International Plastic Bag Free Day 2026 : आंतरराष्ट्रीय प्लास्टिक पिशवी मुक्त दिवस

दरवर्षी ३ जुलै हा दिवस जगभरात 'आंतरराष्ट्रीय प्लास्टिक पिशवी मुक्त दिवस' म्हणून साजरा केला जातो. प्लास्टिक पिशव्यांमुळे होणारे प्रदूषण आणि पर्यावरणाची हानी याबद्दल लोकांमध्ये जागरूकता निर्माण करणे, हा या दिवसाचा मुख्य उद्देश आहे.

आंतरराष्ट्रीय प्लास्टिक पिशवी मुक्त दिवस उद्देश

आपण दुकानातून अवघ्या काही मिनिटांसाठी प्लास्टिक पिशवी घेतो, पण ती पिशवी नष्ट होण्यासाठी ४०० ते १००० वर्षे लागतात. या प्लास्टिकमुळे जमीन, पाणी आणि हवा या तिन्हींचे गंभीर प्रदूषण होते. म्हणूनच, प्लास्टिक पिशव्यांचा वापर पूर्णपणे थांबवून कापडी किंवा कागदी पिशव्यांचा वापर वाढवणे हा या दिवसाचा संदेश आहे. एकदाच वापरल्या जाणाऱ्या प्लास्टिक पिशव्यांमुळे होणाऱ्या पर्यावरणाच्या हानीबद्दल जागरूकता निर्माण करण्यासाठी हा दिवस साजरा केला जातो. प्लास्टिक पिशव्या महासागर, नद्या, जंगले आणि माती प्रदूषित करतात, प्राण्यांसाठी प्राणघातक आहेत आणि कचराभूमीमध्ये शतकानुशतके विघटित होत नाहीत.  तसेच हा दिवस २००८-२००९ च्या सुमारास, प्रामुख्याने 'झिरो वेस्ट युरोप' आणि 'गाया' (ग्लोबल अलायन्स फॉर इन्सिनरेटर अल्टरनेटिव्ह्ज) यांसारख्या संस्थांनी सुरू केला होता. आता हा दिवस 'ब्रेक फ्री फ्रॉम प्लास्टिक' चळवळीचा एक भाग बनला आहे, ज्यामध्ये हजारो संस्था आणि लाखो लोक सामील आहे.

प्लास्टिकला सोपे आणि उत्तम पर्याय

आपल्या छोट्याशा सवयी बदलून आपण पृथ्वीला प्लास्टिकमुक्त करू शकतो:

कापडी पिशव्या : बाजारात किंवा भाजी आणायला जाताना घरातूनच कापडी पिशवी सोबत ठेवण्याची सवय लावा.

जूट/तागाच्या पिशव्या : या पिशव्या मजबूत आणि दिसायलाही सुंदर असतात.

कागदी पिशव्या : सुक्या वस्तू किंवा किराणा आणण्यासाठी कागदी पिशव्यांचा वापर करा.

या दिवसासाठी आकर्षक घोषणा 

"प्लास्टिक हटवा, पर्यावरण वाचवा!"

"कापडी पिशवी वापरूया, वसुंधरेला प्लास्टिकमुक्त करूया."

"प्लास्टिकचा नकार, हाच निसर्गाचा खरा सत्कार!"

Edited By- Dhanashri Naik