जेव्हा आंतरराष्ट्रीय स्तरावर फॅशन आणि भारतीय सिनेमाच्या अनोख्या संगमाचा विषय येतो, तेव्हा ऐश्वर्या राय बच्चन हे नाव सर्वात आधी आठवते. जागतिक ब्रँड 'लॉरिअल पॅरिस'ची जागतिक सदिच्छादूत म्हणून दोन दशकांहून अधिक काळ कान्स चित्रपट महोत्सवाची शोभा वाढवणाऱ्या ऐश्वर्या राय बच्चनने, रेड कार्पेटवर चालताना पुन्हा एकदा सर्वांना मंत्रमुग्ध केले.
गेल्या काही दिवसांपासून तिच्या कान्स येथील उपस्थितीबद्दल ऑनलाइन सुरू असलेल्या सर्व अटकळी आणि तर्कवितर्कांना पूर्णविराम देत, ऐश्वर्याने तिच्या अनोख्या फॅशन निवडींनी इतिहास रचला. ऐश्वर्या राय बच्चनने कान्सच्या प्रतिष्ठित रेड कार्पेटवर भारतीय फॅशनची ताकद दाखवून दिली.
ऐश्वर्याने प्रसिद्ध भारतीय डिझायनर अमित अग्रवाल यांनी डिझाइन केलेला 'ल्युमिनेरा' नावाचा गडद नीलमणी रंगाचा शिल्पकृतीसारखा गाऊन परिधान केला होता. हा पोशाख 'गतिमान प्रकाश' या संकल्पनेवर आधारित होता, जो प्रकाशाला ऊर्जा, गती आणि शक्ती म्हणून दर्शवतो.
ऐश्वर्याच्या गाऊनचे मुख्य आकर्षण म्हणजे त्याची कलाकुसर होती. डिझायनरच्या मते, गाऊनवरील नाजूक क्रिस्टल व्हेन एम्ब्रॉयडरी तयार करण्यासाठी १५०० तासांहून अधिक वेळ लागला. बायोमिमिक्री आणि ३डी स्कल्प्चर डिझाइनपासून प्रेरित असलेल्या या गाऊनने ऐश्वर्याला राजेशाही आणि धाडसी असा दोन्ही लुक दिला.
तिने मऊ मोकळे कुरळे केस, हलका मेकअप, गडद लिपस्टिक आणि निळ्या खड्यांनी जडवलेल्या हिऱ्यांच्या दागिन्यांनी आपला आकर्षक लूक पूर्ण केला. रेड कार्पेटवर फोटोग्राफर्सना पाहताच, ऐश्वर्याने तिच्या खास शैलीत हात जोडून 'नमस्ते' करत, जागतिक स्तरावर भारतीय संस्कृतीची प्रतिष्ठा पुन्हा एकदा उंचावली.
ऐश्वर्या राय बच्चनने तिची सह-राजदूत आणि हॉलिवूड स्टार इवा लोंगोरियासोबत रेड कार्पेटवर पोज दिली. या दोन्ही स्टार्स, मोनिका बेलुची अभिनीत आणि पाल्मे डी'ओर स्पर्धेत असलेल्या 'द बर्थडे पार्टी' या चित्रपटाच्या स्क्रीनिंगला उपस्थित होत्या. इवा आणि ऐश्वर्याच्या जुन्या मैत्रीने आणि रेड कार्पेटवरील त्यांच्या केमिस्ट्रीने पुन्हा एकदा उपस्थितांची मने जिंकली.
रेड कार्पेटवर आपल्या सौंदर्याने सर्वांना दिपवून टाकल्यानंतर, ऐश्वर्या राय बच्चन संध्याकाळी लॉरियलच्या विशेष 'लाईट्स ऑन वुमेन्स वर्थ' कार्यक्रमाला उपस्थित राहिली. या कार्यक्रमासाठी तिने आपला पोशाख बदलून सोफी कूटूरने डिझाइन केलेला फिकट गुलाबी रंगाचा गाऊन परिधान केला होता. फुलांची नक्षी आणि पाठीमागे असलेल्या पारदर्शक केपमुळे ती एखाद्या परीसारखी दिसत होती.
यावेळी ऐश्वर्याच्या कानमधील प्रवेशाबद्दल मोठी उत्सुकता होती. १० मे रोजी जेव्हा लॉरिअल पॅरिसने एक प्रमोशनल व्हिडिओ प्रसिद्ध केला, तेव्हा त्यात आलिया भट्ट, व्हायोला डेव्हिस, इवा लोंगोरिया आणि हेलन मिरन यांसारख्या सेलिब्रिटी होत्या, पण ऐश्वर्या त्यात कुठेही दिसली नाही. यानंतर, सोशल मीडियावर चाहते त्या ब्रँडला सतत विचारत होते, "ऐश्वर्या कुठे आहे?"
Edited By - Priya Dixit
