जावयाने भररस्त्यात सासूचा गळा चिरला, ५ लाख रुपयांच्या व्यवहारावरून वाद

Download

Publish: Thu, 24 Jul 2025 (16:32 IST) Updated: Thu, 24 Jul 2025 (16:34 IST)

बुधवारी नागपूरमध्ये एका महिलेची दिवसाढवळ्या हत्या करण्यात आली. आता पोलिसांनी या हत्येच्या आरोपीला अटक केली आहे. महिलेची हत्या दुसऱ्या कोणी केली नाही, तर खुनी तिचा जावई असल्याचे निष्पन्न झाले. पोलिसांनी आरोपी जावईला अटक केली आहे. आरोपीचे नाव मुस्तफा खान मोहम्मद खान असे आहे.

५ लाख रुपयांच्या व्यवहारावरून वाद

आरोपीने त्याची सासू माया पासेरकर यांचा गळा चिरून खून केला होता. ५ लाख रुपयांच्या व्यवहारावरून झालेल्या वादातून ही हत्या झाल्याचे प्राथमिक तपासात समोर आले आहे. पोलिसांकडून मिळालेल्या माहितीनुसार, मुस्तफा खानने त्याची सासू माया पासेरकर यांना ५ लाख रुपये उधार दिले होते. माया उधार घेतलेले पैसे परत करत नव्हती. त्यामुळे गेल्या काही दिवसांपासून या दोघांमध्ये वाद सुरू होता.

रस्त्यात पाठलाग केला आणि चाकूने गळा चिरला

बुधवारी सासू आणि जावईमध्ये या पैशांवरून वाद झाला. मुस्तफाने दुकानातून चाकू खरेदी केला आणि दुपारी त्याची सासू माया कामावरून घरी परतत असताना त्याने रस्त्यात तिचा पाठलाग केला आणि चाकूने गळा चिरून तिची हत्या केली. हत्येचे सीसीटीव्ही फुटेजही समोर आले आहे. नागपुरातील सीताबर्डी पोलिस ठाण्यात मुस्तफा खानविरुद्ध हत्येचा गुन्हा दाखल करण्यात आला आहे आणि त्याला अटक करण्यात आली आहे. पोलिस अधिक तपास करत आहेत.