नागपूरमध्ये बर्ड फ्लूचा धोका पसरला! सेमिनरी हिल्समध्ये प्राणघातक H5N1 विषाणू आढळला, संपूर्ण शहर सतर्क

नागपूरच्या सेमिनरी हिल्समध्ये बर्ड फ्लूची पुष्टी झाली आहे! H5N1 विषाणू आढळल्यानंतर १ किमी परिसर सील करण्यात आला आहे. चिकन आणि अंड्यांच्या विक्रीवर २१ दिवसांसाठी बंदी घालण्यात आली आहे.

राष्ट्रीय उच्च सुरक्षा पशु रोग संस्था, आनंदनगर, भोपाळ आणि भारतीय कृषी संशोधन परिषदेच्या रोग अन्वेषण विभाग, पुणे यांनी कळवले आहे की, एअर फोर्स एरिया, सेमिनरी हिल्स येथील केंद्रीय अंडी पैदास केंद्रातून घेतलेल्या कोंबड्यांच्या नमुन्यांमध्ये एच-5एन1 एव्हियन इन्फ्लूएंझा (बर्ड फ्लू) विषाणूची पुष्टी झाली आहे.

त्यामुळे, या केंद्राच्या सभोवतालचा १ किलोमीटरचा परिसर बाधित क्षेत्र म्हणून आणि ९ किलोमीटरचा परिसर निगराणी क्षेत्र म्हणून घोषित करण्यात आला आहे. आपत्ती व्यवस्थापन प्राधिकरणाचे अध्यक्ष विपिन इटणकर यांनी ही अधिसूचना जारी केली . बाधित क्षेत्रातील सर्व कोंबड्या, त्यांचे खाद्य आणि अंडी यांची शास्त्रीय पद्धतीने विल्हेवाट लावण्याचे आदेश रॅपिड ॲक्शन फोर्सला देण्यात आले आहेत.

१ किलोमीटर त्रिज्येतील नागरी वस्तीचे निर्जंतुकीकरण करण्यास परवानगी देण्यात आली आहे, आणि पुढील २१ दिवसांसाठी या परिसरात कोंबड्या, अंडी व पक्ष्यांच्या खाद्याची खरेदी-विक्री, तसेच वाहतूक, बाजारपेठा, जत्रा आणि प्रदर्शने यांवर बंदी घालण्यात आली आहे. बाधित क्षेत्रात सर्व प्रकारच्या पक्ष्यांच्या वाहतुकीस मनाई आहे.

निगराणी क्षेत्रातील चिकनची दुकाने आणि चिकन बाजारातील विक्री बंद ठेवण्याचे आदेश देण्यात आले आहेत. प्रादुर्भाव नियंत्रणात आणण्यासाठी, जिल्हा उपपशुसंवर्धन आयुक्त, सहायक पशुसंवर्धन आयुक्त, जिल्हा पशुवैद्यकीय रुग्णालय आणि महानगरपालिका आयुक्त यांना सेमिनरी हिल्स येथील केंद्रीय अंडी पैदास केंद्रातील मार्गदर्शक तत्त्वांनुसार कारवाई करण्याचे आदेश देण्यात आले आहेत . अधिसूचनेत म्हटले आहे की, या मार्गदर्शक तत्त्वांचे काटेकोरपणे पालन करून त्यांची तात्काळ अंमलबजावणी करावी.

Edited By - Priya Dixit