उत्तर कोरियाचा पुन्हा क्षेपणास्त्र डाव; किम जोंग-उनने समुद्रात डागली अनेक क्षेपणास्त्रे
अमेरिका, दक्षिण कोरिया आणि जपान यांचा समावेश असलेला पाच दिवसांचा लष्करी सराव संपल्यानंतर लगेचच उत्तर कोरियाने समुद्रात अनेक कमी पल्ल्याची बॅलिस्टिक क्षेपणास्त्रे डागली. ही क्षेपणास्त्रे सुमारे २५० किलोमीटर दूर गेली, असे दक्षिण कोरियाने म्हटले आहे.
अमेरिका, दक्षिण कोरिया आणि जपान यांचा ५ दिवसांचा लष्करी सराव संपताच उत्तर कोरियाने समुद्राच्या दिशेने अनेक कमी पल्ल्याची बॅलिस्टिक क्षेपणास्त्रे डागली. दक्षिण कोरिया आणि त्याच्या शेजारील देशांनी शनिवारी याबद्दल माहिती दिली. उत्तर कोरिया या लष्करी सरावाला आपल्याविरुद्ध केलेले एक चिथावणीखोर कृत्य मानतो. सुमारे ३ आठवड्यांनंतर उत्तर कोरियाने केलेले हे पहिले बॅलिस्टिक क्षेपणास्त्र प्रक्षेपण आहे. यापूर्वीही उत्तर कोरियाने अमेरिका आणि दक्षिण कोरियाच्या लष्करी सरावाच्या निषेधार्थ क्षेपणास्त्र चाचण्या केल्या आहेत.
दक्षिण कोरियाच्या जॉइंट चीफ्स ऑफ स्टाफच्या (जेसीएस) म्हणण्यानुसार, उत्तर कोरियाच्या पूर्व किनाऱ्याजवळील वॉनसान येथून अनेक क्षेपणास्त्रे डागण्यात आल्याचे त्यांनी शोधून काढले आहे. ही क्षेपणास्त्रे अंदाजे २५० किलोमीटरचा प्रवास करून उत्तर कोरियाच्या पूर्व समुद्रकिनाऱ्याच्या दिशेने गेली. दक्षिण कोरियाच्या लष्कराने आपली निगराणी यंत्रणा वाढवली असून, क्षेपणास्त्र प्रक्षेपणांविषयीची माहिती अमेरिका आणि जपानसोबत सातत्याने शेअर करत आहे. दक्षिण कोरियाचे राष्ट्राध्यक्ष आणि राष्ट्रीय सुरक्षा परिषदेने उत्तर कोरियाला बॅलिस्टिक क्षेपणास्त्रे डागणे थांबवण्याचे आवाहन केले आहे.
अमेरिका, दक्षिण कोरिया आणि जपान यांनी शुक्रवारी नियोजित वेळेनुसार आपला पाच दिवसीय 'फ्रीडम एज' लष्करी सराव संपन्न केला. अमेरिकेच्या पॅसिफिक कमांडनुसार, या तीन देशांच्या सैन्यांनी हवाई, सागरी आणि सायबर क्षेत्रांमध्ये संयुक्त सराव केला. समन्वय आणि संयुक्त लष्करी क्षमता मजबूत करणे हा या सरावाचा उद्देश होता. या सरावामध्ये सागरी कवायती, हवेतल्या हवेत इंधन भरण्याचे प्रशिक्षण, सायबर समन्वय आणि वैद्यकीय सराव यांसारख्या उपक्रमांचा समावेश होता. उत्तर कोरिया याला आपल्या सुरक्षेसाठी धोका आणि संभाव्य हल्ल्याची तयारी म्हणून पाहतो.
अमेरिकेच्या पॅसिफिक कमांडने म्हटले आहे की, उत्तर कोरियाच्या क्षेपणास्त्र प्रक्षेपणांमुळे अमेरिकेच्या भूभागाला किंवा तिच्या मित्र राष्ट्रांना कोणताही तात्काळ धोका नाही. कमांडने म्हटले आहे की, अमेरिका आपल्या मातृभूमीचे आणि या प्रदेशातील आपल्या मित्र राष्ट्रांचे संरक्षण करण्यास वचनबद्ध आहे. दक्षिण कोरियाच्या लष्कराने यापूर्वी म्हटले होते की, हे सराव बचावात्मक होते आणि उत्तर कोरियाकडून आण्विक धोका निर्माण झाल्यास तीन देशांची संयुक्त प्रतिसाद क्षमता वाढवणे हा त्यांचा उद्देश होता, परंतु उत्तर कोरियाने हे नाकारले आहे.
सोमवारी तीन देशांचा लष्करी सराव सुरू झाल्यानंतर काही तासांतच, उत्तर कोरियाचे संरक्षण मंत्री किम सॉन्ग गी यांनी त्यावर टीका केली. त्यांनी इशारा दिला की, उत्तर कोरिया आपल्या सामर्थ्याच्या जोरावर "कठोर आणि निर्णायक प्रत्युत्तरात्मक उपाययोजना" करेल.
Edited By - Priya Dixit
