भाजप मध्य प्रदेश, राजस्थानसारखा कारभार करणार का?
स्वबळावरची भाषा करणार्‍या भाजपला मध्य प्रदेश, राजस्थान, छत्तीसगडसारखा कारभार इथेही करायचा आहे काय, असा टोला शिवसेना पक्षप्रमुख उद्धव ठाकरे यांनी आज स्वबळाची भाषा करणार्‍या भाजपला लगावला. पंतप्रधान नरेंद्र मोदी व पाकिस्तानचे पंतप्रधान नवाज शरीफ यांच्यातील चर्चेवरही टीका करताना पाकिस्तानला जशास तसे उत्तर द्यावे, अशी मागणीही त्यांनी केली.
भाजप अध्यक्ष अमित शहा यांनी काल मुंबईत पक्षकार्यकर्त्यांना संबोधित करताना गठ-बंधन बस झाले, आता राज्यात स्वबळावर एकहाती सत्ता आणण्यासाठी कामाला लागण्याचे आवाहन केले होते. शिवसेना पक्षप्रमुख उद्धव ठाकरे यांनी तची खिल्ली उडवताना व्यापमं व ललित मोदी प्रकरणामुळे घायाळ झालेल्या भाजपच्या जखमेवर मीठ चोळले. अमित शहा यांचे वक्तव्य आपण वर्तमानपत्रात वाचले, असा खोचक टोला त्यांनी लगावला.
