नेपाळच्या पंतप्रधानांचा अखेर राजिनामा

Publish: Tue, 9 Sep 2025 (15:29 IST) Updated: Tue, 9 Sep 2025 (17:18 IST)

नेपाळमध्ये सरकारविरोधी निदर्शने तीव्र होत असताना पंतप्रधान केपी शर्मा ओली यांनी आपल्या पदाचा राजीनामा दिला आहे . शेजारील देश नेपाळमधील परिस्थिती आणखी बिकट झाली आहे. नेपाळमध्ये सुरू असलेल्या निदर्शनांची आग आता राजकीय नेत्यांच्या घरांपर्यंत पोहोचली आहे.

निदर्शकांनी राष्ट्रपती रामचंद्र पौडेल यांच्या खाजगी निवासस्थानावर हल्ला केला आहे. निदर्शक तरुण नेपाळी राष्ट्रपतींच्या खाजगी निवासस्थानात पोहोचले आहेत . निदर्शकांनी पंतप्रधान केपी ओली यांच्या कार्यालयात आणि घरावरही हल्ला केला आहे. त्याच वेळी, निदर्शकांनी नेपाळच्या संसद भवनाला आग लावली आहे.

तत्पूर्वी, निदर्शकांनी ललितपूरमधील माजी पंतप्रधान पुष्पकमल दहल प्रचंड यांच्या घराची तोडफोड केली आणि नेपाळी काँग्रेसचे प्रमुख शेर बहादूर देऊबा यांच्या घराच्या आवारात अनेक वाहनांना आग लावली.  राजधानी काठमांडू आणि देशाच्या इतर भागात कर्फ्यू लागू असूनही विद्यार्थ्यांच्या नेतृत्वाखाली सुरू असलेले निदर्शने अधिक हिंसक झाली आहेत.

केवळ गृहमंत्र्यांच्या राजीनाम्याने समस्या सुटणार नाही, पंतप्रधान ओली यांनीही जबाबदारी घ्यावी आणि पद सोडावे अशी निदर्शकांची मागणी होती. सोमवारी, सोशल मीडिया प्लॅटफॉर्मवरील बंदीविरोधात तरुणांनी केलेल्या हिंसक निदर्शनांना पोलिसांनी दडपण्यासाठी बळाचा वापर केल्यानंतर गृहमंत्री रमेश लेखक यांनी राजीनामा दिला. या कारवाईत 19 जणांचा मृत्यू झाला आणि 300 हून अधिक जण जखमी झाले.

मंगळवारी नेपाळमध्ये दुसऱ्या दिवशीही विद्यार्थ्यांच्या नेतृत्वाखालील सरकारविरोधी हिंसक निदर्शने सुरूच राहिली. निदर्शकांनी सार्वजनिक मेळाव्यावरील निर्बंधांचे उल्लंघन केले आणि पंतप्रधान केपी शर्मा ओली यांच्या राजीनाम्याची मागणी केली आणि अनेक नेत्यांच्या निवासस्थानांची तोडफोड केली. ' जेन जी ' या बॅनरखाली, निदर्शकांनी राजधानीच्या अनेक भागात ' केपी चोर, देश छोडो ' आणि ' भ्रष्ट नेत्यांवर कारवाई करा ' अशा घोषणा दिल्या .

Edited By - Priya Dixit