DCW vs RCBW: आरसीबीने दिल्लीचा आठ विकेट्सने पराभव केला, बेंगळुरूने सलग चौथा विजय नोंदवला
रॉयल चॅलेंजर्स बंगळुरूने दिल्ली कॅपिटल्सचा आठ विकेट्सने पराभव करून सलग चौथा विजय मिळवला आणि अव्वल स्थान कायम राखले. शेफाली वर्माच्या 62 धावांच्या खेळीनंतरही, दिल्ली कॅपिटल्सला फक्त 166 धावा करता आल्या, ज्याचा पाठलाग आरसीबीने 18.2 षटकांत पूर्ण केला.
रॉयल चॅलेंजर्स बंगळुरूने (आरसीबी) दिल्ली कॅपिटल्सचा आठ विकेट्सने पराभव करून सलग चौथा विजय मिळवला. या विजयासह संघ अव्वल स्थानावर कायम आहे. दुसरीकडे, चारपैकी तीन सामने गमावल्यानंतर दिल्ली पॉइंट टेबलमध्ये शेवटच्या स्थानावर घसरली आहे.
शनिवारी नवी मुंबईतील डीवाय पाटील स्टेडियमवर खेळल्या गेलेल्या सामन्यात प्रथम फलंदाजी करताना दिल्लीने शेफाली वर्माच्या 62 धावांच्या खेळीमुळे 20 षटकांत 10विकेट्सच्या मोबदल्यात 166 धावा केल्या. प्रत्युत्तरात, स्मृती मानधना आणि जॉर्जिया वॉलच्या अर्धशतकी खेळीच्या मदतीने आरसीबीने 18.2 षटकांत 2 विकेट्सच्या मोबदल्यात 169 धावा केल्या आणि सामना जिंकला.
प्रथम फलंदाजी करताना दिल्ली कॅपिटल्सची सुरुवात खराब झाली, त्यांनी पहिल्याच षटकात लिझेल ली आणि एल वोल्वार्ड्ट यांना गमावले. कर्णधार जेमिमा रॉड्रिग्ज, मॅरिझाने कॅप, निकी प्रसाद आणि मिन्नू मणी देखील स्वस्तात बाद झाले, ज्यामुळे दिल्लीने 8.1 षटकात 6 बाद 74 धावा केल्या. अशा कठीण परिस्थितीत, शेफाली वर्माने एका टोकाला धरून आक्रमक फलंदाजीने संघाला स्थिर करण्याचा प्रयत्न केला. तिने निकी प्रसाद (12) सोबत 59 धावा जोडल्या आणि नंतर स्नेह राणा (22 सोबत 34 धावांची महत्त्वपूर्ण भागीदारी केली. तिने 41 चेंडूत पाच चौकार आणि चार षटकारांसह 62 धावांची शानदार खेळी केली. लुसी हॅमिल्टनने अखेर 19 चेंडूत 36 धावा जोडल्या, ज्यामुळे दिल्ली कॅपिटल्सना 20 षटकात सर्व बाद 166 धावा गाठता आल्या.
167 धावांच्या लक्ष्याचा पाठलाग करताना, रॉयल चॅलेंजर्स बंगळुरूची सुरुवात चांगली झाली नाही कारण ग्रेस हॅरिस तिसऱ्या षटकात बाद झाली. त्यानंतर कर्णधार स्मृती मानधना आणि जॉर्जिया वॉल यांनी शानदार फलंदाजी करत दुसऱ्या विकेटसाठी 142 धावांची भागीदारी करत डाव सावरला .
मानधना आक्रमक खेळली, 61 चेंडूत 13 चौकार आणि तीन षटकारांसह 96 धावा केल्या, तर वॉलने संयमी सुरुवात केल्यानंतर वेग वाढवला आणि 42चेंडूत नाबाद 54 धावा केल्या. मानधना बाद झाली तोपर्यंत सामना जवळजवळ आरसीबीच्या ताब्यात होता. शेवटी, आरसीबीने 18.2 षटकात 2 बाद 169 धावा करून आठ विकेटने सहज विजय मिळवला.
Edited By - Priya Dixit
