IMD Rain Alert in Mumbai: मुंबईत 5,7 आणि 8 जुलैला मुसळधार पाऊस, रत्नागिरी आणि रायगडला रेड अलर्ट

मुंबई आणि कोकणातील अनेक भाग पाण्याखाली गेले आहेत. देशाची व्यापारी राजधानी मुंबई, कोकण किनारपट्टी आणि राज्याच्या इतर भागात काल रात्रीपासून मुसळधार पाऊस पडत असून, अनेक शहरे आणि गावे जलमय झाल्याची माहिती अधिकाऱ्यांनी मंगळवारी येथे दिली. रस्ते आणि रेल्वे वाहतुकीवर मोठा परिणाम झाला आहे. मुख्यमंत्री एकनाथ शिंदे यांनी सर्व जिल्ह्यांमध्ये वैयक्तिकरित्या लक्ष ठेवून हाय अलर्टवर ठेवले असून संततधार पावसामुळे अतिसंवेदनशील भागात राहणाऱ्या लोकांचे स्थलांतर करण्यासह सर्व व्यवस्था करण्याचे निर्देश दिले आहेत.

मुंबईत पावसाचा कहर, जनजीवन विस्कळीत

मुंबईत सुरू असलेल्या संततधार पावसामुळे अनेक भाग जलमय झाले आहेत. रस्त्यांना तलावाचे स्वरूप आले आहे. भुयारी मार्ग जलमय झाले आहेत. भारतीय हवामान खात्याच्या अंदाजानुसार शुक्रवारपर्यंत मुंबईत पावसाची शक्यता आहे. एनडीआरएफच्या 5 टीम बचावकार्यासाठी पाठवण्यात आल्या आहेत. मुंबईत गेल्या 24 तासात 95.81 मिमी पावसाची नोंद झाली आहे. पूर्व आणि पश्चिम उपनगरात अनुक्रमे 115.09 मिमी आणि 116.73 मिमी पावसाची नोंद झाली. महाराष्ट्रातील कोकण किनारपट्टीवरील अनेक नद्या, विशेषत: रत्नागिरी जिल्ह्यात धोक्याच्या चिन्हावरून वाहत आहेत, त्यामुळे सखल भागात पूरस्थिती निर्माण झाली आहे.

खेड तालुक्यात जगबुडी नदी धोक्याच्या चिन्हावरून वाहत आहे. येथील रहिवाशांना जागा रिकामी करण्याच्या सूचना देण्यात आल्या आहेत. राज्य आपत्ती व्यवस्थापन प्राधिकरणाच्या अधिकाऱ्याने दिलेल्या माहितीनुसार, एनडीआरएफने श्वानपथकासह आपली टीम कोकण विभागातील चिपळूणमध्ये तैनात केली आहे. जगबुडी, वशिष्ठी, शास्त्री, सोनवी, काजली, कोडावली, मुचकुंडी आणि बावनदी नद्या सोमवारी सकाळपासून धोक्याच्या चिन्हावरून वाहत होत्या, असे स्थानिक प्रशासनाने सांगितले. मंगळवारी सकाळी झालेल्या मुसळधार पावसामुळे मुंबईतील लोकल ट्रेन 10 ते 15 मिनिटे उशिराने सुरू झाल्या, त्यामुळे हजारो प्रवाशांना वेळेवर कामाच्या ठिकाणी पोहोचण्यासाठी संघर्ष करावा लागला.

हवामान खात्याने ठाणे, पालघर, रायगड, रत्नागिरी, सिंधुदुर्ग, पुणे, बीड, लातूर, जालना, परभणी आणि इतर अनेक भागात अतिवृष्टीचा इशारा दिला आहे. मुंबईला पाणीपुरवठा करणाऱ्या 7 जलस्त्रोतांमधील पाणीसाठा 13 टक्क्यांवर पोहोचला आहे, जो गेल्या आठवड्यापर्यंत 11 टक्के होता. मुसळधार पावसानंतर पाण्याची पातळी आणखी वाढण्याची शक्यता महापालिका अधिकाऱ्यांनी व्यक्त केली आहे. मुंबईत आयएमडीने ऑरेंज अलर्ट जारी केला आहे. म्हणजेच येत्या काही दिवसांत मुसळधार पाऊस पडणार आहे. 8 जुलैपर्यंत कोकणात मुसळधार ते अतिवृष्टी होण्याची शक्यता आहे.

मुंबई आणि महाराष्ट्रातील परिस्थितीवर मुख्यमंत्री एकनाथ शिंदे यांनी अधिकाऱ्यांना सतर्क राहण्याचे आणि NDRF पथके तयार ठेवण्याचे निर्देश दिले आहेत. महाराष्ट्राच्या मुख्यमंत्री कार्यालयाने एका निवेदनात म्हटले आहे की, "राज्याच्या विविध भागांत होत असलेल्या मुसळधार पावसाच्या पार्श्वभूमीवर मुख्यमंत्री एकनाथ शिंदे यांनी मुख्य सचिव मनुकुमार श्रीवास्तव यांच्याशी चर्चा केली आणि सर्व संबंधित जिल्ह्यांच्या पालक सचिवांना परिस्थितीवर लक्ष ठेवण्याचे आणि नियंत्रण ठेवण्याचे निर्देश दिले."