एका मुलामुळे अमिताभने राजकारण सोडले

आसाममधील एका निवडणूक प्रचारादरम्यान झालेल्या एका छोट्या घटनेमुळे सूपरस्टार आणि माजी खासदार अमिताभ बच्चन यांनी राजकारणातून संन्यास घेतला. अमिताभ यांनी त्यांच्या बिगअड्डा डॉट कॉम या ब्लॉगवर हा खुलासा केला आहे. आसाममध्ये विरोधीपक्षाचा प्रभाव असलेल्या भागात एकदा आले हेलीकॉप्टर उतरले, यानंतर पायलटने मला तत्काळ हेलीकॉप्टरमधून खाली उतरण्याचा सल्ला दिला, आणि मी उतरलो. तितक्यात एका तरुण मुलाने माझ्याकडे कागदाचा एक बोळा फेकला, त्यावर लिहिले होते, 'मी आपला चाहता आहे, पण विरोधी पक्षाचा कार्यकर्ता असल्याने मी आपल्याला विनंती करतो, की आपण आसाममधून त्वरित बाहेर जावे' या छोट्याशा घटने नंतर आपल्यावर बरेच दडपण आले, आणि आपण राजकारणातून संन्यास घेण्याचा ठाम निर्णय घेतल्याचे अमिताभने स्पष्ट केले आहे.