पत्नीच्या ड्रेसवरील शेरेबाजीने शमी भडकला
नवी दिल्ली- पत्नीच्या ड्रेसवर असभ्य शेरेबाजी करणार्‍या नोटिझन्सना टीम इंडियाचा जलदगती गोलंदाज मोहम्मद शमीने फटकारले आहे. आमच्या खासगी आयुष्यात नाक खुसपण्यापेक्षा जरा स्वत:मध्ये डोकावून बघा, असं सडेतोड प्रत्युत्तर त्याने धर्माध टीककारांना दिले आहे.
23 डिसेंबरला मोहम्मद शमीने पत्नी हसीनसोबतचा एक फोटो फेसबुकवर शेअर केला होता. तो चांगलाच व्हायरल झाला. त्याच्या चाहत्यांनी त्याला भरभरून लाइक दिले, पण काही उथळ, प्रतिगामी नेटकर्‍यांनी त्यावर आक्षेपार्ह प्रतिक्रिया दिल्या.
तुझी बायको खूप क्यूट आहे, तिला बुरख्यातच ठेव... अशा कपड्यातला बायकोचा फोटो काढायला लाज वाटत नाही का? हिजाबमध्ये बायकोचा फोटो काढत जा... असे सल्ले स्वघोषित मुस्लिम धर्मरक्षकांनी शमीला दिले. ते पाहून शमी वैतागला.
अशातच, टीम इंडियाचा माजी शिलेदार मोहम्मद कैफ त्याच्या मदतीला धावला. या प्रतिक्रिया खरेच लज्जास्पद आहेत, शमीच्या पाठीशी ठामपणे उभे राहा, असे आवाहन कैफने ट्विटरवरून केले. कैफ व्यतिरिक्त अनेक बॉलीवूड सेलिब्रिटीजने ही शमीला समर्थन दिले त्यामुळे शमीला बळ मिळाले.
शमीने टीकाकरांना खडे बोल सुनावले- माझी पत्नी आणि मुलगी माझे जीवन आणि आयुष्याच्या साथीदार आहेत. काय करायचे आणि काय नाही, हे मला चांगले कळते. आपण किती चांगले आहोत, हे स्वत:मध्ये डोकावून पाहा.
