भोंदू बाबा अशोक खरात प्रकरणात नवे वळण; पीडितेचा व्हिडिओ व्हायरल करणाऱ्या दोन तरुणांना अटक
अशोक खरात लैंगिक शोषण प्रकरणात, पीडितेचा आक्षेपार्ह व्हिडिओ सोशल मीडियावर प्रसारित केल्याप्रकरणी पोलिसांनी दोन तरुणांना अटक केली आहे. अशी माहिती सामोर आली आहे.
महाराष्ट्रातील स्वयंघोषित बाबा अशोक खरातच्या काळ्या कृत्यांनी संपूर्ण राज्याला धक्का बसला आहे. आता या प्रकरणात एक नवीन वळण आले आहे. पीडितेचे अश्लील व्हिडिओ सोशल मीडियावर प्रसारित केल्याप्रकरणी पोलिसांनी दोन तरुणांना अटक केली आहे. तपासादरम्यान जप्त केलेले संवेदनशील व्हिडिओ व्हॉट्सॲप ग्रुप्स आणि इतर डिजिटल प्लॅटफॉर्मवर मोठ्या प्रमाणावर शेअर केले जात असल्याचे विशेष तपास पथकाला (एसआयटी) आढळल्यानंतर ही कारवाई करण्यात आली.
एका महिलेच्या तक्रारीनंतर १८ मार्च रोजी अशोक खरातला अटक करण्यात आली होती. महिलेने आरोप केला आहे की, बाबाने गेल्या तीन वर्षांपासून तिच्यावर वारंवार लैंगिक अत्याचार केले होते. तपासादरम्यान, पोलिसांनी बाबाकडून अनेक आक्षेपार्ह व्हिडिओ जप्त केले, ज्यामध्ये तो महिलांचे शोषण करताना दिसत होता.
पोलिस अधिकाऱ्यांच्या माहितीनुसार, अहिल्यानगर जिल्ह्यातील कोपरगावचा रहिवासी असलेल्या राहुल गंगाधर शिंदेने २५ मार्च रोजी पीडितेचा एक व्हिडिओ व्हॉट्सॲप ग्रुपवर शेअर केला. कोपरगावचाच रहिवासी असलेल्या योगेश पंढरीनाथ आढवने तो व्हिडिओ बीडमधील माजलगावचा रहिवासी असलेल्या त्याचा मित्र संदीप गर्जे याला फॉरवर्ड केला.
एसआयटी पथकाने डिजिटल पावलांच्या खुणांचा मागोवा घेत आरोपींचा माग काढला. कोपरगाव पोलिस ठाण्यात भारतीय दंड संहिता (IPC) आणि माहिती तंत्रज्ञान (IT) कायद्याच्या गंभीर कलमांखाली गुन्हा दाखल करण्यात आला असून शिंदे आणि आढव यांना अटक करण्यात आली आहे. तिसरा आरोपी, संदीप गर्जे याचा शोध सुरू आहे.
अहिल्यानगरचे पोलीस अधीक्षक, सोमनाथ घार्गे यांनी या प्रकरणी कडक भूमिका घेतली आहे. ते म्हणाले, "कोणत्याही पीडितेची ओळख उघड करणे किंवा त्यांचे आक्षेपार्ह व्हिडिओ शेअर करणे हा कायद्यानुसार गुन्हा आहे. जो कोणी असे व्हिडिओ सोशल मीडियावर किंवा इतर माध्यमांवर प्रसारित करेल, त्याला तात्काळ अटक करून कायदेशीर कारवाई केली जाईल." या प्रकरणामुळे समाजातील डिजिटल गोपनीयता आणि नैतिक जबाबदारीबद्दल गंभीर प्रश्न निर्माण झाले आहे. ज्या व्हॉट्सॲप ग्रुपवर हे व्हिडिओ शेअर केले गेले होते, त्या ग्रुपच्या ॲडमिन्सवरही पोलीस आता पाळत ठेवत आहे.
Edited By- Dhanashri Naik
