साखरेच्या दरात वाढ, सणासुदीत महागाई

फूड अँड अ‍ॅग्रिकल्चर ऑर्गनायझेशनच्या ताज्या अहवालानुसार जागतिक बाजारात साखरेच्या किमती सप्टेंबर महिन्यात उच्च पातळीवर पोहोचल्या आहेत. सध्या साखरेला जवळपास १३ वर्षांतील उच्चांकी दर मिळाला आहे. जागतिक स्तरावर साखरेच्या किमती वाढवण्यात भारताचाही हातभार आहे. एल निनोमुळे भारत आणि थायलंडमधील ऊस पिकांवर परिणाम झाल्याचे संघटनेचे म्हणणे आहे. त्याचा परिणाम साखरेच्या दरावर दिसून येत आहे. संयुक्त राष्ट्रांच्या कृषी एजन्सीने सांगितले की, सप्टेंबर महिन्यात एकूणच अन्नधान्याच्या किमती झपाट्याने वाढल्या आहेत. मात्र, इतरांपेक्षा साखरेचे दर वाढले आहेत. ऑगस्टच्या तुलनेत सप्टेंबर महिन्यात साखर किंमत निर्देशांक ९.८ टक्क्यांनी वाढला आहे.