गेम ऑफ थ्रोन्स फेम अभिनेत्याचे निधन

हॉलीवूड इंडस्ट्रीतून एक दुःखद बातमी समोर आली आहे. 'गेम ऑफ थ्रोन्स' या सुपरहिट मालिकेत आपल्या अभिनयाने प्रेक्षकांना मंत्रमुग्ध करणारे अभिनेते मायकल पॅट्रिक यांचे वयाच्या अवघ्या ३५ व्या वर्षी निधन झाले आहे. ते गेल्या तीन वर्षांपासून मोटर न्यूरॉन डिसीज (MND) या आजाराशी झुंज देत होते.

त्यांच्या पत्नी नाओमी शीहान यांनी सोशल मीडियावर एका भावनिक श्रद्धांजलीद्वारे त्यांच्या निधनाची बातमी दिली. त्यांच्या लग्नातील एक फोटो शेअर करत त्यांनी सांगितले की, मंगळवारी रात्री नॉर्दर्न आयर्लंड हॉस्पिसमध्ये मायकल यांनी अखेरचा श्वास घेतला.

नाओमी यांनी लिहिले, "मिक (मायकल) यांचे कुटुंब आणि मित्रांच्या उपस्थितीत शांतपणे निधन झाले. ते एक प्रेरणास्थान होते, केवळ आजारपणातच नव्हे, तर आयुष्यातील प्रत्येक दिवस पूर्ण ऊर्जेने जगले."

मायकल यांना या जगाचा निरोप आनंदाने घ्यायचा होता. त्यामुळे, त्यांनी ट्रॅकिओस्टॉमी (घशात छिद्र करून श्वास घेण्याची प्रक्रिया) करण्यास नकार दिला. त्यांच्या शेवटच्या दिवसांमध्ये ते व्हीलचेअरवर होते.

मायकल पॅट्रिकला १ फेब्रुवारी २०२३ रोजी एमएन्डी (MND) या आजाराचे निदान झाले. वैद्यकीय अहवालानुसार, एमएन्डी हा एक असा आजार आहे जो मेंदू आणि पाठीच्या कण्यातील स्नायूंच्या हालचाली नियंत्रित करणाऱ्या नसांवर परिणाम करतो. हा आजार हळूहळू व्यक्तीची चालण्याची, बोलण्याची, गिळण्याची आणि अखेरीस श्वास घेण्याची क्षमता हिरावून घेतो.

Edited By- Dhanashri Naik