वायएसआर

साईबाबांचे भक्त होते डॉ. रेड्डी

Fri, 04 Sep 2009 09:27:21 +0530

आंध प्रदेशचे मुख्यमंत्री डॉ. वायएसआर रेड्‍डी यांचे हेलीकॉप्टर अपघातात निधन झाले. ते शिर्डीच्या साईबाबांचे भक्त होते.

शिर्डी येथील साईबाबा संस्थानातील एका अधिकारी यांनी सांगितले की, डॉ. रेड्डी यांनी सहकुटूंब साईबाबाचे दर्शन घेण्‍याची इच्छा व्यक्त केली होती. ते 11 ते 15 सप्टेंबर दरम्यान शिर्डी येथे येणार होती परंतु त्यांची ती इच्छा अपूर्णच राहिली.

साईबाबा दरबारात होणार्‍या आरतीचे टीव्हीवर सरळ प्रेक्षपण करण्‍यात यावे, अशीही डॉ. रेड्डी यांनी इच्छा व्यक्त केली होती. ही त्यांची इच्छा लवकरच पूर्ण केली जाणार आहे. टीव्ही 9 या खाजगी वृत्तवाहिनीकडून संस्थानाला तशी मंजूरी मिळाली आहे.

डॉ. रेड्डी यांनी महाराष्ट्रातून तिरुपती बालाजीला जाणार्‍या भक्तांसाठी तिरुमल्ला येथे भक्तिनिवासासाठी जमीन दिली आहे.

वायएसआर विजयाबद्दल निःशंक होते- सोनिया

Thu, 03 Sep 2009 18:41:01 +0530

आंध्र प्रदेशचे मुख्यमंत्री वाय. एस. राजशेखर रेड्डी यांच्या अपघाती निधनाबद्दल कॉंग्रेसाध्यक्षा सोनिया गांधी आणि पंतप्रधान डॉ. मनमोहनसिंग यांनी दुःख व्यक्त केले आहे. विकासाप्रती असलेल्या बांधिलकीसाठी वायएसआर कायम स्मरणात रहातील, अशी श्रद्धांजली उभय नेत्यांनी व्यक्त केली.

'वायएसआर' यांनी काढलेल्या पदयात्रेमुळे कॉंग्रेस आंध्र प्रदेशात सत्तेत आली. त्यांचा दुर्देवी मृत्यू हे पक्ष, राज्य आणि देशासाठी मोठे नुकसान आहे, अशा शब्दांत श्रीमती गांधी यांनी आपल्या भावना व्यक्त केल्या. रेड्डी यांच्या मृत्यूचे वृत्त आल्यानंतर पंतप्रधानांच्या निवासस्थानी झालेल्या कॉंग्रेस कार्यकारी समितीच्या बैठकीनंतर त्या पत्रकारांशी बोलत होत्या.

सकाळी आठ वाजून वीस मिनिटांनी हा धक्कादायक बातमी मिळाल्याचे सांगून त्यांनी रेड्डी यांच्यासंदर्भातील आठवणी जागवल्या. ''नुकत्याच झालेल्या आंध्र प्रदेशच्या विधानसभा निवडणुकीत पक्ष कशी कामगिरी करेल, यावर काही सदस्यांनी शंका व्यक्त केली होती. त्यावर वायएसआर यांनी आपल्यावर विश्वास ठेवा. आंध्रच्या लोकांचा कल मला माहिती आहे. मी आणि माझ्या सहकार्‍यांनी खूप काम केले आहे आणि आम्हीच सत्तेत येऊ. अखेरीस त्यांचे म्हणणेच खरे ठरले,'' अशी आठवण सोनियांनी सांगितली.

वायएसआर हे जनतेप्रती असलेल्या बांधिलकीसाठी कायम स्मरणात रहातील, असे सांगून त्यांनी आंध्र प्रदेशात गरीब आणि शेतकर्‍यांसाठी अनेक नाविन्यपूर्ण योजना सुरू केल्या होत्या, याचे स्मरण पंतप्रधानांनी यावेळी करून दिले.

असा झाला हेलिकॉप्टरला अपघात

Thu, 03 Sep 2009 18:20:10 +0530

आंध्र प्रदेशचे मुख्यमंत्री वाय. एस. राजशेखर रेड्डी यांचा मृत्यू नेमका कसा झाला याविषयीचे गूढ आता उकलले आहे. रेड्डी यांना घेऊन जाणारे हेलिकॉप्टर मार्ग भरकटून नल्लामलाई जंगलात एका डोंगरकड्याला जाऊन धडकले आणि त्यानंतर कोसळले, अशी माहिती आता पुढे आली आहे.

वित्तमंत्री आणि काळजीवाहू मुख्यमंत्री के. रोशय्या आणि मुख्य सचिव पी. रमाकांत रेड्डी यांनी ही माहिती दिली. हे हेलिकॉप्टर ढगांमुळे नियोजित मार्गापासून भरकटले. कुर्नूल जिल्ह्यातील नल्लामलाई जंगलभागात पूर्वेला १८ किलोमीटरपर्यंत गेले. तिथे एका डोंगराच्या कड्याला धडकले आणि तिथे स्फोट होऊन जळाले. त्या स्फोटातच आतील पाचही जणांचा मृत्यू झाला असे या दोघांनी सांगितले.

बेल ४३० जातीच्या या हेलिकॉप्टरची शेपटी तेवढी वाचली. बाकी पूर्ण हेलिकॉप्टरच्या ठिकर्‍या उडाल्या. रूद्रकोद्रू नावाच्या पर्वतीय भागापासून दहा किलोमीटर अंतरावर हे हेलिकॉप्टर कोसळले. हा भाग इतका दुर्गम होता की सैन्याच्या जवानांनाही दोराच्या सहाय्याने या ठिकाणी जावे लागले.

सुरवातीला केवळ तीनच मृतदेह सापडले. त्यानंतर चौथा सापडला. पाचवा मृतदेह सापडायला थोडा वेळ लागला. त्यांच्या कपड्यांवरून हे मृतदेह ओळखता आले, असे पोलिस महासचंलाक एस. एस. पी. यादव यांनी सांगितले.