डोनाल्ड ट्रम्प यांची मोठी घोषणा: इराणसोबतचा शस्त्रसंधी वाढवला, नाकेबंदी कायम
अमेरिकेचे अध्यक्ष डोनाल्ड ट्रम्प यांनी पाकिस्तानच्या विनंतीवरून इराणसोबतचा शस्त्रसंधी वाढवला आहे. मात्र, होर्मुझच्या सामुद्रधुनीवरील नाकेबंदी सुरूच ठेवण्याचे ट्रम्प यांनी कठोर निर्देश दिले आहेत. इराणला लवकरच एका मोठ्या करारासाठी भाग पाडले जाईल, असा दावा ट्रम्प यांनी केला आहे.
अमेरिकेचे अध्यक्ष डोनाल्ड ट्रम्प यांनी 'ट्रुथ सोशल' या सोशल मीडिया प्लॅटफॉर्मवर पोस्ट केले की, 'इराण सरकारमध्ये तीव्र मतभेद आहेत - यात आश्चर्य नाही - आणि पाकिस्तानचे फील्ड मार्शल असिम मुनीर व पंतप्रधान शाहबाज शरीफ यांच्या विनंतीनुसार, जोपर्यंत त्यांचे नेते आणि प्रतिनिधी एकमताने तोडगा काढत नाहीत, तोपर्यंत इराणवरील आमचा हल्ला स्थगित करण्यास आम्हाला सांगण्यात आले आहे.'
ट्रम्प यांनी अमेरिकी सैन्याला नाकेबंदी कायम ठेवण्याचे आणि इतर सर्व बाबतीत सज्ज व सक्षम राहण्याचे निर्देश दिले आहेत. ते म्हणाले, "जोपर्यंत त्यांचा प्रस्ताव सादर होत नाही आणि चर्चा पूर्ण होत नाही, तोपर्यंत मी शस्त्रसंधी वाढवत आहे."
ट्रुथ सोशलवरील दुसऱ्या एका पोस्टमध्ये तो म्हणाला, "इराणला होर्मुझची सामुद्रधुनी बंद नको आहे; त्यांना ती खुली हवी आहे जेणेकरून ते दिवसाला ५० कोटी डॉलर्स कमवू शकतील. मी ती पूर्णपणे रोखली (बंद केली!) आहे म्हणूनच ते ती बंद करू इच्छितात, आणि त्यांना फक्त आपली 'इज्जत वाचवायची' आहे."
ते म्हणाले की, चार दिवसांपूर्वी काही लोक माझ्याकडे आले आणि म्हणाले, ‘साहेब, इराणला ही सामुद्रधुनी तात्काळ उघडलेली हवी आहे.’ पण जर आपण तसे केले, तर इराणसोबत कधीही करार होणार नाही—जोपर्यंत आपण त्यांच्या नेत्यांसकट त्यांचा उरलेला देश उडवून देत नाही!
अमेरिकेच्या राष्ट्राध्यक्षांनी इराणमधील राजवट बदलल्याचे म्हटले आहे. अमेरिका आणि इराण यांच्यात लवकरच एक मोठा करार होऊ शकतो, असा दावा त्यांनी केला. सध्याच्या परिस्थितीत इराणकडे करार करण्याशिवाय दुसरा कोणताही पर्याय नाही, असे ट्रम्प म्हणाले.
इराणने काय म्हटले?
नाकेबंदी सुरू राहिल्यास संघर्ष सुरूच राहील, हे इराणने स्पष्ट केले. जोपर्यंत नाकेबंदी सुरू राहील, तोपर्यंत होर्मुझची सामुद्रधुनी उघडली जाणार नाही, असे त्यांनी म्हटले.
Edited By - Priya Dixit
