रिलायन्स-रोल्स रॉइस भागीदारी करून भारतात एएमसीए लढाऊ विमानासाठी स्वदेशी इंजिनांची रचना आणि निर्मिती करणार
स्वातंत्र्य दिनाच्या पूर्वसंध्येला भारताने संरक्षण आत्मनिर्भरतेच्या दिशेने एक महत्त्वपूर्ण पाऊल उचलले आहे. रिलायन्स इंडस्ट्रीज आणि रोल्स-रॉयस यांनी भारताच्या 'ॲडव्हान्स्ड मीडियम कॉम्बॅट एअरक्राफ्ट' (AMCA) कार्यक्रमासाठी स्वदेशी लढाऊ विमानांच्या इंजिनांची रचना, विकास, उत्पादन आणि पुरवठा यावर सहकार्य करण्याचा सामरिक इरादा जाहीर केला आहे. AMCA हा भारताचा पुढच्या पिढीतील लढाऊ विमानांचा कार्यक्रम असून तो देशाच्या हवाई सामर्थ्यासाठी अत्यंत महत्त्वाचा मानला जातो.
या दोन कंपन्या भारतात एक विशेष एरोस्पेस गॅस टर्बाइन संकुल स्थापन करण्याच्या शक्यतेचाही शोध घेतील. ऊर्जा आणि प्रणोदन तंत्रज्ञानासाठी एक उत्कृष्टता केंद्र म्हणून ते विकसित करण्याची योजना आहे. या प्रस्तावित भागीदारीचा उद्देश रोल्स-रॉयसचे प्रगत इंजिन तंत्रज्ञान आणि रिलायन्सची उत्पादन, तंत्रज्ञान व मोठ्या प्रमाणावरील क्षमता एकत्र आणून एएमसीएसाठी संयुक्तपणे इंजिन विकसित करणे हा आहे.
रिलायन्स इंडस्ट्रीजचे कार्यकारी संचालक अनंत अंबानी म्हणाले की, भारताच्या सामरिक स्वायत्ततेसाठी महत्त्वपूर्ण तंत्रज्ञानातील क्षमता अत्यावश्यक आहे. ते पुढे म्हणाले की, रोल्स-रॉयसच्या प्रगत प्रणोदन कौशल्याला रिलायन्सच्या तंत्रज्ञान आणि उत्पादन क्षमतेसोबत जोडून भारतात एक स्वदेशी एअरो-इंजिन परिसंस्था निर्माण करण्याचे उद्दिष्ट आहे. यामुळे देशाला भविष्यात प्रगत प्रणोदन तंत्रज्ञानामध्ये आत्मनिर्भर आणि जागतिक स्तरावर स्पर्धात्मक बनण्यास मदत होऊ शकते.
रोल्स-रॉइसचे सीईओ तुफान एर्गिनबिल्गिक यांनी याला भारतात एक मजबूत आणि आत्मनिर्भर एरोस्पेस परिसंस्था उभारण्याच्या दिशेने टाकलेले एक महत्त्वपूर्ण पाऊल म्हटले आहे. ते म्हणाले की, रोल्स-रॉइसच्या जवळपास शतकाहून अधिक काळाच्या अभियांत्रिकी आणि इंजिन क्षेत्रातील कौशल्याचा मिलाफ रिलायन्सच्या भारतीय औद्योगिक क्षमतेशी केला जाईल.
प्रस्तावित एअरो गॅस टर्बाइन कॉम्प्लेक्सचा उद्देश, संपूर्ण जीवनचक्रात डिझाइन, विकास, उत्पादन, चाचणी, निर्मिती आणि इंजिन सहाय्य या क्षेत्रांमध्ये भारतात क्षमता विकसित करणे हा आहे. या दोन कंपन्या संरक्षण, नागरी एरोस्पेस आणि नवीन ऊर्जा व प्रणोदन प्रणाली या क्षेत्रांमध्येही पुढील सहकार्याची शक्यता पडताळून पाहू शकतात.
Edited By - Priya Dixit
