केमन बेटांच्या नैऋत्येला 7.6 तीव्रतेचा भूकंप,त्सुनामीचा इशारा

केमन बेटांच्या नैऋत्येला कॅरिबियन समुद्रात 7.6 तीव्रतेचा भूकंप जाणवला आहे. अमेरिकेच्या राष्ट्रीय त्सुनामी वॉर्निंग सेंटरने याबद्दल माहिती दिली. शनिवारी संध्याकाळी 6:23 वाजता भूकंप झाल्याचे केंद्राने सांगितले.

भूकंपाच्या पार्श्वभूमीवर, काही कॅरिबियन बेटे आणि होंडुरासने त्सुनामी येण्याची शक्यता असल्याने खबरदारी म्हणून किनारपट्टीजवळील लोकांना समुद्रकिनाऱ्यांपासून दूर राहण्याचे आवाहन केले आहे.

स्थानिक वेळेनुसार, यूएसजीएसने म्हटले आहे की, त्याचे केंद्र केमन बेटांमधील जॉर्ज टाउनच्या नैऋत्येला130 मैल (209 किलोमीटर) अंतरावर आणि 10 किलोमीटर खोलीवर होते. 

अमेरिकेच्या राष्ट्रीय त्सुनामी वॉर्निंग सेंटरने म्हटले आहे की अमेरिकेसाठी त्सुनामीचा इशारा जारी करण्यात आला नाही, परंतु प्यूर्टो रिको आणि यूएस व्हर्जिन आयलंडसाठी त्सुनामीचा सल्ला जारी करण्यात आला आहे. केमन बेटांच्या सरकारनेही त्सुनामीचा इशारा दिला आहे.  

स्थानिक माध्यमांनुसार, होंडुरन अधिकाऱ्यांकडून नुकसानीचे कोणतेही तात्काळ वृत्त मिळालेले नाही. असे असूनही, खबरदारीचा उपाय म्हणून, त्यांनी त्यांच्या रहिवाशांना पुढील काही तास समुद्रकिनाऱ्यांपासून दूर राहण्याचे आवाहन केले आहे.

या भूकंपाच्या पार्श्वभूमीवर आंतरराष्ट्रीय त्सुनामी माहिती केंद्रानेही अलर्ट जारी केला आहे. केंद्राने म्हटले आहे की, भूकंपामुळे केमन बेटे, जमैका, क्युबा, मेक्सिको, होंडुरास, बहामास, हैती, टर्क्स आणि कैकोस, सॅन अँड्रेस प्रोव्हिडन्स, बेलीझ, डोमिनिकन रिपब्लिक, कोलंबिया, पनामा, प्यूर्टो रिको, कोस्टा रिका, अरुबा, बोनेर, कुराकाओ, यूएस व्हर्जिन बेटे, ब्रिटिश व्हर्जिन बेटे आणि साबा या काही किनाऱ्यांवर पुढील तीन तासांत धोकादायक त्सुनामी लाटा येऊ शकतात. 

Edited By - Priya Dixit