रशियाने युक्रेनवर मोठा हल्ला चढवला, तिघे ठार
रशियाने पुन्हा एकदा युक्रेनची राजधानी कीव्हवर क्षेपणास्त्रे आणि ड्रोनद्वारे हल्ला केला असून, त्यामुळे अनेक निवासी भागांचे नुकसान झाले आहे आणि जीवित व मालमत्तेची हानी झाली आहे. या हल्ल्यानंतर, बचाव पथके बाधित इमारतींमध्ये अडकलेल्या लोकांचा शोध घेत आहेत. गेल्या काही दिवसांत वाढलेल्या हवाई हल्ल्यांच्या पार्श्वभूमीवर, युक्रेनचे राष्ट्राध्यक्ष वोलोडिमिर झेलेन्स्की यांनी पाश्चात्य देशांना अत्याधुनिक हवाई संरक्षण प्रणाली पुरवण्याचे आपले आवाहन पुन्हा केले आहे.
स्थानिक अधिकाऱ्यांच्या माहितीनुसार, रशियाने शुक्रवारी रात्रीपासून शनिवारी पहाटेपर्यंत युक्रेनची राजधानी कीववर बॅलिस्टिक क्षेपणास्त्रे आणि ड्रोनचा वापर करून मोठा हल्ला केला, ज्यात किमान तीन जण ठार झाले आणि डझनहून अधिक जण जखमी झाले.
कीवचे महापौर विटाली क्लिचको यांनी टेलिग्रामवर सांगितले की, सोलोमियांस्की जिल्ह्यातील एका पाच मजली निवासी इमारतीचे कोसळलेल्या ढिगाऱ्यामुळे नुकसान झाले आहे. काही लोक आत अडकल्याची भीती असून, अंगणात आग लागली आहे. क्लिचको यांनी सांगितले की, शेवचेन्किव्हस्की जिल्ह्यातील आणखी एका निवासी इमारतीचा पहिला आणि दुसरा मजला कोसळला असून, तेथेही लोक अडकल्याचे वृत्त आहे. त्यांनी पुढे सांगितले की, राजधानीच्या डार्नित्स्की जिल्ह्यातील गोदामांनाही आग लागली आहे.
युक्रेनचे राष्ट्राध्यक्ष वोलोडिमिर झेलेन्स्की हे अमेरिका आणि इतर पाश्चात्य मित्र राष्ट्रांकडून सातत्याने पॅट्रियट क्षेपणास्त्रविरोधी संरक्षण प्रणालीची मागणी करत आहेत, जेणेकरून रशियन क्षेपणास्त्र हल्ल्यांना प्रभावी प्रत्युत्तर देता येईल. शुक्रवारी रात्री उशिरा, झेलेन्स्की यांनी सांगितले की त्यांनी अमेरिकेचे उपराष्ट्राध्यक्ष जेडी व्हान्स यांच्याशी संवाद साधला. यावेळी त्यांनी या आठवड्यात वॉशिंग्टनमध्ये अमेरिकेचे राष्ट्राध्यक्ष डोनाल्ड ट्रम्प यांच्यासोबत झालेल्या भेटीवरही चर्चा केली. झेलेन्स्की यांनी ती भेट "सकारात्मक आणि उपयुक्त" असल्याचे वर्णन केले.आमच्या देशावर रशियाचे हवाई हल्ले अव्याहतपणे सुरू आहेत. हवाई संरक्षण प्रणाली, विशेषतः बॅलिस्टिक क्षेपणास्त्रांना रोखण्यासाठी असलेले पॅट्रियट सिस्टीम इंटरसेप्टर्स, हे आमचे सर्वोच्च प्राधान्य आहे," असे झेलेन्स्की यांनी टेलिग्रामवर लिहिले.
Edited By - Priya Dixit
