'तुंबाड २' मध्ये नवाजुद्दीन सिद्दीकीची एन्ट्री; 'हस्तर'च्या रहस्यमय जगात साकारणार महत्त्वाची भूमिका!
मुंबई: भारतीय चित्रपटसृष्टीतील 'कल्ट क्लासिक' ठरलेल्या 'तुंबाड' चित्रपटाच्या चाहत्यांसाठी एक मोठी बातमी समोर आली आहे. या चित्रपटाचा बहुप्रतिक्षित सिक्वेल 'तुंबाड २' मध्ये आता बॉलिवूडचा दिग्गज अभिनेता नवाजुद्दीन सिद्दीकी याची एन्ट्री झाली आहे. एका अत्यंत शक्तिशाली आणि रहस्यमय व्यक्तिरेखेत नवाजुद्दीन प्रेक्षकांच्या भेटीला येणार असून, यामुळे या फ्रँचायझीची उत्सुकता शिगेला पोहोचली आहे.
कथेत येणार नवा ट्विस्ट
नवाजुद्दीन सिद्दीकी हा त्याच्या अष्टपैलू आणि अनपेक्षित अभिनयासाठी ओळखला जातो. 'तुंबाड २' च्या कथेत तो एक असे पात्र साकारणार आहे जे प्रेक्षकांना मानसिक धक्का देण्यासोबतच त्यांच्या नैतिक मूल्यांना आव्हान देईल. अद्याप त्याच्या भूमिकेबद्दल गुप्तता पाळण्यात आली असली, तरी ही व्यक्तिरेखा चित्रपटाच्या कथानकात मैलाचा दगड ठरेल असे मानले जात आहे.
खरोखरच रोमांचक
या नव्या प्रवासाबाबात बोलताना नवाजुद्दीन सिद्दीकी म्हणाला,"मी नेहमीच 'तुंबाड'मधील मौलिकता आणि तिथल्या वातावरणाचा चाहता राहिलो आहे. जेव्हा सोहम शाहने मला या सिक्वेलचा 'व्हिजन' सांगितला, तेव्हा मला ती कथा खूप भावली. इतक्या मोठ्या प्रकल्पावर सोहम शाह आणि पेन स्टुडिओसोबत काम करणे माझ्यासाठी खरोखरच रोमांचक आहे."
निर्माते आणि सोहम शाह यांचे मत
अभिनेता आणि निर्माता सोहम शाह यांच्यासाठी नवाजुद्दीनला कास्ट करणे हा एक मोठा धाडसी निर्णय आहे. सोहम म्हणाला, "नवाजुद्दीन सर प्रत्येक भूमिकेत एक वेगळीच तीव्रता आणतात. त्यांची भूमिका सिक्वेलचा भावनिक आणि मानसिक स्तर अधिक उंचावणारी असेल."
पेन स्टुडिओचे डॉ. जयंतीलाल गडा यांनी देखील या सहयोगावर आनंद व्यक्त केला. "आम्ही प्रेक्षकांना जागतिक दर्जाचा सिनेमॅटिक अनुभव देण्यासाठी कटिबद्ध आहोत. नवाजुद्दीनची उपस्थिती या चित्रपटाला एका वेगळ्या उंचीवर घेऊन जाईल," असे त्यांनी नमूद केले.
लवकरच चित्रीकरणाला सुरुवात
'तुंबाड २' चे दिग्दर्शन सोहम शाह फिल्म्स आणि पेन स्टुडिओच्या संयुक्त विद्यमाने केले जात आहे. लवकरच या चित्रपटाचे चित्रीकरण सुरू होणार असून, पहिल्या भागाप्रमाणेच हा भाग देखील अधिक भयावह, गहन आणि संस्मरणीय असेल, असे आश्वासन निर्मात्यांनी दिले आहे.
