Feedback
Print
राजकारणाचा 'रियालिटी शो' 
 | ||
|
राजकारण्यांनाही या रियालिटी शोचे भलतेच आकर्षण आहे. म्हणूनच लालूप्रसाद यादवांपासून अनेक राजकीय नेते अनेक शोच्या व्यासपीठावर दिसून येतात. कदाचित हाच हेतू मनी धरून की काय कोण जाणे, खासदार रामदास आठवले व संजय निरूपमही 'बिग बॉस-२' या कार्यक्रमात सहभागी होण्यास इच्छुक होते. त्यात आठवलेंना ऐनवेळी डच्चू देण्यात आला. पण निरूपम सहभागी झाले. अर्थात नंतर 'मते' न मिळाल्याने त्यांनाही नंतर बाहेर पडावे लागले ही बाब अलहिदा. (तसेही निरूपम संसदेत गेले ते मागल्या दारानेच.) पण या शोमध्ये सहभागी होण्याचे महत्त्व वाटावे असे काय त्यात आहे? एक लोकप्रतिनिधी म्हणून त्यांना दिलेली निहित कर्तव्ये पार पाडण्यापेक्षा एखाद्या रियालिटी शोमध्ये तीन महिने बंदिवासात राहणे त्यांना जास्त महत्त्वाचे कसे वाटू शकते? लोकांनी त्यांना पाच वर्षांसाठी निवडून दिले ते त्यांची सेवा करायला, कुणा उटपटांग चॅनेलमध्ये सतत प्रसिद्धीच्या झोतात रहाण्यासाठी नाही, हे त्यांना कळत नसेल काय?
निरूपम यांचे एकवेळ समजू शकतो. कारण ते प्रसिद्धीलोलूप आहेतच. कोणत्या ना कोणत्या मार्गाने प्रसिद्धी मिळावी हा त्यांचा हेतू कधी लपून राहिलेला नाही. म्हणून चॅनेलवरच्या रिकाम्या गप्पांमध्येही ते नेहमी सहभागी होऊन वाचाळगिरी करत असतात. पण जनतेच्या समर्थनावर निवडून गेलेला आठवलेंसारखा नेताही या सवंग प्रसिद्धीच्या प्रेमात पडतो, तेव्हा मात्र आश्चर्य वाटते.
| |
या कार्यक्रमात सहभागी होऊन आपल्याला दलितांच्या मुद्यासंदर्भात बोलायचे होते. त्यासाठी हे व्यासपीठ होते. पण ही संधी चॅनेलने आपल्याकडून हिरावून घेतली, असे आठवलेंचे म्हणणे आहे. प्राईम टाईमला दाखविल्या जाणार्या कार्यक्रमात समाजातील संवेदनशील मुद्यांवर चर्चा करू द्यायला चॅनेलची मंडळी परिपक्व आहेत, असे आठवलेंना कसे वाटले? अशा कार्यक्रमातून चर्चा केल्याने दलितांची स्थिती संपूर्ण समाजाला कळेल आणि त्यांच्या मानसिकतेत फरक पडेल हे आठवले कशाच्या आधारावर बोलतात? असल्या सवंग प्रसिद्धीच्या माध्यमातून हा संवेदनशील विषय तितक्याच गंभीरपणे हाताळला तरी जाऊ शकेल काय? चॅनेलला तिथे 'वाचाळ' राजकीय नेता हवा होता, त्यांनी आठवलेंपेक्षा निरूपम यांची निवड केली. यापेक्षा या प्रकरणाला जास्त महत्त्व नाही. त्याला कुठले वळण द्यायचीही गरज नाही. पण एकुणात या निमित्ताने प्रसिद्धीसाठी राजकीय नेत्यांची स्खलनशीलता मात्र दिसून आली.