कर्मचार्‍यांची नोकरी जाणार नसली तरी पाच-दहा टक्के नोकर कपात होईल, अशी शक्यता आहे.

बॉलीवूडच्या बादशाहालाही मंदीचा फटका

Thu, 20 Nov 2008 11:23:37 +0530

आर्थिक मंदीचा परिणाम कॉर्पोरेट, चित्रपट व टिव्ही उद्योगावरच नव्हे तर जाहिरात क्षेत्रावरही झाला आहे. पर्यायाने चित्रपट कलावंत व क्रिकेटपटूही मंदीच्या गर्तेत सापडले आहेत.

मंदीमुळे ब्रॅंड एम्बेसेडर बनलेल्या अनेक कलावंत व क्रिकेटपटूंना त्यांची किंमत २०-४० टक्क्यांपर्यंत घटवायला सांगण्यात आली आहे. बॉलीवूडच्या या कलावंतांत शाहरूख, आमीर, ह्रतिक, अक्षय यांच्यासह महेंद्रसिंह धोनी, सचिन तेंडूलकर या क्रिकेटपटूंचा समावेश आहे.

शाहरूख खान एका जाहिरातीचे एक वर्षासाठी सहा कोटी रूपये मानधन घेतो. जाहिरातीचा करार केल्यानंतर वर्षातील काही तारखा जाहिरातीशी निगडीत कामांना म्हणजे शूटींग, प्रॉडक्ट प्रमोशन, पत्रकार परिषद आदींसाठी दिलेल्या असतात. शाहरूखप्रमाणेच आमीरही तेवढेच मानधन घेतो.

अक्षय कुमारने लिवाड्सच्या जाहिरातीसाठी बारा कोटी तर अभिषेक बच्चनने मोटारोलासाठी पाच कोटी घेतले आहेत. सैफ अली खान व धोनी एका जाहिरातीसाठी तीन कोटी घेतात. तर सचिन तेंडूलकर ५ ते ८ कोटी घेतो.

पण मंदीमुळे सर्व कंपन्यांनी आपल्या जाहिरातीच्या बजेटमध्ये कपात केली आहे. त्यामुळे पुढील वर्षासाठी या सेलिब्रेटीजना गेल्या वर्षीच्या तुलनेत कमी पैसे घेण्याचे आवाहन करण्यात आले आहे. तब्बल २० ते ४० टक्के मानधन कमी करावे असे सुचविण्यात आले आहे. अक्षयला २५ ते ३० टक्के मानधन कपात करण्यास सांगितले आहे. या सेलिब्रेटीजनी आपली 'किंमत' कमी केली नाही तर त्यांच्या जागी पर्यायी कलावंताला घेतले जाईल.

कोल्ड ड्रिंक्स क्षेत्रातील एका मान्यवर कंपनीने आपली ब्रॅंड एम्बेसेडर ऐश्वर्या राय-बच्चनशी केलेल्या कराराचे नूतनीकरण केलेले नाही. काही कंपन्या या कलावंतांना कमी किमतीत दोन ते तीन वर्षांसाठी साईन करण्याची योजना आखत आहेत.

त्यामुळे की काय कोल्ड ड्रिंक्स बनविणार्‍या एका कंपनीने राणी मुखर्जीला डच्चू देऊन 'जाने तू या जाने ना' या चित्रपटाची अभिनेत्री जेनेलिया डिसूझाला ब्रॅंड एम्बेसेडर बनविले आहे. त्यासाठी तिला सव्वा कोटी रूपये देण्यात आले आहेत.

फिल्म हिट झाली की या कलावंतांचे मानधन दुपटीने वाढते. पण आता त्यांना मूळच्याच किमतीत काम करण्यास सांगण्यात आले आहे.

जागतिक गुंतवणूक परिषद रद्द

Wed, 19 Nov 2008 21:47:00 +0530

जागतिक आर्थिक संकट अधिक गडद होत असल्याने कर्नाटक सरकारने 15 आणि 16 जानेवारीला आयोजीत करण्‍यात आलेली जागतिक गुंतवणूक परिषद रद्द करण्याची घोषणा आज केली.

आर्थिक मंदीचा फटका जवळपास सर्वच देशांना बसला असून, या संमेलनासाठी उपस्थित राहण्यास अनेक देशांच्या प्रतिनिधींनी असमर्थता दर्शवल्याने ही परिषद रद्द करण्याचा निर्णय घेण्यात आल्याचे कर्नाटकचे मुख्यमंत्री येदुयरप्पा यांनी स्पष्ट केले आहे.

तीन महिन्यानंतर पुन्हा एकदा याविषयी समीक्षा केली जाणार असल्याचे ते म्हणाले.

मंदीने बँकांमध्ये अस्वस्थता

Wed, 19 Nov 2008 18:09:11 +0530

जागतिक आर्थिक मंदीचा फटका अमेरिकेसह जगभरातील बँकांना मोठ्या प्रमाणावर बसला आहे. लेहमन सह अमेरिकेतील मोठ्या बँकांचे कंबरडे मोडले असून सिटी बँकेनेही जवळपास 52 हजार कर्मचाऱ्यांची कपात करण्याची घोषणा काल केल्यानंतर आता जगभरातील बँकांमध्येही अस्वस्थताही वाढली आहे.

जगतील अनेक बँकांनी आपल्या कर्मचाऱ्यांच्या कपातीची तयारी सुरू केली असून त्यांनी कर्मचाऱ्यांचा बोनसही यंदा देण्याचे नाकारले आहे.

ब्रिटनमधील बार्कलेज बँकेची अवस्था तर इतकी वाईट आहे, की चिडलेल्या ग्राहकांना पैसे आणि ठेवी परत देण्याची वेळ बँकेवर आली आहे.

बार्कलेजने मध्य आशियातील आपल्या गुंतवणूकदारांकडून 5.8 अब्ज डॉलर जमवण्याची घोषणा केल्याने बँकेचे ग्राहक नाराज आहेत. बँकेने पैसे जमवण्यासाठी दिलेल्या अटी आणि शर्ती या अत्यंत खराब असून, यापेक्षा ब्रिटिश सरकारने जाहीर केलेल्या विशेष पॅकेजमधील अटी यापेक्षा चांगल्या असल्याचे मत ग्राहकांनी व्यक्त केले आहे.

अमेरिकेतील गोल्डमन आणि स्विस बँक यूबीएसने आपल्या कर्मचाऱ्यांना बोनस देण्यास नकार दिला आहे.

मारुतीची ए-स्टार बाजारात

Wed, 19 Nov 2008 18:09:09 +0530

आर्थिक मंदीचा फटका बसल्यानंतर आता मारुती सुझुकी इंडिया लिमिटेडने आपल्या उत्पादनांना नवीन रूप देऊ केले असून, आपल्या स्पर्धकांना टक्कर देण्यासाठी कंपनीने ए-2 श्रेणीची कार बाजारात उतरवली आहे.

कंपनीचे अध्यक्ष आर पी भार्गव यांनी आज या कारची लॉंचीग केली. नवीन गाडी ग्राहकांना आकर्षीत करेल असा विश्वास त्यांनी या प्रसंगी व्यक्त केला.

गाडीत ए स्टार केबी साखळीतील इंजिन लावण्यात आले असून, याला विकसीत करण्यासाठी कंपनीने 1200 कोटी रुपयांची गुंतवणूक केली आहे. कंपनीने गाडीचे तीन प्रॉडक्ट बाजारात आणले आहेत.

मारुती एक्सची किंमत तीन लाख 46 हजार 775, बीएक्सआय तीन लाख 74 हजार 775 तर झेड एक्सआय चार लाख 11 हजार 775 रुपयांमध्ये उपलब्ध होणार आहे.

डॉलरच्या तुलनेत रुपयांची घसरण सुरूच

Wed, 19 Nov 2008 18:09:07 +0530

देशातील बाजारात सुरू असलेल्या विक्रीच्या माऱ्याने परकीय गुंतवणूकदारांनी आपला पैसा बाजारातून काढून घेण्यास सुरुवात केल्यानंतर बँकिंग बाजारात डॉलरच्या तुलनेत रुपया 32 पैशांनी घसरला आहे. तीन आठवड्यानंतर रुपयांच्या मूल्यात ही मोठी घसरण मानली जात आहे.

शेअर बाजारात सातत्याने घसरण सुरू असल्याने याचा परिणाम रुपयाच्या मूल्यावर होत असल्याचे अर्थमंत्र्यांनीही मान्य केले असून, यासाठी उपाय करण्यात येत असल्याचे त्यांनी भरत आर्थिक संमेलनात स्पष्ट केले आहे.

'शेअर निर्देशांकावरुन अंदाज लावणे चुकीचे'

Wed, 19 Nov 2008 18:09:04 +0530

शेअर बाजाराचा निर्देशांक हा केवळ एक नाममात्र आकडा असतो, त्याचा आर्थिक मंदी आहे अथवा नाही याचा अंदाज लावायचा नसतो असे मत अर्थमंत्री पी चिदंबरम यांनी व्यक्त केले आहे.

भारत आर्थिक संमेलनात आलेल्या उद्योगपतींना आज तिसऱ्या दिवशी अर्थमंत्र्यांनी संबोधीत केले. काही जणांना केवळ शेअर बाजाराचा निर्देशांक म्हणजे आर्थिक मंदी ओळखण्याचे माध्यम वाटते परंतु हा केवळ एक आकडा असून, यावरून देशाच्या आर्थिक परिस्थितीचा अंदाज लावणे चुकीचे असल्याचे अर्थमंत्र्यांनी आज स्पष्ट केले.

देशाच्या कृषीक्षेत्रात गेल्या काही दिवसांपासून होत असलेली प्रगती कौतुकास्पद असल्याचे अर्थमंत्री म्हणाले. डॉलरच्या तुलनेत रूपयांची घसरण होत असल्याने यावर नियंत्रण करण्यासाठी ठोस उपाय केले जात असल्याचेही चिदंबरम यांनी यावेळी स्पष्ट केले.