अंधश्रद्धेचा कळस! करोडपती होण्यासाठी सुनेला विवस्त्र करून पूजा; कानपूरमधील धक्कादायक प्रकार
उत्तर प्रदेशातील कानपूरमध्ये माणुसकीला काळिमा फासणारी एक घटना समोर आली आहे. एका सधन कुटुंबातील सुनेला 'तंत्र-मंत्र' आणि पूजेच्या नावाखाली विवस्त्र करून तिचा छळ करण्यात आल्याचा आरोप आहे.
नेमकी घटना काय?
कानपूरच्या सचेंडी भागातील एका श्रीमंत कुटुंबातील मुलीचे लग्न ६ मार्च २०२४ रोजी पांडू नगरमधील 'मिश्रा' कुटुंबात झाले होते. पीडितेच्या वडिलांनी लग्नात सुमारे ५ कोटी रुपये खर्च केले होते. मात्र लग्नानंतर काही दिवसांतच सासरच्या मंडळींनी तिची छळवणूक सुरू केली.
अंधश्रद्धेचा भयानक प्रकार
पीडितेने पोलिसांत दिलेल्या तक्रारीनुसार सासरच्या लोकांनी तिला मध्यरात्री उठवून तंत्र-मंत्राच्या पूजेत सामील होण्यास भाग पाडत होते. सासूने तिला सांगितले की, "आम्ही अशाच पूजा करून करोडपती झालो आहोत. घराची प्रगती आणि संपत्ती टिकवून ठेवण्यासाठी तुलाही हे करावे लागेल."
पीडितेचा आरोप आहे की, तिच्या साऱ्या कुटुंबासमोर (पती आणि सासऱ्यांच्या उपस्थितीत) तिला विवस्त्र करण्यात आले. तिच्या अंगाला राख फासून तिला जबरदस्तीने पूजेला बसवण्यात आले. जेव्हा पीडितेने या विचित्र परंपरेला आणि कृत्याला विरोध केला, तेव्हा तिला खोलीत बंद करून बेदम मारहाण करण्यात आली आणि तिला शारीरिक व मानसिक त्रास देण्यात आला. नंतर, दोन कोटी रुपये आणि एक किलो सोने आणण्यासाठी माझ्यावर दबाव टाकण्यात आला.
शारीरिक हल्ला
पीडितेच्या म्हणण्यानुसार, या कालावधीत तिच्यावर शारीरिक हल्लाही करण्यात आला. तिने सांगितले की, जेव्हा तिने याला विरोध केला, तेव्हा तिला चपलांनी मारहाण करण्यात आली आणि असे सांगण्यात आले की, ती एखाद्या 'नकारात्मक शक्ती'च्या प्रभावाखाली आहे, ज्यावर उपचार होणे गरजेचे आहे. या घटनांचा आपल्या मानसिक आरोग्यावर अत्यंत गंभीर परिणाम झाला असून, दीर्घकाळापर्यंत आपल्याला पुन्हा पूर्ववत सामान्य स्थितीत परतणे शक्य झाले नाही, असा दावा पीडितेने केला आहे. ही केवळ एकदाच घडलेली घटना नव्हती, असा आरोप पीडितेने केला आहे; घरात अशा प्रकारचे विधी नियमितपणे पार पाडले जात असत आणि प्रत्येक वेळी आपल्याला त्यात सहभागी होण्यास भाग पाडले जात असे, अशी माहिती तिने उघड केली आहे. जेव्हा जेव्हा आपण या विधींमध्ये सहभागी होण्यास नकार दिला, तेव्हा आपल्याला रागावले गेले आणि आपल्यावर दबाव टाकण्यात आला, असेही तिने पुढे नमूद केले आहे.
पोलिस कारवाई
या जाचाला कंटाळून पीडितेने महिला पोलीस ठाण्यात धाव घेतली आणि सासरच्यांविरुद्ध तक्रार दाखल केली. पोलिसांनी या प्रकरणी हुंडाबळीचा छळ, मारहाण आणि जादूटोण्याशी संबंधित कलमान्वये गुन्हा (FIR) दाखल केला असून पुढील तपास सुरू केला आहे.
