बुलढाणा येथे २०० लिटरची पाण्याची टाकी डिझेलने भरली
बुलढाणा येथे इंधनाच्या तुटवड्याच्या अफवांदरम्यान, एका व्यक्तीने २०० लिटरची पाण्याची टाकी डिझेलने भरल्याने खळबळ उडाली आहे. प्रशासकीय निर्बंध असूनही, पेट्रोल पंपांवरील नियमांकडे होणाऱ्या दुर्लक्षामुळे सुरक्षिततेबद्दल गंभीर प्रश्न निर्माण झाले आहेत.
बुलढाणा जिल्ह्यात इंधनाच्या तुटवड्याच्या अफवांनंतर पेट्रोल पंपांवर लोकांच्या लांबच लांब रांगा दिसत आहेत. अनेक लोक अतिरिक्त इंधन साठवण्यासाठी प्लास्टिकचे डबे, कॅन आणि इतर कंटेनर घेऊन पंपांवर येत आहेत. मात्र, चिखली येथील एका पेट्रोल पंपावरील एका दृश्याने सर्वांनाच धक्का बसला आहे. येथे एका ग्राहकाने २०० लिटरची पाण्याची टाकी खरेदी करून थेट पेट्रोल पंपावर जाऊन ती डिझेलने भरली. इतकेच नाही, तर पंपावरील कर्मचाऱ्याने नियमांकडे दुर्लक्ष करून ती टाकी काठोकाठ भरली.
दुसरीकडे, अफवांमुळे होणारी घबराट आणि साठेबाजी रोखण्यासाठी जिल्हाधिकाऱ्यांनी इंधनाचा साठा करण्यावर आणि अनावश्यक साठवणुकीवर कडक निर्बंध लादले आहेत.याचे व्हिडीओ समोर आले आहे.
अनेक पंपांवर या आदेशांचे पालन केले जात नाही. लोक उघडपणे प्लास्टिकच्या डब्यांमध्ये आणि मोठ्या कॅनमध्ये इंधन भरत आहेत, ज्यामुळे सुरक्षितता आणि प्रशासकीय देखरेख या दोन्हीवर प्रश्नचिन्ह निर्माण झाले आहे.आता सर्वांचे लक्ष प्रशासनाच्या पुढील कारवाईकडे लागले आहे.
Edited By - Priya Dixit
