राहत फतेह अली खानला दुबईत अटक? पाकिस्तानी गायकने अटकेच्या वृत्ताला फेटाळले

पाकिस्तानी गायक राहत फतेह अली खान यांना त्यांचे माजी व्यवस्थापक सलमान अहमद यांच्या बदनामीच्या तक्रारीवरून दुबईत अटक करण्यात आली आहे. दुबई पोलिसांच्या सूत्रांनी ही माहिती दिली आहे. यापूर्वी त्याला ताब्यात घेण्यात आले होते. मात्र, राहत फतेह अली खान यांनी अटकेच्या वृत्ताचे खंडन केले. ते म्हणाले की अशा वाईट बातमीवर विश्वास ठेवू नका. माझे चाहते हीच माझी ताकद असल्याचे ते म्हणाले. 

राहतचे माजी व्यवस्थापक अहमद यांनी त्याच्याविरोधात दुबईच्या अधिकाऱ्यांकडे तक्रार केली होती. राहत यांनी काही महिन्यांपूर्वी अहमदला वादातून काढून टाकल्याचे सूत्रांनी सांगितले. शिवाय राहत आणि अहमद या दोघांनीही एकमेकांविरुद्ध खटले दाखल केल्याचेही सूत्रांनी सांगितले.

अटकेनंतर ओ रे पिया गायकाला बुर्ज दुबई पोलीस ठाण्यात नेण्यात आले. राहत फतेह अली खान गेल्या काही दिवसांपासून यूएईमध्ये विविध कॉन्सर्टमध्ये परफॉर्म करत आहेत. काही महिन्यांपूर्वी त्यांच्यात अनेक मतभेद निर्माण झाल्याने गायकाने आपल्या व्यवस्थापकाला काढून टाकले होते. त्यानंतर त्याचा माजी मॅनेजर सलमानने त्याच्यावर दुबईत गुन्हा दाखल केला होता.

Edited by - Priya Dixit