सावधान! पुढील ४८ तास धोक्याचे; कोकण आणि घाट माथ्यावर 'अतिवृष्टीचा' इशारा!
प्रादेशिक हवामान केंद्राने (IMD) पुढील ४८ तासांत कोकण आणि घाट माथ्यावर अतिवृष्टीचा इशारा दिला असून मच्छिमारांना समुद्रात न जाण्याचा सल्ला देण्यात आला आहे. मुंबईतील सखल भागात काही अंशी पाणी साचल्यामुळे वाहतूक धीम्या गतीने सुरू आहे.
मिळालेल्या माहितीनुसार हवामान खात्याने (IMD) दिलेला हा इशारा कोकण आणि घाट माथ्यावरील नागरिकांसाठी, तसेच या भागात प्रवास करणाऱ्यांसाठी अत्यंत महत्त्वाचा आणि सतर्क राहण्याचा आहे. पावसाचा जोर वाढत असल्याने पुढील दोन दिवस विशेष काळजी घेणे गरजेचे आहे.
भारतीय हवामान विभागाने (IMD) पुढील ४८ तासांत कोकण किनारपट्टी आणि पश्चिम महाराष्ट्रातील घाट माथ्यावर मुसळधार ते अतिमुसळधार पावसाचा इशारा दिला आहे. तसेच अरबी समुद्रात मान्सून पुन्हा सक्रिय झाल्यामुळे आणि पोषक वातावरण निर्माण झाल्यामुळे या भागात पावसाचा जोर वाढणार आहे. त्यामुळे सिंधुदुर्ग, रत्नागिरी, रायगड आणि पुणे-साताऱ्याच्या घाट माथ्यावरील काही भागांत अत्यंत मुसळधार पाऊस पडण्याची शक्यता आहे. तर पावसासोबतच ताशी ४० ते ५० किलोमीटर वेगाने सोसाट्याचा वारा वाहण्याचा अंदाज आहे.
दक्षिण महाराष्ट्र आणि गोव्याच्या किनारपट्टीवर समुद्र प्रचंड खवळलेला राहील.हवामान विभागाने मच्छिमारांना समुद्रात न जाण्याचा कडक इशारा दिला आहे. पुढील ४८ तास घाट रस्त्यांवरून उदा. ताम्हिणी, आंबेनळी, बोरघाट विनाकारण प्रवास करणे टाळा.
Edited By- Dhanashri Naik

