चायनीज मशीनने १२ वी पास आरोपी करायचा भ्रूण चाचणी, १५ हजारांपर्यंत फी घेयचा

आरोपीची पार्श्वभूमी आणि बनाव

या रॅकेटमधील मुख्य आरोपीचे नाव अण्णासाहेब गिरी (वय ४२ वर्ष) असे आहे. तो केवळ १२ वी पर्यंत शिकला असून त्याने बी. फार्मसी (औषधनिर्माण शास्त्र) कोर्सला प्रवेश घेतला होता, परंतु पहिल्याच वर्षी नापास झाल्याने त्याने शिक्षण सोडले होते. कोणतीही वैद्यकीय पदवी किंवा परवाना नसतानाही, तो स्वतःला 'वैद्यकीय तज्ञ' म्हणून लोकांसमोर सादर करत असे आणि महिलांची फसवणूक करत होता.

हायटेक चायनीज उपकरणाचा वापर

पोलिसांनी दिलेल्या माहितीनुसार, आरोपी गर्भलिंग निदानासाठी चीनमध्ये तयार केलेल्या एका पोर्टेबल अल्ट्रासाऊंड डिव्हाइसचा वापर करत होता. हे डिव्हाइस ब्लूटूथच्या मदतीने मोबाईलमधील एका खास ॲप्लिकेशनला जोडलेले असायचे. वैद्यकीय तज्ज्ञांच्या मते, परवान्याशिवाय अशा उपकरणांचा वापर करणे पूर्णपणे बेकायदेशीर असून हा PCPNDT कायद्याचे थेट उल्लंघन आहे. पोलिसांनी हे डिव्हाइस जप्त केले आहे.

रॅकेट कसे चालायचे?

हे एक संघटित नेटवर्क होते. दलालांमार्फत गरोदर महिलांना कन्सल्टेशनच्या नावाखाली आरोपी गिरी याच्याकडे आणले जायचे.

तिथे लिंग तपासणीसाठी ५,००० ते १५,००० रुपये वसूल केले जायचे. तपासणीनंतर ज्या महिलांना गर्भपात करायचा असे, त्यांना हे नेटवर्क आपल्याशी जोडलेल्या डॉक्टरांकडे पाठवत असे, जिथे पुढील बेकायदेशीर प्रक्रिया केली जायची. हा सर्व व्यवहार कमिशन आणि रेफरल सिस्टीमवर चालत होता.

पोलिसांची कारवाई आणि अटक

या प्रकरणाचा व्हिडिओ व्हायरल झाल्यानंतर आरोग्य विभागाने तत्परतेने तक्रार नोंदवली. पोलिसांनी मुख्य आरोपी अण्णासाहेब गिरी याच्यासह वाघोली येथील एका BAMS डॉक्टर अतुल जाधव याला अटक केली आहे. तसेच अल्ट्रासाऊंड मशीन पुरवणारा अन्य एक आरोपी नरेंद्र ठाकरे याच्या कोठडीची पोलीस मागणी करत आहेत. या गुन्ह्यात सामील असलेले इतर दोन डॉक्टर सध्या फरार आहेत.

आरोपीने पोलिसांना सांगितले की, तो २०२४ पासून हे बेकायदेशीर काम करत होता. तो दरमहा साधारण ३० ते ५० महिलांची अशा प्रकारे बेकायदेशीर तपासणी करत असे. पोलीस सध्या या संपूर्ण रॅकेटमध्ये आणखी किती डॉक्टर आणि दलाल सामील आहेत, याचा तपास करत आहेत.