गायक दिलजीत दोसांझच्या शोला अखेर मंजुरी मिळाली; जाणून घ्या कॉन्सर्ट कधी आणि कुठे होणार?
दिलजीत दोसांझचा 'ऑरा इंडिया टूर' ३० ऑक्टोबर रोजी दिल्लीच्या जवाहरलाल नेहरू स्टेडियममध्ये होणार होता, परंतु दिल्ली पोलिसांनी त्यावर बंदी घातली होती. मात्र, आता याबाबत एक मोठे अपडेट समोर आले आहे.
पंजाबी गायक आणि अभिनेता दिलजीत दोसांझ सध्या त्याच्या कॉन्सर्टमुळे चर्चेत आहे. बुकमायशो लाइव्हने १४ ऑक्टोबर रोजी या कॉन्सर्टसाठी परवानगी मागितली होती. मात्र, सुरक्षेच्या कारणास्तव पोलिसांनी ही विनंती नाकारली . दिल्ली दक्षिण जिल्हा पोलिसांनी या संदर्भात २१ ऑक्टोबर रोजी एक आदेश जारी केला.
पोलिसांच्या आदेशानुसार, संगीत कार्यक्रमाला परवानगी न देण्यामागे अनेक कारणे नमूद करण्यात आली होती. यामध्ये संभाव्य सुरक्षा धोके, उत्सवांदरम्यानच्या सुरक्षा जबाबदाऱ्या आणि कायदा व सुव्यवस्थेसंबंधीच्या इतर चिंता यांचा समावेश होता. पोलिसांनी त्यांच्या पत्रातून हे स्पष्ट केले होते की, या कार्यक्रमासाठी परवानगी दिली जाऊ शकत नाही.
आता, दिल्ली पोलिसांनी पुनर्विचारानंतर दिलजीत दोसांझच्या कॉन्सर्टला परवानगी दिली आहे. दिल्ली पोलिसांच्या अधिकाऱ्यांनी एएनआयला सांगितले की, या संदर्भात अनेक बैठका झाल्या. या बैठकांमध्ये, आयोजकांनी सुरक्षेच्या बाबी लक्षात घेऊन आपल्या योजना सविस्तरपणे मांडल्या. यानंतर कॉन्सर्टला मंजुरी देण्यात आली.
दिलजीतचा कॉन्सर्ट कुठे होणार आहे?
दिलजीत दोसांझचा पहिला कॉन्सर्ट ३० ऑक्टोबर रोजी दिल्लीतील जवाहरलाल नेहरू स्टेडियममध्ये होणार आहे.
यानंतर पुढचा कार्यक्रम १५ नोव्हेंबर रोजी इंदूरमध्ये होणार आहे.
यानंतर तो २१ नोव्हेंबरला अहमदाबाद, २७ नोव्हेंबरला मुंबई, २९ नोव्हेंबरला बंगळूर आणि ५ डिसेंबरला लखनौ येथे कार्यक्रम सादर करेल.
चंदीगडमध्येही त्याच्या कॉन्सर्टची घोषणा करण्यात आली आहे, परंतु त्याची तारीख आणि इतर तपशील अद्याप जाहीर करण्यात आलेले नाहीत.
