विराट कोहलीने रिकी पाँटिंगचा विक्रम मोडला
विराट कोहलीने न्यूझीलंडविरुद्धच्या दुसऱ्या एकदिवसीय सामन्यात एक मोठा विक्रम रचला आहे. तो आता एकदिवसीय सामन्यांमध्ये न्यूझीलंडविरुद्ध सर्वाधिक धावा करणारा फलंदाज बनला आहे
टीम इंडियाचा दिग्गज फलंदाज विराट कोहलीने न्यूझीलंडविरुद्धच्या दुसऱ्या एकदिवसीय सामन्यात एक मोठा विक्रम रचला आहे . तो आता एकदिवसीय क्रिकेटमध्ये न्यूझीलंडविरुद्ध सर्वाधिक धावा करणारा फलंदाज बनला आहे. याबाबतीत त्याने ऑस्ट्रेलियाचा माजी क्रिकेटपटू आणि कर्णधार रिकी पाँटिंगचा विक्रम मोडला आहे. मात्र, न्यूझीलंडविरुद्धच्या दुसऱ्या एकदिवसीय सामन्यात विराट मोठी खेळी करण्यात अपयशी ठरला आणि केवळ ७ धावा करून पॅव्हेलियनमध्ये परतला.
या सामन्यापूर्वी, विराट कोहली आणि रिकी पाँटिंग या दोघांनी एकदिवसीय क्रिकेटमध्ये न्यूझीलंडविरुद्ध १,९७१ धावा केल्या होत्या. मात्र, दुसऱ्या एकदिवसीय सामन्यात केवळ एक धाव करून विराटने पाँटिंगचा विक्रम मोडला. आता कोहलीच्या नावावर एकदिवसीय क्रिकेटमध्ये न्यूझीलंडविरुद्ध १,९७८ धावा आहेत. यासह, विराटने पुन्हा एकदा सिद्ध केले आहे की त्याला एकदिवसीय क्रिकेटचे 'रन मशीन' का म्हटले जाते.
भारताचा स्टार फलंदाज विराट कोहली न्यूझीलंडविरुद्ध एकदिवसीय क्रिकेटमध्ये सर्वाधिक धावा करणाऱ्यांच्या यादीत अव्वल स्थानी आहे. विराट १९७८ धावांसह जगात पहिल्या क्रमांकावर आहे. त्याच्यानंतर, ऑस्ट्रेलियाचा दिग्गज रिकी पाँटिंग १९७१ धावांसह दुसऱ्या क्रमांकावर आहे. या विशेष यादीत भारताचा महान फलंदाज सचिन तेंडुलकर १७५० धावांसह तिसऱ्या स्थानावर आहे. यानंतर, श्रीलंकेचा माजी यष्टीरक्षक-फलंदाज कुमार संगकारा १५६८ धावांसह चौथ्या स्थानावर आहे आणि श्रीलंकेचा स्फोटक सलामीवीर सनथ जयसूर्या १५१९ धावांसह पाचव्या क्रमांकावर आहे.
दुसऱ्या एकदिवसीय सामन्यात, विराट कोहली ७ चेंडूंमध्ये ७ धावा करून बाद झाला. त्याची विकेट जेकब डफीने घेतली. भारतीय कर्णधार गोल्डन डकवर बाद झाल्याने सामन्यात आपले खातेही उघडू शकला नाही. तत्पूर्वी, प्रथम फलंदाजी करताना न्यूझीलंडने भारतासमोर १३५ धावांचे लक्ष्य ठेवले होते.
