संबंधित माहिती
- विराट, रोहित आणि हार्दिक जखमी, तिघेही अफगाणिस्तान एकदिवसीय मालिकेतून बाहेर
- या यष्टीरक्षक-फलंदाजाने केवळ ७ कसोटी सामने खेळल्यानंतर आंतरराष्ट्रीय क्रिकेटमधून निवृत्ती घेतली
- आशियाई खेळ २०२६ क्रिकेट स्पर्धेसाठी सर्व १० संघ निश्चित
- IND vs AFG: भारत विरुद्ध अफगाणिस्तान कसोटी सामना ६ जून रोजी सुरू होणार
- सुर्याभाऊची कॅप्टन्सी जाणार
कोण आहे मानव सुथार? शुभमन गिलच्या नेतृत्वाखाली कसोटी पदार्पण; नेट्समध्ये रोहित-विराटलाही टाकले होते अडचणीत!
अफगाणिस्तानविरुद्ध खेळवल्या जाणाऱ्या एकमेव कसोटी सामन्यात भारतीय संघात एका नव्या युवा चेहऱ्याचा समावेश करण्यात आला आहे. राजस्थानचा २३ वर्षांचा अष्टपैलू (ऑलराउंडर) खेळाडू मानव सुथार याने भारतीय संघासाठी अधिकृतपणे आपले कसोटी पदार्पण केले आहे. कर्णधार शुभमन गिलच्या नेतृत्वाखाली खेळणाऱ्या भारताच्या 'प्लेइंग इलेव्हन'मध्ये मानवला संधी मिळाली आहे. सामना सुरू होण्यापूर्वी भारताचा स्टार फिरकीपटू कुलदीप यादवने मानवला त्याची पहिली 'डेब्यू टेस्ट कॅप' दिली, ज्यामुळे या युवा खेळाडूचे देशासाठी खेळण्याचे स्वप्न अखेर पूर्ण झाले.
नेट्समध्ये रोहित अन् विराटला केले होते हैराण!
डाव्या हाताने फिरकी गोलंदाजी करणाऱ्या या खेळाडूवर निवडकर्त्यांची बऱ्याच काळापासून नजर होती. २०२३ च्या एकदिवसीय विश्वचषकापूर्वी जेव्हा भारतीय संघाचे बेंगळुरू येथे सराव शिबीर आयोजित करण्यात आले होते, तेव्हा मानव सुथारला नेट्समध्ये गोलंदाजी करण्यासाठी खास बोलावण्यात आले होते. त्या सराव सत्रादरम्यान मानवने आपल्या फिरकीच्या जोरावर रोहित शर्मा आणि विराट कोहली यांसारख्या दिग्गज फलंदाजांनाही नेट्समध्ये चांगलेच अडचणीत आणले होते.
घरगुती क्रिकेटमधील चमकदार कामगिरी
मानव सुथार हा केवळ चांगला गोलंदाज नसून खालच्या क्रमांकावर येऊन उपयुक्त फलंदाजी करण्यासाठीही ओळखला जातो. त्याची आतापर्यंतची कामगिरी खालीलप्रमाणे आहे: प्रथम श्रेणी क्रिकेट: फेब्रुवारी २०२२ मध्ये आंध्र प्रदेशविरुद्ध राजस्थानकडून त्याने पदार्पण केले होते. आतापर्यंत खेळलेल्या २९ सामन्यांमध्ये त्याने २.९४ च्या उत्कृष्ट इकॉनॉमीने तब्बल १२९ विकेट्स घेतल्या आहेत. तसेच २५.५४ च्या सरासरीने ९४५ धावा केल्या असून, यात १ शतक आणि ६ अर्धशतकांचा समावेश आहे.
मर्यादित ओव्हर्सचे क्रिकेट: २५ 'लिस्ट-ए' सामन्यांमध्ये त्याने ४.४१ च्या इकॉनॉमीने ३४ विकेट्स घेतल्या आहेत, तर २८ टी२० सामन्यांमध्ये ७.३३ च्या इकॉनॉमीने २५ विकेट्स त्याच्या नावावर आहेत. आयपीएल २०२६ मध्ये तो गुजरात टायटन्स संघाचा भाग होता.
एका खास विक्रमाची नोंद
मानव सुथारच्या पदार्पणासोबतच भारतीय संघात एका आगळ्यावेगळ्या विक्रमाची नोंद झाली आहे. २०२१ मध्ये अक्षर पटेलने केलेल्या पदार्पणानंतर, लाल चेंडूच्या क्रिकेटमध्ये भारतासाठी पदार्पण करणारा मानव सुथार हा पहिला 'स्पेशालिस्ट' फिरकी गोलंदाज ठरला आहे. नोव्हेंबर २०१० नंतर ही पहिलीच वेळ आहे जेव्हा भारतीय संघ आर. अश्विन आणि रवींद्र जडेजा या दोघांशिवाय मैदानात उतरला आहे.
