विदर्भात उद्योगांसाठी अतिरिक्त १० हजार एकर जमीन उपलब्ध होणार, मंत्री उदय सामंत यांची घोषणा

Maharashtra News : विदर्भातील वाढती गुंतवणूक लक्षात घेता राज्य सरकारने एक मोठा निर्णय घेतला आहे. उद्योगांसाठी जमिनीची समस्या उद्भवू नये म्हणून विदर्भात सुमारे १० हजार एकर जमिनीला मंजुरी देण्याची घोषणा मंत्री उदय सामंत यांनी केली आहे.

मिळालेल्या माहितीनुसार चंद्रपूर, भंडारा, गडचिरोली आणि विदर्भातील इतर भागात उद्योगांसाठी गुंतवणूक दिवसेंदिवस वाढत आहे. उद्योगांसाठी जमिनीची समस्या निर्माण होऊ नये आणि उद्योगपूरक वातावरण निर्माण व्हावे यासाठी, या परिसरात सुमारे १० हजार एकर जमीन संपादित केली जाईल. महाराष्ट्राचे उद्योग मंत्री उदय सामंत यांनी ही माहिती दिली. त्यापैकी ४ हजार एकर जमीन संपादित करण्याच्या प्रस्तावाला मंजुरी देण्यात आल्याचे त्यांनी सांगितले. मुख्यमंत्री देवेंद्र फडणवीस यांनी यासाठी निर्णय घेतला आहे.
मिळालेल्या माहितीनुसार मंत्री उदय सामंत म्हणाले की, दावोसमध्ये १५.७० लाख कोटी रुपयांची गुंतवणूक झाली आहे. याशिवाय, अनेक उद्योजक अँडव्हान्टेज विदर्भात गुंतवणूक करार करत आहे. भविष्यात त्यांना जमिनीची गरज भासणार आहे. त्यामुळे अतिरिक्त जमीन संपादित करण्याचा निर्णय घेण्यात आला आहे. तसेच लॉयड्सची गडचिरोलीमध्ये मोठी गुंतवणूक आहे. भविष्यात हा जिल्हा औद्योगिक शहर म्हणून ओळखला जाईल.

Edited By- Dhanashri Naik