श्रेयस तळपदे चित्रपट निर्मितीत

Download

IFM

IFM

हिंदी चित्रपटातील शोमॅन सुभाष घई आता मराठी चित्रपट निर्मितीत उतरणार आहेत. त्यांची मुक्ता आर्टस ही कंपनी मराठीत कांदे पोहे हा चित्रपट निर्माण करीत असून निर्मितीची जबाबदारी अभिनेता श्रेयस तळपदेवर सोपविण्यात आली आहे. इक्बाल या चित्रपटामुळे मोठ्या प्रमाणात प्रसिद्धीस पावलेला श्रेयस आता नव्या भूमिकेत प्रेक्षकांसमोर येत आहे.

कांदे पोहे हा चित्रपट काही खाद्यपदार्थावर आधारीत नाही. तो एक चांगला मनोरंजक असा चित्रपट असेल असे श्रेयसने सांगितले. मुक्ता आर्टसच्या सहकार्याने बनविण्यात येणारा हा चित्रपट युवक वर्ग डोळ्यासमोर ठेवून तयार करण्यात येणार असल्याचे श्रेयस म्हणाला.

IFM

IFM

करीयरच्या सुरवातीच्या टप्प्यातच निर्मितीच्या क्षेत्रात कसा काय आलास असे विचारले असता श्रेयस म्हणाला, मुक्ता आर्टसला मराठीत चित्रपट तयार करायचा होता. ते मला याविषयी सातत्याने योग्य नाव सुचविण्यासाठी विचारणा करीत होते. शेवटी त्यांनी मलाच हा प्रोजेक्ट का सांभाळत नाहीस असे विचारले आणि त्यांनीच या चित्रपटाच्या निर्मितीची जबाबदारीही माझ्यावर सोपवली. अशा तऱ्हेने कांदे पोहेचा मी निर्माता बनलो.

खरे तर एवढ्या लवकर मी निर्माता बनावे काय याविषयी माझ्या मनातच गोंधळ होता, पण सुभाषजींनी मला समजावले. त्यांच्या पाठिंब्याने आणि विश्वासानेच मला ही उडी घेण्याची ताकद मिळाली, श्रेयस हसत हसत सांगतो.

निर्माता श्रेयसच्या चित्रपटात अभिनेता श्रेयस मात्र दिसणार नाहीये. याचे चित्रीकरण सप्टेंबरपासून सुरू होणार आहे. कारण तोपर्यंतच्या तारखा त्याने श्याम बेनेगल यांच्या चित्रपटासाठी दिल्या आहेत. एकाच वेळी दोन कामे करणे मला शक्य नाही, असे तो सांगतो.

श्रेयसच्या मते मराठी चित्रपटात मोठे होण्याच्या खूप संधी आहेत. तो म्हणतो, आमच्याकडे गुणवत्ता आहे. चांगले अभिनेते, अभिनेत्री आहेत. पण मार्केटमध्ये चांगला पाठिंबा आणि सर्व ठिकाणी वितरण करण्यात आम्ही कमी पडतो. पण मुक्ता आर्टससारख्या मोठ्या बॅनरच्या सहाय्याने मराठी चित्रपटसृष्टीची ध्वजा उंचावण्यास मदत होईल.

IFM

IFM

मराठीत निर्माता झालेल्या श्रेयसचा हिंदीत निर्मितीचा विचार आहे, का असे विचारले असता तो म्हणाला, मला चित्रपट करायला आवडेल. चित्रपट तयार करायला घेणे आणि तो थिएटरमध्ये झळकावणे ही पूर्ण प्रक्रिया खूप कष्टदायक आहे. पण ती आपल्याला बरेच काही देऊन जाते. आयुष्यात एका उंचीवर पोहोचवते. निर्माता म्हणून माझ्या आयुष्यात पुढे काय आहे, हे मला माहिती नाही. पण मला चित्रपट तयार करायला मात्र नक्की आवडेल.

''कांदेपोहे'' या चित्रपटाचे दिग्दर्शन राजीव पाटील करणार आहेत. संजय पवार यांनी पटकथा-संवादलेखन केले असून, तुषार दळवी, सुबोध भावे, शिल्पा तुळसकर आदी कलाकार यात काम करीत आहेत. चार गाणी या चित्रपटात आहेत. त्याचे चित्रीकरण मुंबई व पुणे येथे होणार आहे.