मिश्र दुहेरीत पेस-हिंगीसला जेतेपद
भारताचा आघाडीचा टेनिसपटू लिएंडर पेस आणि मार्टिना हिंगीस या जोडीने विम्बल्डनच्या मिश्र दुहेरीत जेतेपद पटकावले. या जोडीने अंतिम सामन्यात ऑस्ट्रेलियाच्या अलेक्झांडर पेया आणि हंगेरीच्या टिमिया बबोस या जोडीचा ६-१, ६-१ अशा सरळ सेटमध्ये पराभव केला. ४२ वर्षीय पेसचे हे ऑल इंग्लंड क्लबवरील चौथे आणि करिअरमधील १६ वा ग्रँडस्लॅम आहे. पेस-हिंगीस या जोडीने मिश्र दुहेरीत अवघ्या ४० मिनिटांच्या लढतीत विम्बल्डनच्या जेतेपदावर शिक्कामोर्तब केले. या अगोदर हिंगीसने शनिवारी सानिया मिर्झासोबत महिला दुहेरीतील जेतेपद पटकावले होते. पेसने आतापर्यंत ८ वेळा पुरुष दुहेरीत आणि सातवेळा मिश्र दुहेरीतील ग्रँडस्लॅम जेतेपद पटकावले आहे. विम्बल्डनमध्ये त्याने एक पुरुष दुहेरीत आणि दोन मिश्र ग्रँडस्लॅम जिंकली होती.
