जन्मदात्या बापानेच दोन मुलांना विहिरीत फेकले

दारूच्या नशेत निर्दयी बापाने आपल्या दोन मुलांना विहिरीत फेकून दिल्याची धक्कादायक घटना समोर आली आहे. छत्रपती संभाजीनगर येथील चिकल ठाण्यातील चौधरी कॉलनीमध्ये हा प्रकार शुक्रवारी रात्री साडेआठ वाजण्याच्या सुमारास घडला. यात एका मुलाला वाचवण्यात यश आलं मात्र एकाचा पाण्यात बुडून मृत्यू झाला आहे.

माहितीनुसार राजू प्रकाश भोसले (वय 33 वर्षे) बापाने श्रेयस राजू भोसले (वय 7 वर्षे) आणि शिवम राजू भोसले (वय 9 वर्षे) या दोघा मुलांना विहिरीत फेकून दिलं. यात श्रेयसचा बुडून मृत्यू झाला तर शिवमला स्थानिकांनी बचावले आहे.

राजू भोसले आई, वडील व दोन मुलांसह राहून वेल्डींगची कामे करतो. मात्र राजूला दारूचे व्यसन लागल्यामुळे पत्नीसोबत वाद होऊ लागले. या प्रकारामुळे कंटाळून पत्नी दोन महिन्यांपूर्वी माहेरी निघून गेली मात्र दोन्ही मुलं राजूजवळ होती. 

शुक्रवारी रात्री आठ वाजेच्या सुमारास राजू दारूच्या नशेत दोन्ही मुलांला घरापासून 200 मीटरवर असलेल्या एका विहिरीकडे घेऊन गेला आणि त्यांना विहिरीत फेकून घरी परत आला. या घटनेत सात वर्षीय श्रेयस राजू भोसले याचा पाण्यात बुडून मृत्यू झाला तर शिवम राजू भोसले याला वाचविण्यात यश आलं. पोलिस प्रकरणाचा अजून तपास घेत आहे.