500 प्रवाशांसह जहाज बुडाले, 79 जणांचा मृत्यू, अनेक बेपत्ता

रात्री उशिरा स्थलांतरितांना घेऊन जाणारी एक बोट ग्रीसच्या किनार्‍याजवळ उलटून बुडाली. बोट उलटल्याने त्यातील किमान 79 प्रवासी मरण पावले. तेथून 104 जणांना वाचवण्यात यश आले आहे. तर अनेक लोक अजूनही बेपत्ता आहेत. मात्र किती प्रवासी बेपत्ता आहेत हे अद्याप स्पष्ट झालेले नाही. सुटका करण्यात आलेल्या लोकांपैकी 25 जणांना 'हायपोथर्मिया' किंवा तापाच्या तक्रारींमुळे रुग्णालयात दाखल करण्यात आले आहे.

प्रवासी बोटीने युरोप (इटली) मध्ये जाण्याचा प्रयत्न करत होते

तटरक्षक दल, नौदल आणि विमानांनी रात्रभर मोठ्या प्रमाणावर शोध आणि बचाव कार्य सुरू केले. दक्षिणेकडील बंदर शहर कलामाताचे उपमहापौर इओनिस झाफिरोपौलोस यांनी दिलेल्या माहितीनुसार, जहाजमध्ये 500 हून अधिक लोक होते. अधिकाऱ्यांनी दिलेल्या माहितीनुसार सर्व स्थलांतरित मासेमारीच्या बोटीतून युरोप (इटली) गाठण्याचा प्रयत्न करत होते. मग जहाजात बसलेले लोक अचानक एका बाजूला गेले. त्यामुळे 10 ते 15 मिनिटांनी बोट उलटली आणि बुडाली.

तटरक्षक दलाने दिलेल्या निवेदनानुसार, जेव्हा त्यांच्या जहाजांनी आणि व्यावसायिक जहाजांनी बोटीला वाचवण्याचा वारंवार प्रयत्न केला तेव्हा त्यांना तसे करण्यापासून रोखण्यात आले. बोटीवरील लोक आपल्याला इटलीला जायचे असल्याचे सांगत राहिले. तटरक्षक दलाच्या अधिकाऱ्यांनी सांगितले की, मंगळवारी पहाटे 1.40 च्या सुमारास बोटीचे इंजिन बिघडल्याने ती बुडू लागली. 10 ते 15 मिनिटांनी बोट बुडाली.

photo:symbolic