मतदारांचीही परीक्षा

आज सर्वच उमेदवारांचे भवितव्य मतयंत्रात बंद होणार आहे. त्या पाश्वभूमीवर भारतीय राज्य घटनेचे शिल्पकार डॉ. बाबासाहेब आंबेडकर यांनी मतदारांना उद्देशून ‘तुमच्या मताची किंमत मीठ-मिरचीइतकी किरकोळ समजू नका, त्यातील सामर्थ्य ज्या दिवशी तुम्हाला कळेल तेव्हा ते मत विकत घेऊ पाहाणार्‍यांइतके कंगाल कोणीच नसेल.’ अशा शब्दात मतदान अधिकाराची महत्ता सांगितली आहे. तसेच ‘..निवडणूक जणू स्वयंवर, ज्वर हाती देणे जीवनाचे बागडोर, त्यासी लावावी कसोटी सुंदर, सावधपणे’ असा उपदेश राष्ट्रसंत तुकडोजी महाराजांनी आपल्या ‘ग्रामगीते’तून देशातील मतदारांना केला होता. त्याचाही आज महाराष्ट्रातील तमाम मतदारांनी जाणीवपूर्वक विचार करायला हवा, त्याअर्थाने मतदारांचीही ही परीक्षाच ठरते.