कॉग्रेस चा मुख्यमंत्री ठरेपर्यंत आपण उपमुख्यमंत्र्यांची घोषणा न करण्याचा निर्णय घेतलेल्या राष्ट्रवादीने आज अखेर आपले मौन सोडत महाराष्ट्राचे बांधकाम मंत्री छगन भुजबळ यांची उपमुख्यमंत्री आणि गृहमंत्रीपदी निवड करण्यात आल्याची घोषणा केली.
मुंबईवरील हल्ल्याची जबाबदारी स्वीकारून आर. आर. पाटील यांनी उपमुख्यमंत्रिपदाचा राजीनामा दिल्यानंतर या पदी कोणाची निवड होईल याबाबत तर्कवितर्क लढविले जात होते. पण पक्षाध्यक्ष शरद पवारांनी पुन्हा एकदा भुजबळांवर विश्वास दाखवून त्यांची या पदी नियुक्ती जाहीर केली आहे.
श्री. पाटील उपमुख्यमंत्री पदी येण्यापूर्वी भुजबळ हेच उपमुख्यमंत्री व गृहमंत्री होते. मात्र, त्या काळातच तेलगी प्रकरण पुढे आले आणि संशयाची सुई त्यांच्याकडे वळाली. पक्षातून आणि विरोधकांकडूनही त्यांच्यावर हल्ले होऊ लागले. एका वाहिनीवर या विषयावर उपरोधात्मक कार्यक्रम सादर झाला. त्यावेळी भुजबळ समर्थकांनी चिडून जाऊन त्या वाहिनीवर हल्ला चढविला आणि या प्रकरणाची नैतिक जबाबदारी स्वीकारत भुजबळांनी राजीनामा दिला. त्यानंतर मग राष्ट्रवादीत भुजबळांची उपेक्षाच झाली. पक्षाची सत्ता पुन्हा एकदा आल्यानंतर भुजबळांना सार्वजनिक बांधकाम हे खाते देण्यात आले. मात्र, तेही काटून छाटून. त्यामुळे त्यांना साईडलाईनला टाकले हे जाणवत होते. मात्र, आर. आर. पाटलांवर ही वेळ आल्याने भुजबळांचे ग्रह पुन्हा चमकले आणि त्यांना उपमुख्यमंत्रिपद देऊन गेले.
या पदासाठी जयंत पाटील, अजित पवार यांचेही नाव घेतले जात होते. पण भुजबळांचा एकूण अनुभव त्यांच्या कामी आला आणि हे पद पुन्हा त्यांच्याकडे आले. | 
सुझाव/प्रतिक्रिया
मित्राला पाठवा
हे पान प्रिंट करा