पुढील महिन्यात होणार्‍या महाराष्ट्र विधानसभा निवडणुकीसाठी भाजपच्या उमेदवारांची पहिली यादी या आठवडयाच्या अखेरीस जाहीर करणार असल्याचे संकेत पक्षाचे राष्ट्रीय प्रवक्ते प्रकाश जावडेकर यांनी दिले आहेत.

पक्षाच्या मुख्यालयात आयोजित पत्रकारपरिषदेत ते बोलत होते. ते म्हणाले की, राज्यात शिवसेना भाजप युतीमध्ये जागावाटपाबाबत एकमत झाल्यानंतर भाजपने उमेदवार यादी तयार करण्यास सुरुवात केली आहे. आतापर्यंत ५६ नावांवर सहमती झाली आहे, येत्या दोन दिवसात उर्वरित नावांवर चर्चा निर्णय घेण्यात येईल. या आठवडयाच्या अखेरी पक्षाच्या केंद्रीय निवड समितीच्या बैठकीत महाराष्ट्राच्या पहिल्या उमेदवारी यादीला मान्यता देऊन ती जाहीर करण्यात येणार असल्याचे जावडेकर म्हणाले.

युतीची १७१ अणि ११७ या जागावाटपाच्या फॉर्म्युल्यावर सहमती असून निवडणुकीच्या दृष्टीने उभय पक्ष कामाला लागले असल्याचे त्यांनी सांगितले. राज्यात नुकत्याच पार पडलेल्या लोकसभा निवडणुकीत काँग्रेस- राष्ट्रवादी काँग्रेस आघाडीला ३८ टक्के मते मिळाली. युतीला ३५.५ टक्के मते मिळाली. म्हणजेच टक्केवारीतील फरक फक्त अडीच टक्क्यांचा आहे. येत्या निवडणुकीत हा फरक भरुन काढण्याच्या तयारीने युती कामाला लागली आहे, असे ते म्हणाले.

राज्यात नव्याने उदयाला आलेली रिपाई - डावी आघाडी काँग्रेस- राष्ट्रवादी काँग्रेसची मते घटविणाणर असून त्याचा फायदा युतीलाच होणार असल्याचा दावाही जावडेकर यांनी केला. महाराष्ट्र नवनिर्माण सेनेचा लोकसभा निवडणुकीत काही ठिकाणी युतीला फटका बसल्याचे लक्षात घेता उभय पक्ष याबाबत योग्य व्यूहरचना आखत आहेत, असे ते म्हणाले.