मनोज मुंतशीर यांनी 'आदिपुरुष'बद्दल म्हटले, चित्रपटाचा बचाव करणे ही माझ्या आयुष्यातील सर्वात मोठी चूक होती
२०२३ मध्ये प्रदर्शित झालेला 'आदिपुरुष' हा चित्रपट बॉक्स ऑफिसवर सपशेल अपयशी ठरला. ओम राऊत दिग्दर्शित या चित्रपटात प्रभास, सैफ अली खान आणि क्रिती सॅनॉन यांनी मुख्य भूमिका साकारल्या होत्या. चित्रपटाचे भव्य बजेट आणि तो रामायणावर आधारित असल्यामुळे भारत आणि जगभरातील प्रेक्षकांना या चित्रपटाकडून खूप अपेक्षा होत्या.
मात्र, प्रदर्शित झाल्यानंतर लगेचच, चित्रपटातील व्हिज्युअल इफेक्ट्स (व्हीएफएक्स) आणि असभ्य संवादांमुळे देशभरातून तीव्र जनक्षोभ उसळला. त्यावेळी टीव्ही चॅनल्सवर चित्रपट आणि त्याच्या संवादांचे जोरदार समर्थन करणारे प्रसिद्ध गीतकार आणि लेखक मनोज मुंतशीर यांनी आता आपली चूक मान्य केली आहे.
मनोज मुंतशीर म्हणतात की, 'आदिपुरुष'साठी केवळ संवाद लिहिणेच नव्हे, तर सार्वजनिक व्यासपीठांवर त्याचे समर्थन करणे ही त्यांच्या आयुष्यातील सर्वात मोठी चूक होती.एका संभाषणादरम्यान, मनोज मुंतशीर यांनी या संपूर्ण वादावर मनमोकळेपणाने भाष्य केले.
मनोजने सांगितले की, चित्रपट प्रदर्शित होण्याच्या जवळपास सहा महिने आधीपासून, जेव्हा पहिला टीझर प्रदर्शित झाला होता, तेव्हापासूनच चित्रपटाला टीकेचा आणि ट्रोलिंगचा सामना करावा लागत होता. त्यावेळी त्याच्या पत्नीने त्याला या प्रोजेक्टचा चेहरा न बनण्याचा किंवा सार्वजनिकरित्या त्याचे समर्थन न करण्याचा सल्ला दिला होता.
मनोज म्हणाला, "आज मागे वळून पाहताना मला वाटतं की, मी माझ्या पत्नीचं ऐकायला हवं होतं. त्यावेळी मी थोडा निष्काळजी होतो. प्रेक्षकांच्या संतापाची आणि धक्क्याची तीव्रता समजायला मला किमान दोन दिवस लागले."
आदिपुरुष: माझ्या आयुष्यातील सर्वात मोठी चूक
मनोज मुंतशीर यांनी कोणताही संकोच न बाळगता आपली चूक कबूल केली. 'आदिपुरुष'मधील सहभाग आणि नंतर माध्यमांमध्ये त्याचे समर्थन करणे हा त्यांच्या कारकिर्दीतील सर्वात लाजिरवाणा क्षण होता, असे ते म्हणाले. ते म्हणाले, "आदिपुरुष ही माझ्या आयुष्यातील सर्वात मोठी चूक होती आणि त्या चित्रपटाचा बचाव करणे ही त्याहूनही मोठी चूक होती. चित्रपटाच्या निमित्ताने जे काही घडले, त्याबद्दल मला खूप लाज वाटते. जे काही घडले त्याबद्दल मी हात जोडून माझ्या देशवासियांची माफी मागतो."
मनोजने यांनी देखील कबूल केले की, एक लेखक म्हणून तो मर्यादा पुरुषोत्तम भगवान श्रीराम आणि संकटमोचन भगवान हनुमान यांच्या पात्रांना पूर्णपणे न्याय देऊ शकला नाही. मनोज म्हणाला की, चित्रपट प्रदर्शित झाल्यावर हनुमानजींशी संबंधित त्याची काही विधाने चुकीच्या पद्धतीने मांडली गेली, पण आता त्याला त्या वादग्रस्त ओळी लिहिण्याचे समर्थन करायचे नाही. त्याने खेद व्यक्त करत म्हटले, "आता जेव्हा मी त्या ओळींकडे मागे वळून पाहतो, तेव्हा मला स्वतःची लाज वाटते. त्या लिहिताना माझ्या मनात काय चालले होते, हे मला माहीत नाही."
ओम राऊत दिग्दर्शित आणि टी-सिरीज व रेट्रोफाइल्स निर्मित 'आदिपुरुष' या चित्रपटात दाक्षिणात्य सुपरस्टार प्रभास (राघव/प्रभू राम), कृती सॅनॉन (जानकी/सीता), सैफ अली खान (लकेश/रावण), सनी सिंग (शेष/लक्ष्मण) आणि देवदत्त नागे (बजरंग/हनुमान) यांच्या प्रमुख भूमिका आहे. सुमारे ६०० कोटी रुपयांच्या भव्य बजेटमध्ये बनलेला हा चित्रपट भारतीय चित्रपटसृष्टीतील सर्वात महागड्या चित्रपटांपैकी एक होता.
१६ जून २०२३ रोजी चित्रपटगृहांमध्ये प्रदर्शित झालेल्या या चित्रपटाला दमदार सुरुवात मिळाली, परंतु त्याच्या आधुनिक शैली, वादग्रस्त संवाद आणि हॉलिवूड-शैलीतील दृश्यांमुळे प्रेक्षकांनी तो मोठ्या प्रमाणावर नाकारला. या व्यापक विरोधामुळे निर्मात्यांना चित्रपटातील काही संवाद बदलण्यास भाग पडले.
Edited By- Dhanashri Naik

