डाळ-ढोकळी

- स्मिता

ND

साहित्य : दोन वाट्या तुरीची डाळ, चार वाट्या कणीक, एक वाटी चण्याच्या डाळीचे पीठ, चार-पाच ओल्या मिरच्या, आले, मीठ, लाल तिखट, गरम मसाला, हळद, चिंच, ओवा, धने, जिरे, गूळ, ओले खोबरे, कढीलिंब, कोथिंबीर, फोडणीचे साहित्य, गोडे तेल.

कृती : तुरीची डाळ चांगली मऊ शिजवून घ्यावी. नंतर रवीने किंवा पळीने चांगली घोटून घ्यावी. नंतर त्यात आपल्याला हवे असेल तेवढे पाणी घालून ओल्या मिरच्या (उभ्या चिरून), आल्याचे बरीक तुकडे, चवीप्रमाणे मीठ व लाल तिखट, चिंचेचे कोळलेले पाणी, गूळ (चवीप्रमाणे) व थोडी हळद घालावी. तसेच धन्या-जिऱ्याची पूड व थोडा गरम मसाला घालावा व चांगली उकळी आणावी. नंतर मेथी, मोहरी, हिंग, कढीलिंब व सुक्या मिरच्या घालून फोडणी करावी व ती आमटीला द्यावी. नंतर कोथिंबीर व ओले खोबरे घालून उकळी आणावी.

कणीक व चण्याचे पीठ एकत्र करून, त्यात पिठाचा मुटका होईल, इतके तेलाचे मोहन घालावे. नंतर त्यात ओवा (वाटून), मीठ, लाल तिखट व हळद घालून व पाणी घालून पीठ घट्ट भिजवावे. पीठ चांगले मळून त्याच्या पोळ्या लाटाव्यात व त्याचे शंकरपाळ्याच्या आकाराचे किंवा लांबट चौकोनी तुकडे कापून, ते वरील तयार केलेल्या उकळत्या आमटीत सोडावेत.

नंतर आमटीला थंड पाण्याचा हबका मारून व वर झाकण ठेवून ती मंद विस्तवावर थोडा वेळ ठेवावी. नंतर झाकण काढून आमटी पुन्हा चांगली शिजवावी. ही डाळ-ढोकळी गरम गरम अशी डिशमध्ये घालून जेवण्यात किंवा नुसतीच खावयास देतात. वर तूप घालावे.