मालगाडीचे १० डबे रुळावरून घसरले तर ८ उलटले; या मार्गावरील रेल्वे सेवा प्रभावित

झारखंडमधील सिमडेगा जिल्ह्यातील कनारोन स्टेशनजवळ मालगाडीचे दहा डबे रुळावरून घसरले, त्यापैकी आठ डबे उलटले. या अपघातामुळे रेल्वे सेवा विस्कळीत झाली, अनेक गाड्या रद्द करण्यात आल्या किंवा वळवण्यात आल्या.

मिळालेल्या माहितीनुसार झारखंडमधील सिमडेगा जिल्ह्यात बुधवारी सकाळी एक मालगाडी रुळावरून घसरली, ज्यामुळे रेल्वे सेवा मोठ्या प्रमाणात विस्कळीत झाली. आग्नेय रेल्वेच्या रांची विभागातील कनारोन रेल्वे स्थानकाजवळ सकाळी १०:१५ च्या सुमारास हा अपघात घडल्याचे अधिकाऱ्यांनी सांगितले. "मालगाडीचे एकूण १० डबे रुळावरून घसरले, त्यापैकी आठ पूर्णपणे उलटले. ट्रेनमध्ये लोहखनिज होते," असे आग्नेय रेल्वेचे वरिष्ठ विभागीय व्यावसायिक व्यवस्थापक शुची सिंग यांनी सांगितले. या अपघातात कोणतीही जीवितहानी झाली नसल्याचे पोलिसांनी सांगितले.

अधिकाऱ्यांनी सांगितले की मालगाडी ओडिशातील बोंडामुंडा येथून लोहखनिज घेऊन रांचीला जात होती. त्यांनी सांगितले की रुळावरून घसरण्याचे नेमके कारण अद्याप कळलेले नाही आणि चौकशी सुरू करण्यात आली आहे. तसेच मालवाहू गाड्यांचे डबे रुळांवर उलटल्यामुळे इतर अनेक गाड्यांवरही परिणाम झाला.  

Edited By- Dhanashri Naik