गुलशन कुमार ज्यूस दुकानाच्या मालकापासून टी-सीरीजचे मालक बनले; आज टी-सीरीज जगातील सर्वात मोठ्या संगीत कंपन्यांपैकी एक

आज टी-सीरीजचे संस्थापक गुलशन कुमार यांची जयंती आहे. गुलशन कुमार हे एक असे नाव आहे ज्याने संगीत विश्वात क्रांती घडवली. सामान्य परिस्थितीतून येऊन देशातील सर्वात मोठी संगीत कंपनी, टी-सीरीज, उभी करण्याची त्यांची कहाणी एखाद्या चित्रपटाच्या पटकथेपेक्षा कमी नाही. त्यांची मेहनत, समर्पण आणि निष्ठेने त्यांना यशाच्या शिखरावर पोहोचवले, पण त्यांचा शेवट दुःखद झाला.

५ मे १९५१ रोजी दिल्लीत जन्मलेल्या गुलशन कुमार यांचे बालपण अत्यंत सामान्य परिस्थितीत गेले. त्यांचे वडील दर्यागंजमध्ये ज्यूसचे दुकान चालवत असत, जिथे गुलशन कुमारही मदत करत असत. मात्र, त्यांना या कामात रस नव्हता. काहीतरी मोठे साध्य करण्याचे स्वप्न पाहत, त्यांना काहीतरी वेगळे करायचे होते.ते ऑडिओ कॅसेट व्यवसायाकडे वळले. भजने आणि गाण्यांच्या कॅसेट परवडणाऱ्या किमतीत विकण्याची त्यांची कल्पना लोकप्रिय झाली आणि हे त्यांच्या यशाच्या दिशेने पहिले पाऊल ठरले.

'टी-सिरीज'ची स्थापना आणि यश
गुलशन कुमार यांनी 'सुपर कॅसेट्स इंडस्ट्री'ची स्थापना केली, जी नंतर 'टी-सिरीज' म्हणून ओळखली जाऊ लागली. त्यांनी प्रत्येक घरापर्यंत भक्ती संगीत पोहोचवण्यासाठी काम केले.

त्यांची भजने आजही लोकप्रिय आहे. त्यांनी सोनू निगम, अलका याज्ञिक आणि अनुराधा पौडवाल यांसारख्या मोठ्या नावांसह अनेक नवीन गायकांना संधी दिली. नंतर त्यांनी चित्रपट निर्मिती क्षेत्रात पाऊल ठेवले आणि 'आशिकी' या सुपरहिट चित्रपटाने आपली प्रतिष्ठा आणखी वाढवली.

गुलशन कुमार यांचे यश वाढत गेले, तसतसे त्यांचे शत्रूही वाढत गेले. असे म्हटले जाते की, त्यांना अंडरवर्ल्डकडून सतत धमक्या आणि पैशांची मागणी येत असे. पण गुलशन कुमार यांनी हार मानण्यास नकार दिला. त्यांनी सांगितले की ते पैसे दान करतील, पण कोणत्याही चुकीच्या कामासाठी नाही.

१२ ऑगस्ट, १९९७ हा दिवस भारतीय संगीत क्षेत्रासाठी एक काळा दिवस ठरला. गुलशन कुमार नेहमीप्रमाणे मंदिरात गेले होते, पण परत येत असताना त्यांच्यावर अंदाधुंद गोळीबार करण्यात आला.
या हल्ल्यात त्यांचा जागीच मृत्यू झाला. या घटनेने संपूर्ण देशाला धक्का बसला.

गुलशन कुमार यांच्या निधनानंतर, त्यांचा मुलगा भूषण कुमार याने लहान वयातच सूत्रे हाती घेतली. आज टी-सीरीज ही जगातील सर्वात मोठ्या संगीत कंपन्यांपैकी एक मानली जाते, हे त्याच्या वडिलांच्या कठोर परिश्रमाचे फळ आहे.

Edited By- Dhanashri Naik<>