बीज अंकुरे अंकुरे, ओल्या मातीच्या कुशीत

लख्ख प्रकाश निर्मळ, त्यात कष्टाचा पाझर

हवी अंधारल्या रात्री, चंद्रकिरणांची साथ

कसे रुजावे बियाणे, माळरानी खडकात?

अंकुराचे होता रोप, होई रोपट्याचे झाड

मुळ्या रोवुन रानात, उभे राहील हे खोड

निळ्या आभाळाच्या खाली, प्रकाशाचे गीत गात

कसे रुजावे बियाणे, माळरानी खडकात?

नाही झाला महावृक्ष, जरी नसे कल्पतरु

फुलाफळांचा त्यावरी, नाही आला रे बहरु

क्षणभरी विसावेल वाटसरु सावलीत

कसे रुजावे बियाणे, माळरानी खडकात?

मधुकर पांडुरंग आरकडे