३० वर्षे ३०० आलिशान हॉटेल्समध्ये मोफत मुक्काम; चार्ल्स शोभराजला आदर्श मानणारा 'तो' हायप्रोफाइल ठग अखेर गजाआड!
छत्तीसगडमधील रायपूर पोलिसांनी एका अशा अनोख्या आणि सराईत गुन्हेगाराला अटक केली आहे, ज्याचा कारनामा ऐकून पोलीसही चकित झाले आहेत. बिन्सन जॉन (किंवा विन्सेंट जॉन) नावाच्या या ६९ वर्षीय वृद्धाने तब्बल ३ दशकं (३० वर्षांपेक्षा जास्त काळ) देशातील तब्बल ३०० हून अधिक आलिशान आणि फाईव्ह स्टार हॉटेल्सना लाखो रुपयांचा चुना लावला आहे.
नेमकी घटना काय आहे?
तामिळनाडूचा रहिवासी असलेला ६९ वर्षांचा बिन्सन जॉन नुकताच रायपूरमधील एका नामांकित फाईव्ह स्टार हॉटेलमध्ये थांबला होता. तिथून तो ६३,७५५ रुपयांचे बिल न भरताच गुपचूप पसार झाला. एवढेच नाही तर त्याने ऑफिसच्या कामाचे कारण सांगून हॉटेल कर्मचाऱ्यांकडून १.४८ लाख रुपयांचा लॅपटॉप मागवून घेतला होता, तो लॅपटॉपही तो सोबत घेऊन पळून गेला. हॉटेल प्रशासनाने तक्रार केल्यानंतर रायपूरच्या सायबर सेल आणि पोलिसांनी तांत्रिक तपासाच्या आधारे शोध सुरू केला आणि अवघ्या ७२ तासांत त्याला ओडिशातील भुवनेश्वर येथून अटक केली.
३० वर्षांचा इतिहास आणि ३०० हॉटेल्स
पोलिसी चौकशीत या वृद्धाने जे खुलासे केले ते थक्क करणारे आहेत. बिन्सन जॉन हा अतिशय उत्तम इंग्रजी बोलायचा. तो स्वतःला फॉरेन टूर गाईड, इंग्रजी शिक्षक किंवा योग प्रशिक्षक असल्याचे सांगून हॉटेल कर्मचाऱ्यांचा विश्वास जिंकायचा.
तो नेहमी दोन बॅगा घेऊन हॉटेलमध्ये यायचा. एकीमध्ये त्याचे सामान असायचे आणि दुसरीमध्ये वर्तमानपत्रे किंवा उशा भरलेल्या असायच्या, जेणेकरून बॅग जड दिसावी. तो आपले सामान हॉटेलच्या कर्मचाऱ्यांना कधीही हात लावू द्यायचा नाही.
चौकशी दरम्यान त्याने सांगितले की, तो कुप्रसिद्ध सिरीयल किलर आणि ठग 'चार्ल्स शोभराज' याला आपला आदर्श मानायचा. दिल्लीच्या तिहार जेलमध्ये असताना त्याने शोभराजच्या अनेक गोष्टी ऐकल्या होत्या आणि तशीच जीवनशैली जगण्याचे ठरवले होते.
"हॉटेल हे टुरिस्ट डेस्टिनेशन आणि जेल हे होम स्टे"
बिन्सन जॉनने पोलिसांना सांगितले की, तो आलिशान हॉटेल्सना आपले 'टुरिस्ट डेस्टिनेशन' आणि जेलला आपले 'होम स्टे' समजायचा. त्याला एकतर फाईव्ह स्टार हॉटेलचे जेवण आवडायचे किंवा थेट जेलचे जेवण!
१५ वर्षे तुरुंगात
त्याचा हा कारनामा १९९० च्या दशकापासून सुरू आहे. १९९६ मध्ये दिल्ली पोलिसांनी त्याला पहिल्यांदा अटक केली होती. गेल्या ३० वर्षांत तो महाराष्ट्र, दिल्ली, पश्चिम बंगाल, कर्नाटक, गोवा, तामिळनाडू आणि केरळसह १० हून अधिक राज्यांमध्ये वेगवेगळ्या गुन्ह्यांसाठी तब्बल १५ वर्षे तुरुंगात राहून आला आहे. पण तुरुंगातून सुटले की तो पुन्हा हेच काम करायचा. अनेक मोठी हॉटेल्स आपली बदनामी टाळण्यासाठी पोलिसात तक्रार करत नसत, ज्याचा फायदा बिन्सनने वर्षानुवर्षे घेतला.
सध्या रायपूर पोलिसांनी त्याला भारतीय न्याय संहितेच्या (BNS) योग्य कलमांतर्गत अटक करून न्यायालयीन कोठडीत पाठवले आहे.
