नाशिकच्या कारागृहातून महत्त्वाच्या 16 कैद्यांना हलवणार

नाशिक: तीन दिवसापूर्वी नाशिकच्या मध्यवर्ती कारागृहात आठ मोबाईल फोन सापडल्यानंतर कारागृह प्रशासनाच्या कारभारावर प्रश्न चिन्ह निर्माण झाले होते. एकूण परिस्थितीकडे पाहाता नाशिकच्या मध्यवर्ती कारागृहातून महत्त्वाच्या 16 कैद्यांना हलवण्यात येत आहे. यात अंडा सेलसह 4 विशेष बराकमधील कैद्यांचा समावेश आहे. सुरक्षेच्या कारणामुळे या कैद्यांना हलवण्यात येत आहे. 

कारागृहात असलेला महत्त्वाचा कैदी सलीम कुत्ताला सर्वात आधी हलवण्यात येत आहे. त्याला मंगळवारी पुण्याच्या येरवडा कारागृहात हलवण्यात येईल. त्यानंतर आगामी आठवडाभरात इतर कैद्यांना इतरत्र हलवण्यात येणार आहे. कारागृहात बेवारस आढळलेले मोबाईल जप्त केल्यानंतर पुन्हा सोमवारी एक कैदी मोबाईलवर बोलताना सापडला. गेल्या 3 दिवसात 8 मोबाईल सापडले आहेत. या सर्व प्रकारानंतर कारागृह सुरक्षेची विशेष पथकने तपासणी केली आहे. याप्रकरणी काही कर्मचारी आणि अधिकारीही या विशेष पथकाच्या रडारवर आहेत.