घाटकोपरमध्ये होळीच्या दिवशी भीषण अपघात, 2 दुचाकीस्वारांसह 3 जणांचा मृत्यू
होळीच्या दिवशी मुंबईतील घाटकोपर परिसरात भीषण रस्ता अपघात झाला. या भीषण अपघातात तिघांचा जागीच मृत्यू झाला. पोलिसांनी सांगितले की सोमवारी पहाटे घाटकोपरमध्ये एका भरधाव दुचाकीने रस्त्यावरून चालणाऱ्या एका व्यक्तीला धडक दिली. या अपघातात दुचाकीस्वार तरुण आणि पायी जाणारी व्यक्ती या दोघांचाही मृत्यू झाला.
समीर मुस्तफा, मुझफ्फर बादशाह आणि सुरेश अशी मृतांची नावे आहेत. मुस्तफा आणि बादशाह हे अवघे 19 वर्षांचे होते आणि दोघेही साकीनाका परिसरात राहत होते. अपघात झाला त्यावेळी मुस्तफा दुचाकी चालवत होता आणि बादशाह मागे बसला होता. त्यांच्या दुचाकीने सुरेशला धडक दिली.
घाटकोपर (पश्चिम) येथील एलबीएस रोडवरील साई हॉटेलजवळ आज पहाटे चारच्या सुमारास हा अपघात झाला, असे एका अधिकाऱ्याने सांगितले. दोन्ही दुचाकीस्वार साकीनाका येथील अशोक नगर भागातून भरधाव वेगात येऊन दक्षिणेकडे जात होते.
साई हॉटेलजवळून जात असताना मुस्तफाचा दुचाकीवरील ताबा सुटला आणि सुरेशला धडक दिली. अपघाताच्या वेळी सुरेश सार्वजनिक शौचालयात जाण्यासाठी रस्ता ओलांडत होता. पोलिसांनी सांगितले की टक्कर इतकी जोरदार होती की 70-80 मीटरपर्यंत खेचल्यानंतर दुचाकी थांबली.
स्थानिक लोकांनी पोलिसांना फोन करून अपघाताची माहिती दिली. तिघांना राजावाडी रुग्णालयात नेले असता त्यांना मृत घोषित करण्यात आले. घाटकोपर पोलिसांनी मृत दुचाकीस्वाराविरुद्ध एफआयआर दाखल केला आहे. शवविच्छेदनानंतर मृतदेह नातेवाईकांच्या ताब्यात देण्यात आला.
